Read Southern Rengma Naga LUK 22 Bible Online

LUK 22 - Southern Rengma Naga bible

LUK 22

¹Tsüselo Nken kechwi Nga kebu no shümvuo tensü ketyü Nga gü kho nni ryü zhü.

²Lo peshükeda ju lo lesükeshatsin ju le anyugun kenyun rhün-o Jisu dushvu kela rhi sola; kechamvule anyugun le temi dan nshvu kela genyu.

³Tsükatsü Satan le Judas Iskariot tsekethyü tseryü kenyhun che dan nme nyun ka yüla.

⁴Lo a-le gü peshükeda ju lo shüpahü so keda ju n thon-o Jisu ten pe anyugun tsü titse kethyü tedo zope anyugun hishü.

⁵Tsüselo anyugun le anyugun shekerhün thyüo raka pe a-tsü titse kethyü anyugun kejoshü la.

⁶Tsükatsü a-ko a-kendola njüo temi dan le hü kemvu bin ka Jisu ten pe anyugun tsü titseo nyu cheka lo gwa tiyo tsekethyü rhi sola.

⁷Lo Nkenkechwi Nga kebu no shü kemvu tensü ketyü jon le ryülo ntsin, a-le Pitor lo Johan au kolo.

⁸Tson-o, “Nkenkechwi Nga gü tsü n gun kengüo nga nrün genyu hai le gü ndolo chi,” tsonshü.

⁹Tsontsin au le, “Nle ayi no gü dikipon ndoshü lotse hü nla?” tson-o ketsoshü.

¹⁰Tsükatsü a-le au ka, “Hai le rünyi nyu keyü ka temi nme le laki nyu zü pen-o hai zen keteno tile; hai a-sithen gü a-le ka nme nyu yülo yatselo hai ko a-sithen yü nye.

¹¹Lo yügü ka tsünyu npugü ka, ‘Senkethyü güle nka tesin bin ano senthyükelonyu dan zen-o Nkenkechwi Nga gü ngalo nrün bin tsüle dikipon bin nla? tson-o ketso hü nle,’ tsonshü chi.

¹²Tsonlo a-le tesoki ketsü pe bin kenjü katsen keda nme tsin pe hai hishü tile; tsügenyu tsünyu ndolo chi,” tsonshü.

¹³Tson-o au le gun ntsin, gü Jisu le au ka kezo hontse kebin hyulo; tson-o au le Nkenkechwi Nga tsü ndolo.

¹⁴Tsükatsü a-gwünkho le ryü ntsin a-le apostelnyu dan zen-o tyütsü titseo dun lo.

¹⁵Tson-o a-le anyugun ka, “Ale kenjünthyü nrün mhundyü hagun zen-o Nkenkechwi Nga higü hi nga nyüri tsin ryü le.

¹⁶Kechamvule ale hagun ka zoshü ti, Sunggigü keda nyu tsü thyü penlo kemvuthen ale hagun zen-o tyütsü sin loho kethyü si genyu.”

¹⁷Tson-o a-le honpen gü khipenlo njüo Sunggigü shwen shüo zo, “Hagun le hi khipe kenjüntsülo nye.

¹⁸Kechamvule ale hagun ka zoshü ti, Sunggigü keda kethyü le ryü kemvuthen ale ntsoka gerhonyu vain zü tsü sinlo keho si genyu.”

¹⁹Tsüsika a-le tensü khisolo njüo Sunggigü shwen shüo, “Hile hagun genyu khikeshü amin le; hagun a rüchün hü nrün genyu hi tyü tyü tse nye,” tsonshü.

²⁰Lo tsühontse chvü tyü kelo sika a-le honpen gü ko khi pe anyugun tsü shüo zo, “Honpen higü hile hagun genyu tsunchwikeryü azi gü, jopenron kelo tejvü keshün gü le.

²¹“Ai hire, a tenshü nrün gü ben ko miz higü ge bin nyo.

²²Lo Temi Nyugü rüla we nchwenyu thyü titseo ndo pe bin kenjü hontse thyü tiso; ai che, a tenshü nrün gü we thyülo tiso!”

²³Tsonshü ntsin anyugun le segü le hithyü tiyo tsekethyü anyugun npvü khinyunyu ketso sola.

²⁴Lo anyugun le segü no kedatsin thyü tiyo tsekethyü zo kenyi sola.

²⁵Tsügenyu a-le anyugun ka, “Sunggigü shakemvunyu we anyugun raja nyu no anyugun so keda thyü hünyo; lo anyugun so kekvu kebin nyu no sunphen nyu me pepvünyu thyü hünyo.

²⁶Ai hagun we no tson loho; tsüntimvule hagun dan nyu kedagü no aphu dan nyu nchegü hontselo; lo sharhi gü no me gonyu hontselo.

²⁷Kha, tsonlo dun-o ho kebin gü le, keho nyu melo thyü kebin gü le gonla? Tsü le dun-o ho kebin gü le gon mvu ole? Tson-e ako hagun dan nyu me lothyü kebin gü hontse kebin lela.

²⁸“Lo ale tson yatse-e mele a kesemen aphu kae hagun le azen ryüo ti;

²⁹lo apvü le a keda bin ndo njüo a ketsü hontse, hagun ko no akeda nyu azen-o miz nme ge tyütsülo nrün genyu ako hagun no gonlo nrün bin nme ndo pe bin njü nyo.

³⁰Tsügenyu hagun ko no keda bin ge bin-o Israel nyu tsipwen tseryü kenyhun dan jün kera kethyü nyu thyü ti.

³¹“Hire! Simon, Simon! Satan le tho zinkehü hontse hagun pe a-hon thyülo titseo hagun zin titse kethyü hilo laso.

³²Ai n ketenyen no ndila mvu nrün genyu ale n genyu hishü sele nye; lo nle n nyunkeluni kelo siki npvünyu ju nyun thyü pechelo nye,” tsonshü.

³³Tsüselo Pitor le, “Npugü, ale nzen-o doka nyu metse lo kesi nyue gü titse-e gü logwa le!”

³⁴Tsükatsü Jisu le a-ka, “Pitor, ale nka zoshü tile, nle ashamvu letse kethyü gwünshen ge zokemvuthen ntsoje tero le khun loho,” tson.

³⁵Tsüselo a-le anyugun ka, “Ale hagun no rakakhin lo jola lo phaje sen mvuo hagun nikeshü ka hagun le tha peha rhodyü hü le?” tson-o anyugun ka ketso shü. Lo anyugun le, “Thame rhodyü mvu.”

³⁶Lo a-le anyugun ka, “Ai ntsoka we raka khin kebin nyu no khisenlo, lo tsühontse thakvue senlo, lo tsühvu nme-e kendinyu no a-mirün-e jwen pe zhethon nme-e heilo.

³⁷Kechamvule ale hagun ka zoshü tile, ‘A-swü pe tejvü gwün kerhonyu sin loso,’ tson kethyü nduka thu kenjü gü age tsü thyü penlo mvulo keshvu genyu. A rüla jo tsüdan thyü penlo güzhü la ketsin le.”

³⁸Lo anyugun le, “Npugü hire, hika zhethon kenyhun le bin nle,” tson. A-le anyugunka, “Tsühvu nti-e gwa le,” tson.

³⁹Tsüselo a-le chwiryüo nduka jvü hontse Oliv kazüthun ge küla; lo senthyükelonyu dan ko a-zen-o tsünyu gunla.

⁴⁰Tson-o a-le tsünyu gunlo ntsin a-le anyugun ka, “Hagun kesemen nyu yüla mvu nrün genyu hibinlo chi.”

⁴¹Tsonshüo a-le anyugun nyeki tso shwegwa kho ka npha gü khosenlo njü kehithyüo, “Apvü, nle nkendo yatselo, honpen higü no a nrhila lo.

⁴²Ai akendo nyu mvule nkendo hontselo chi,” tsonshü.

⁴³Tsonshü ntsin tsangge lokethyünyu nme le tsangge a-ge tsüryüo a-thyü nkvu shü.

⁴⁴Tsüselo a-le kenjün thyü sa-o hi pe a-yhen thyüsin sola; lo a-ketseyhün le tezi hontse jen pe kazü nyu ketetsin thyü tsüryü la.

⁴⁵Lo a-le tsühontse kehithyü shü njüo senthyükelonyu dan ka niryü ntsin, anyugun le anyugun nyun kenjün kethyü pvüo zhütin kela hyulo. Tsükatsü a-le anyugun ka, “Hagun le nyuthyüo zhü bin nla?

⁴⁶Hagun kesemen nyu yü lamvu nrün genyu solo-o kehithyü binlo chi,” tsonshü.

⁴⁷Lo a-le jo tsü zokebin ka, hire, temi dan me lo anyugun mhundyü tseryü kenyhunche dan nyu nme, Judas tsekethyü gü le hü; lo a-le Jisu nboshü titseo a-khoka ryü.

⁴⁸Ai Jisu le a-ka, “Hire, Judas, nle Temi Nyugü nboshüo a-ten shü titse bin nle?” tson.

⁴⁹Tsontsin Jisu zen kehü senthyükelo ju le tha dihontse titse bin yo tsekethyü shalo njüo, anyugun le, “Npugü, agun no zhethon pe me du ti mon?” tson-o a-ketso sola.

⁵⁰Tson-o anyugun nme le a-zhethon sütho pe peshükedagü gogü duso ntsin a-nyetin nzhüzin duthü la.

⁵¹Ai Jisu le anyugun ka, “Anyugun no tson bin chi; khela chi,” tson-o a-le temi tsügü nyetin kesü shüo a-nyetin thyü ngwa shüla.

⁵²Tson-o Jisu le a-ten titse ryü kejü peshükeda ju lo pelünyu dan ka, “Hagun le zhethon lo senkethü sen-o mehon seketyünyu keten hontse ryü zhü nle?

⁵³Ale khenyütsen hagun zen-o Kershvuka nyu bin hüe, hagun le tsüka we hagun ben keto pe aten titse kethyü rüchün hümvu; ai ntsoka we hagun gwünkho le penla so, lo kezüngüe a-kekvu le bin laso.”

⁵⁴Tsükatsü anyugun le a-tenlo njüo a-nrhisü zen-o peshükedagü kanyu gunla. Lo Pitor le me kho nni sarimvu tse a-sithen gun.

⁵⁵Tson-o gü mele khenpvü ka mah thyüo temi dan me le kehun bin laryü, Pitor ko yügü temi tsüdan zen-o dunlo.

⁵⁶Tsükatsü me gonyu nme le Pitor le mah ngvü kebin hyushüo a-nriryüo, “Temi higü hi ko Jisu zen hü le,” tsonso.

⁵⁷Ai a-le nmvu letseo, “Tenunyu, ale a-shamvu shü le,” tsonla.

⁵⁸Tsüsika sun khe bin ntsin, kechanyu nme ko a-hyushüo a-ka, “Nko tsüdan nme hile!” tsonni. Ai Pitor le, “Temi gü, ale shamvu letselo!” tsonnila.

⁵⁹Tson-o tegi kevüja nme siki tsü kechanyu nme ko tenge tseo, “Temi higü hiko a-zen hü ketsin le, a-le Galilnyu nme le.”

⁶⁰Ai Pitor le, “Temi, nle kezo gü tsü ale shamvu le!” tsonnila. Lo tsü zo nsen ketseka tero le khun whütse soryü la.

⁶¹Lo tsükatsü Npugü le raniryüo Pitor nrishü. Tsüselo Pitor le Npugü le a-ka, “Nle ntsoje tero kekhun mhundyü ashamvu letse kethyü zo kenshen ge tile,” tsonkethyü kezo jo tsü rüchün lo.

⁶²Tson-o a-le kamhun ki chwigü chü pe ketetsin thyü sola.

⁶³Tsükatsü Jisu nrhisü zen kehü temi dan le a-shwinyüo a-vü sola.

⁶⁴Tson-o anyugun le phi khipe a-yhütyü jelo njü a-vüo, “Kha, tsüle segü le nvü shüyo pe agun ka sidyükesha jo zoshü lo!”

⁶⁵Tson-o anyugun le a-kesüo a-ge jo kechon zo sola.

⁶⁶Lo tsangben chwiryülo ntsin, peshükeda ju lo lesükeshatsin nyu dan-e sin tseo anyugun rünyi pelü kehun nyu ngü kequenlo.

⁶⁷Lo anyugun le a-nrhisü zen gü tsüdan kehun nyu gun-o, “Nle Khrista gü yatselo, agun ka zo shülo?” Ai a-le anyugun ka, “Ale hagun ka zoshüe, hagun le tenyen loho;

⁶⁸lo ale hagun ka tha nme ketso shüe hagun le tsüe pe aka zoshü loho.

⁶⁹Ai ntsoka gerhonyu Temi Nyugü le Kekvutsin gü ben njüzin bin tinla tiso,” tsonla.

⁷⁰Tsontsin anyugun aphu a-ka, “Tsonlo nle Sunggigü Nyugü ole?” tson-o a-ketsoni.

⁷¹Tsügenyu a-le anyugun ka, “Ele, hagun kezo tsü le,” tsonshü. Tsüselo anyugun le, “Ngun nyu tsekethyü jünkezo füsin bin semon? Nle a-mün nyu shalo kela sile,” tson sola.