Read Southern Rengma Naga LUK 24 Bible Online

LUK 24 - Southern Rengma Naga bible

LUK 24

¹Lo Sabbath jon keri nyü tsangben chwiryü nyeka tenunyu tsüdan le tharünkenyi ndo pe bin kenjü dan tsü sen-o sika ki ryü.

²Lo tsükatsü anyugun le tso lope sika kakhin thyü kenjü tsü le keto kela hyulo.

³Tson-o anyugun le sika nyu tsü yü ntsin, Npugü Jisu min tsüle tsünyu bin mvu kela hyulo.

⁴Lo anyugun le tha tsühontse kethyü tsü rüchün pe anyugun rhokedyü thyü bin ntsin, hire, temi mihvu le phinya kenchwü kenshwen sen-o anyugun khoka kebinhyulo.

⁵Tsüselo anyugun le nshvuo anyugun mhun pvü nkhün tsüla ntsin, temi tsühvu le anyugun ka, “Hagun le nyuthyüo kesinyu rhüniso kela gü fü hü nla?

⁶A-le hika ndi laso, ai a-le rhünniso laso. Hagun le a-le Galil nyu bin kehü ka hagun ka, ‘Temi Nyugü le meno a-ten pe kemunyu ben nyu shü lati.

⁷Tson-o krus ge meno a-hüla ti; ai a-le jonshen nyü rhünniso lati,’ tson kethyü hagun ka zokeshü jo tsü rüchünlo nye.”

⁸Tsüselo anyugun le a-le anyugun ka kezo jo tsü rüchünlo,

⁹njüo sika nyu rani gü jo tsü aphu pe tseryü nmeche dan ka lo kechanyu aphu kae zoshü.

¹⁰Lo tenunyu tsüdan tsüle Magdalin Maria, lo Jona lo Jakob au jvü Maria; lo tsüdan kemvu tenunyu kechanyu dan-e gü apostel nyu dan ka zo küshü.

¹¹Ai apostel nyu dan le tenunyu dan jo tsü le jo kenrun nme letse kethyü rüchün-o tsüdan jo tenyen mvula.

¹²Ai Pitor le solo njüo tin gü sika nyu nkhüntsü gü nrishü ntsin linen phi le kebin nti hyulo; tson-o tha tsüdan rüchün pe a-dun thyüla njüo a-kaki nigun la.

¹³Tsükatsü hire, mihvu le Ema tsekethyü Jerusalem nyeki furlong ja hentsero ki gunzhü.

¹⁴Lo tsükatsü au le tsügwünkho ka tha thyükela dan zokezen gunzhü.

¹⁵Lo au kenthon-o khinyunyu ka tha ketso kebin ka Jisu le au khonni gü au zen kethenlo la.

¹⁶Ai au no a-shamvulo nrün genyu au yhütyü thyü kecha thyüla.

¹⁷Lo tsükatsü Jisu le au ka, “Hai le tsonne nyu kera kehü tsüle nyu rüla zohü nla?” tson-o au ketso shü. Tsüselo au le au mhun gwakemvu thyüo nma tse tinla.

¹⁸Lo au nme zan le Kleopa, tsügü le a-ka, “Njwen-o Jerusalem nyu ryü kebin nyu dan nyu hijonka thyü kela tsü rüla shakemvu le n nti se hile.”

¹⁹Tsüselo a-le au ka, “Nyu rüla letse?” tson-o ketsoni. Lo au le a-ka, “Nazaretnyu Jisu, sidyükeshanyu nme, Sunggigü lo temi aphu mhundyü ka a-jo lo a-tho-e ndun thyü sa kethyü nyu nme rüla le.

²⁰Lo peshükeda ju lo a-rünyi nyu pelünyu ju le a-ten pe me ben nyu shüo meno a-dushvula lotsela, tson-o meno krus ge a-hüla.

²¹Ai a-le Israel nyu rhinhilo titse kethyü gü ado tse kethyü agun le a-tenyen ryü le. Lo agun le kezo tsü ntimvule a-dushvu kela le nthu jonshen thyü laso.

²²Lo agun lüginyu tenunyu dan me-e lonyü sika nyu gun-o niryüo anyugun jo genyu agun no agun dunthyü sa lale.

²³Tsüdan le gü ai a-mi hyulo mvuo rani ryüo anyugun le tsangge lokethyünyu hyu letse zo-o, a-le rhünni sola sele tse kethyü pe tenunyu dan ka zo letse kethyü shalo.

²⁴Lo agun ko peha le gü tenunyu ju le agun dan nyu kezo hontse kethyü hyushü letse zo bin nyo; tsüdan-e Jisu hyumvu letse kethyü zo,” tson zoshü.

²⁵Tsonshü ntsin a-le au ka, “Hire, kepin nyu, sidyükeshanyu le zo kenjü tsü aphu hagun nyun le tsüe tenyenlo tsensa kehü dan!

²⁶Khrista le tsühontse kenjünthyüo a-zan le gonlo zü mvu ole?”

²⁷Tsüselo a-le Mosa lo sidyükeshanyu rüla zo teri so-o ketsin lesü nyu a-rüla thu kenjü tsü zo petsü sape au hishü.

²⁸Lo au le gunti tse kebin rünyi gü tilo güzhü ntsin, a-le tsonda gü zen nphazhü la;

²⁹tsügenyu au le a-khin tenge tseo, “Nle ayi zen-o bin tinla nye; tsang-e zün güzhü laso lo tsangkeben jon kechon gü le güla sele.” Tsügenyu a-ko au zen yügü tsünyu bin tinla.

³⁰Tson-o a-le au zen tyütsü titseo bin kelo ka a-le tensü khi senlo njüo Sunggigü shwen shüo boshwen pe au tsüshü.

³¹Tsüselo au yhütyü le ntsen chwiryülo, tson-o au le a-shalo; tsonlo ntsin au no a-hyu sinmvula.

³²Tsügenyu au le au npvü kenthon-o, “A-le tsonne nyu nnyi nthon ketseka a-le ketsin lesü tsin pe nnyi hi kebin ka tsü nnyi nyun nyenbün pvü hü mvu ole?” tson sola.

³³Tsüselo au le tsügwünkho katsü Jerusalem nyu raniryü ntsin, tseryü nmeche ju lo npvünyu ju le gü kequen kebin hyulo.

³⁴Lo anyugun le, “Npugü le rhünni sola ketsin machi! Lo Simon ko no a-hyu le!”

³⁵Tsüselo au ko tsonne nyu thyükela tsü lo a-le tensü boshwen pe au tsü keshü ka au le a-sha kelo rüla pe anyugun ka zoshü.

³⁶Tson-o anyugun le jo tsühontse kethyü kenthon kebin katsü Jisu le yüryü anyugun dan nyu binlo njüo, “Hagun kegwa gü thyülo nye!” tsonshü.

³⁷Ai anyugun le tsüle kapu nme hyula sele tseo nshvu pe ketetsin thyü sola.

³⁸Tsüselo Jisu le anyugun ka, “Hagun le nyuthyüo hagun nyun nshen hü nla? Lo nyuthyüo tenyenkemvu nyun pvü hü nla?

³⁹Ale le, hagun le a pha lo aben nrilo re; a kesüo ashwi salo. Kapu le a-thyü lo a-ru ndi, ai hagun le a-kehyu we awe tsüdan tsü bin kü.”

⁴⁰Tson-o a-le jo tsü zokeshü sika a-le a-ben lo a-pha pe anyugun hishü.

⁴¹Ai anyugun le anyugun shekerhün pvüo tenyenlo hola ntsin, a-le anyugun ka, “Hagun le ketyüketsü peha sen hü le?” tson-o ketsoshü.

⁴²Tsüselo anyugun le tsehü keshvu pvü kehü sime lope a-tsüshü,

⁴³tsüselo a-le tsü khilo njüo anyugun mhundyü ka tsü khityü pe anyugun hishü.

⁴⁴Tson-o a-le anyugun ka, “Mosa jvü nyu lo sidyükeshanyu lesü nyu lo Lü lesü nyu a rüla thu pe bin kenjü tsü, aphu thyü penlo mvulo shvu tsekethyü ale hagun zen kebin ka hagun ka zokeshü ajo le hile nye.”

⁴⁵Tson-o a-le anyugun no ketsin lesü shalo nrün genyu anyugunnyun khinshye shü.

⁴⁶Tson-o a-le anyugun ka, “Khrista le kenjünthyüo tsüsiki jonshen nyü rhünniso lati,

⁴⁷lo Jerusalem nyu bin zenlo njüo temi kebin aphu mhundyü nyu nyunkelukelo lo kemu jülo lotse kethyü a-zan nyu zope hiti.

⁴⁸Tsonkethyü thu njü, lo hagun le jo tsüdan jünkezonyu sele nye.

⁴⁹Lo hire, Ale Apvü le khishü titse kethyü gü nipe hagun ki shüti; ai hagun le tsangge kekvu hyulo kemvuthen rünyi nyida (Jerusalem) nyu bin tse nye!” tsonshü.

⁵⁰Tsüselo a-le anyugun zen-o Bethani kentsun denzin gü, a-ben hvu shwenshüo jochü pe anyugun tsü.

⁵¹Lo a-le jochü pe anyugun tsü kebin ka, a-le anyugun zen kekhola; tson-o a-zen-o tsangge küla.

⁵²Tsükatsü anyugun le a-rüshvushüo, anyugun shekerhün thyü sen-o Jerusalem nyu gunla.

⁵³Tson-o anyugun le Kershvuka nyu tsü Sunggigü rüshvuo A-shwen zin bin tinla.