Read Southern Rengma Naga LUK 21 Bible Online

LUK 21 - Southern Rengma Naga bible

LUK 21

¹A-le nyi sogü kenyanyu dan le tha khipe Kershvuka nyu tha kequen kehü khin nyu shü kebin hyulo.

²Lo a-le tenunyu maginyu tha kendi gi le pisa kenyhun pe tsü nyu shü kebin hyushü njüo anyugun ka

³“Ale hagun ka zo tsentsü shüti, maginyu higi hile kechanyu aphu nyeki tha pe shü chonkvu le nye. Temi hidan hi we anyugun hon anyugun kesükela thyü kebin pvünyu khipe shü bin nyo.

⁴Ai higi we a-hon kebin aphu khipe shü kela si genyu,” tsonla.

⁵Tsüselo temi peha le tso kegwa nti lo mele tha khikeshü lope Kershvuka nthyü kezegwa kenjü rüla kera bin.

⁶Tsüselo a-le anyugun ka, “Hagun le hyu kebin hidan hi bochwila mvutse tso nme-e no kerenpvü bin lokeho gwünkho nme le ryüti,” tson.

⁷Tsüsika anyugun le, “Senkethyü gü, tsonlo nyu tsekethyü gwünkho ki tha tsühontse kethyü tsü thyü tila? Lo tha tsüdan thyü nrün ka nyu zansü thyüshü mon?” tson.

⁸Tsüselo a-le anyugun ka, “Hagun meno hagun sala mvu nrün genyu petsü sa lochi; kechamvule temi kechon le azan sen ryüo, ‘Ale mare, lo a-gwünkho-e tila so,’ tsonkethyü zo ryü ti. Tson-e hagun le tsüdan sithen nya nye.

⁹Tsüntimvule hagun le teri kega lo kevükeben kethyü jo kesha ka nshvula nya chi; kechamvule tha tsüdan thyü teri mvulo keshvu genyu. Ai tsügü tsü le kenkhin gü mvu zun.”

¹⁰Lo tsükatsü a-le anyugun ka,“Tsipwen dan me le kecha dan me shwinyü mvu, lo raja nme le raja kecha gü shwinyü mvu soti.

¹¹Lo liki hiki chenda lo chonro (Kenpen) le ketetsin thyü, lo kazü nnu pe ketetsin thyü ryü ti; lo tsangge tha ketetsin kethyü lo tha zansü shwikenrin kethyü thyüshü ti.

¹²Ai tha tsü aphu kethyü mhundyü me le hagun tenlo njüo, hagun nshwen nyhünti, tson-o hagun ten pe sinagog kanyu lo doka nyu shüti, lo azan genyu meno hagun ten zen-o rajanyu lo ahng nyu mhundyü kae gun ti.

¹³Tsügwünkho ka hagun no a-jün zoti.

¹⁴Tsügenyu hagun le nchwenyu nyu zoti yo tsekethyü meka zo nrün dan tsü rüchün nyao hagun nyun bwen nye tse binlo;

¹⁵Kechamvule ale hagun shwikerüchün nyu aphu no hagun hontselo keho nmvue hagun nnyi kendila nrün mün lo thakesha pe hagun tsüshü nrün genyu,

¹⁶Tsüntimvule hagun pepvünyu lo hagun tsasikezen nyu lo hagun senyenyu lo hagun pvünyu kegwa tsin nyue hagun ten pe me tsü ti; lo anyugun le meno hagun dushvue lati.

¹⁷Lo azan genyu temi lihigüe no hagun ntsü ti.

¹⁸Tson-e hagun pehü nme-e nmhenla loho.

¹⁹Hagun le a-keshathyü a-keshathyü tseo nyhenlo yatselo hagun kapu ntsen pe hagun hon thyü loti.

²⁰“Ai hagun le teri shüpahü nyu le ryüo Jerusalem nyida hunpvü kelo kehyu ka nke kela gwünkho ti laso tsekethyü rüchünlo nye.

²¹Tsükatsü Judia nyu kebin nyu no tin sen-o kazüthun ki küla chi; lo nyida tsünyu kebin nyu no tin chwilo; lo low nyu kebin nyu no nyia tsünyu niyü nya.

²²Kechamvule nduka thu pe bin kenjü aphu thyü penlo nrün genyu khen kezo gwünkho le penryü ti.

²³Che, tsükatsü nyuphou pvü kehünyu ju lo a-nyu le tsü kehünyu ju we thyülo tiso! Kechamvule kazü tsünyu kenjün thyü pe ketetsin thyü ti, lo temi hidan ge nyunkekhü nme le ryü nrün genyu.

²⁴Lo anyugun le meno zhethon pe anyugun dushvu ti, tson-o meno anyugun tenzen-o temi aphu mhundyü ka gunti; tsükatsü Juda kemvunyu gwünkho penla kemvuthen Juda kemvunyu no Jerusalem kedü lati.

²⁵“Lo yhüko, lo shye, lo shyenyü ge tha zansü aphu thyüchwiryü ti; lo kazü nyu yhunkehü temi aphu no kenjünthyü ti, tson-o züda lo zükeda khwen genyu temi no a-kerüshvu lati.

²⁶Lo kazü higü ge thathyü ryü kejü hi rüchün-o temi le nshvu pe a-rhokedyü thyü lati.Kechamvule tsangge kekvu sükenu shü nrün genyu.

²⁷Tson-o anyugun le tsükatsü Temi Nyugü le nmhu ge kekvu lo gingvü tse tsüryü kezhü hyuti.

²⁸Ai hagun le tha tsühontse kethyü tsü kehyu ka nyi sogü hagun yhütyü pe teso ki nrilo; kechamvule hagun rhinhi kelo gwünkho nni tsin thyü bin kela genyu.”

²⁹Tsüselo a-le anyugun ka jokejvü zo-o, “Hagun kherobin gü lo senbin aphu nrilo.

³⁰Hagun le sen tsüdan le a-nyü kebwen senchwiryü kezhü hyu yatselo, tsangnyen temün thyü binla sele tsekethyü hagun npvü shalo, lo rüchünlo hünyo.

³¹Tsühontse hagun ko tha hidan hi thyü keryü kehyu ka Sunggigü keda thyü ryü nrün temün thyü binla sele tse kethyü shalo chi.

³²“Ale hagun ka zo tsentsü shüti, tha tsüdan tsü thyü bula kemvuthen shenhe higü hile ndila loho.

³³Tsang lo kazü le ndila ti; ai ajo dan we ndila loho le.”

³⁴“Ai hagun le ntsen serimvu lo nje ntsenyü keyhun ka kera tsü thyürio hagun dunmi thyü bin-o jon tsügü no tegü kethyü hontse hagun le rüchün mvu kebin ka whütse ryü mvulo nrün genyu, tsügenyu hagun petsülo chi.

³⁵Kechamvule tsühontse kethyü le kazü so rünyi thyü kebin aphu ka ryü nrün genyu.

³⁶Ai hagun le tha tsü aphu thyü ryü nrün ka, tsüdan nrhi kelo thyülo njüo Temi Nyugü mhundyü ka sunbinlo nrün genyu hagun le lika hika metse khwenryüo hizin binlo nye.”

³⁷Lo tsükatsü a-le khenyütsen Kershvuka nyu me senthyü zin bin hü; tson-o a-le khejetsen gü Oliv tse kethyü kazüthun ge bin tinla la tsehü.

³⁸Lo temi aphu lonyü nshwen ka Kershvuka nyu a-khwen nyü titseo a-fü ryü ryü tsehü.