Read Southern Rengma Naga LUK 23 Bible Online

LUK 23 - Southern Rengma Naga bible

LUK 23

¹Lo tsükatsü temi aphu so-o a-zen Pilat mhundyü nyu gunla.

²Tson-o anyugun le a-nkhin-o, Pilat ka, “Agun le temi higü hile n temi sa zen kehü lo khajana pe Kaisar tsü nyalo tseo sorkari nkhin kehü lo a-npvü a-le raja nme letse, lo tsü le Khrista gü letse hüo a-hyulo le.”

³Lo tsükatsü Pilat le a-ka, “Nle Judanyu raja gü tsü ole?” tson-o a-ketso. Tsügenyu Jisu le, “Ele, nle kezo gü tsüle,” tson zoshü.

⁴Tsüselo Pilat le peshükeda ju lo temi dan ka, “Ale temi higü ge a-kemu nme-e hyulo mvu le.”

⁵Ai anyugun le anyugun yhenthyüo, “A-le Judia kazü aphu nyu, lo Galil kazü nyu ryüo hi keti, me senthyüo temi dankevü pe nthu hiti laso,” tsonni sola.

⁶Ai Pilat le jo tsü shashü njüo, “A-le Galil nyu ole?” tsekethyü temi dan ka ketsoshü.

⁷Tson-o a-le Herod kipon nyu letse kethyü shalo njüo, a-le Jisu nipe Herod ki shüshü; Herod le tsügwünkho ka tsü Jerusalem nyu ryüo bin kehü genyu.

⁸Lo tsükatsü Herod le Jisu hyu keshü ka a-kenyü rila. Kechamvule a-le nduka a-rüla shao kethon kie a-hyushü nyüsa ryü kela genyu; lo a-le ndun tho-e thyü pe a-hishü ti ado tse rüchün kehü genyu.

⁹Tsügenyu a-le Jisu ka jo kechon ketso; ai Jisu le a-ka thame zoni shü mvula.

¹⁰Lo peshükedanyu ju lo lesükeshatsin nyu ju le tsükatsü bin-o a-nkhin pe ketetsin thyü sola.

¹¹Tsüselo Herod le a-shüpahü zenlo-o Jisu no tha lihi kemvu nme hontseo, ro kendi thyüo a-phinya shweshwe tsekethyü nme khipe a-nbenshü njüo a-nipe Pilat ki shüni la.

¹²Lo tsünyü tsü we Herod lo Pilat au le kengü gwalo la; ai tsü mhundyü we au le kerüchün gunryü.

¹³Tsüselo Pilat le peshükeda ju lo pelünyu ju lo temi ko kequenlo njüo anyugun ka, “Hagun le temi higü hile me thyü nshvu kehünyu letse kethyü genyu a-ten zen-o aki ryü bin nyo.

¹⁴Ai hire, ale hagun mhundyü nyu a-ketso petsü sa gun-e, hagun le kenkhin jo tsü rüchün kegun le, ale a-ge kemu nme-e hyulo mvu; lo Herod-e tsühontse hyulo mvu.

¹⁵Tsügenyu a-le a-nipe ngun ki shüni shüla so; lo hire, a-le meno a-dushvula kezü tho nme-e thyüshü mvu lenye.

¹⁶Tsügenyu ale shaja pe a-tsüla njüo a-honi shü lati.”

¹⁷(Kechamvule nken kegun nga tsennyü Pilat le donyu nme hoshü pe anyugun tsü mvulo keshvu genyu.)

¹⁸Tsonshü ntsin anyugun aphu nra sen-o, “Temi higü no bin nya, ai Baraba we khini pe agun tsüshü lalo.”

¹⁹(Baraba tsüle sorkari shwikerüchün nyu nme lo me dukeshvu nyu nme genyu a-ten pe doka nyu khin njü.)

²⁰Tsükatsü Pilat le Jisu hoshü lanyüo zoni,

²¹ai anyugun le nra anyugun yhenthyüo, “Krus ge hüla lo, a-khipe Krus ge hüla lo!” tsonlo la.

²²Ai Pilat le gwünshen ge gü ka anyugun ka, “Nyu genyu ola? Temi higü le nyu gwakemvu thyüshü ola? Awe le a-ge a-hüla kezü kon nme-e hyulo mvu le; tsügenyu ale a-vüla njüo a-hoshü lati.”

²³Ai anyugun le nra anyugun yhenthyüo a-hüla lotse kethyü hi ton sola. Tson-o anyugun le anyugun jo genyu kvulo.

²⁴Tsüselo Pilat le anyugun kehi hontse khipe anyugun tsüla.

²⁵Tson-o a-le sorkari shwinyü kemvu gü lo medukeshvu genyu doka nyu khin kenjü gü, anyugun le a-hoshüla lotse hi kethyü gü honi shüla; ai a-le Jisu we khipe anyugun no anyugun kendo thyülo lotseo zoshü la.

²⁶Tsükatsü anyugun le Jisu nrhisü zen gun kejü ka Simon tsekethyü Kurinnyu nme le kazü kecha kipon ryü kejü hyulo-o anyugun le a-nrhisülo njüo a-no krus sen tsü pen-o Jisu sithen lotse sola.

²⁷Tsükatsü temi danda nme le Jisu sithen hü tsüdan nyu tenunyu dan me ko a-chechü hü.

²⁸Ai Jisu le rani gü anyugun ka, “Jerusalem tenunyu ju, hagun le agenyu we chü nyalo, ai hagun le hagun nyenyu genyu chülo chi.

²⁹Hire, gwünkho nme le ryü zhü nyo, tsünyü tsü nyu kendinyu lo a-gin nyu nyuphou pvü kemvunyu lo ntsenyu no thame kae a-ge nyüzü tsü kemvunyu dan le a-phou kengvütsin, tsonti.

³⁰Lo tsükatsü mele kazüthun dan ka, hagun le ntsi-o age tsüryülo, lo rinchothun-e no ryüo asunlo lo, tson ti.

³¹Mele senbin kerhün gü ge nsen hihontse thyü yatselo senbin kesinyu ge we dihontse thyü so tila.”

³²Lo tsükatsü kemu kethyü nyu mihvu ko pe a-sin-o hüla titse tenzen ryü.

³³Tsüselo anyugun le kazü zan nme, “Pekhunru,” tsekethyü nme tilo njüo, tsüka krus ge a-hüla. Lo kemu kethyü hvu nme pe a-njüzin lo nme pe a-ngwazin tse a-sin-o hüla.

³⁴Tsükatsü Jisu le, “Apvü anyugun kemu jü pe anyugun tsülo; kechamvule anyugun le thyü kebin hile shao thyü bin kemvu genyu!” tsonshü. Tson-o anyugun le henshwio a-phi a-nya kenjünlo.

³⁵Lo temi dan le tsüka bin-o nri bin. Lo pelünyu jue a-shwinyüo, “A-le me kechanyu we kenilo hü, a-le Sunggigü le kejükelo Khrista gü le tselo, a-no a-npvü a-kenilo chi!” tson sola.

³⁶Lo tsüntimvule shüpahünyu dan-e keyüthyüo, keshonzü sen gü a-lao,

³⁷“Nle Judanyu raja gü letse lo n npvü nkenilo chi,” tson sola.

³⁸Lo a-pe soka, “HIGÜ HILE JUDANYU RAJA GÜ,” tsonkethyü thu sinshü.

³⁹Tsüselo hü kenjü kemunyu hvu nme le Jisu nkhin-o, “Nle Khrista gü mvu ole? Tson yatselo nle n npvüe lo ayi ko tse kenilo ta.”

⁴⁰Ai kecha gü le a-kesü-o, “Nko a-hontse kenjün thyü bin-e nyuthyüo tson hü nla? Nle Sunggigü nshvu mvu ole?”

⁴¹Tson-o a-le, “Nyi we nnyi shaja hyulo zü; nnyi we nnyi tho chün hyulo bin nyo; ai temi higü we tejvü kemvu nme-e thyü mvu.”

⁴²Tson-o a-le, “Jisu, nle n raja bin nyu kegun ka aphin rüchün shülo!”

⁴³Tsüselo Jisu le a-ka, “Ale nka zo tsentsü shü tile, nle nthu nnyi kebwen bin nyu bin tinla tiso.”

⁴⁴Lo tsü le tegi kevüja tseryü kenyhun la, lo tsükatsü gü tegi kenshen keti kazü aphu nyu tsangzün tin tsela.

⁴⁵Yhüko-e benshü mvula; lo Kershvuka nyu phi sükhin kenjü gü le a-chvü nyu nrhen chwela.

⁴⁶Tsüselo Jisu le nra sen-o, “Apvü, ale a kapu ho pe nben nyu shü güzhü sele nye,” tsonshü. Lo a-le jo tsü zoshü njüo a-kapu hoshü la.

⁴⁷Lo tsükatsü shüpahünyu sokedagü le tha tsüdan thyükela hyushü njüo Sunggigü shwen-o, “Temi higü hile kentsen nyu nme hile la!”

⁴⁸Lo temi dan tsü nri titse keryü nyu aphu tha tsühontse kethyü tsü hyushüo anyugun nyun jen-o tin küla.

⁴⁹Lo a-keshanyu aphu lo Galil nyu a-sithen keryü tenunyu jue gü pere ki dun-o tha tsühontse thyü kela tsü shwi kü.

⁵⁰Tsükatsü pelünyu temi kegwa teshwen kepvünyu nme a-zan le Josef tsekethyü nme le bin hü,

⁵¹a-le pelünyu kechanyu dan kendo lo anyugun le thyükela nyu tsü anyugun zen-o kejorhün mvu; lo a-le Judanyu rünyi Arimathia nyu,

⁵²Lo a-le Sunggigü Raja le keryü khwen kehünyu nme. Temi tsügütsü le Pilat ki gü Jisu min hi.

⁵³Tson-o a-le Jisu min tsü penshye pe linen phi lope jelo njüo pen gü tso run pe sika thyü titse kenjü nduka temi nme min lope shüshwi kemvu nme nyu shüla.

⁵⁴Lo tsünyü tsü nga genyu tha ndonron kethyü jon, lo Sabbath ti güzhü.

⁵⁵Lo Galil nyu a-zen keryü tenunyu jue me sithen gü sikae lo a-min pe nyu tsethyü shüla yo tsü aphu hyu.

⁵⁶Tson-o anyugun le nigun ryüo tharünkenyi lo terzü kechacha kethyü ndolo. Tson-o Sabbath nyü we anyugun le tejvü gü zen-o rüyülo.