Read Southern Rengma Naga LUK 3 Bible Online

LUK 3 - Southern Rengma Naga bible

LUK 3

¹Tiberia Kaisar tsekethyü raja kedagü le gon kelo chen tseryüpvün chen Zakariah nyugü Johan le tehen mele rünyi thyü hü kemvu ki kehü ka Sunggigü jo le a-ka ryü.

²Tsükatsü Pontia Pilat le Judia kazünyu ahng thyü bin; lo Herod le Galil kazünyu raja thyübin, lo a-sikezen gü Filip le Iturea lo Trakonita kazü hvu so keda thyü, lo Lusania le Abilene kazünyu raja thyü, lo Ana lo Kaifa au le peshükeda thyübin.

³Tsükatsü Johan le Jordan züri kho likipon rünyi thyü kebin aphu nyu gungü me senthyüo, “Hagun kemu nyu ranilo lo tson-o baptaiz thyülo, lo Sunggigü le hagun kemu jü shü ti.”

⁴Hi rüla Isaya sidyükesha gü lesü nyu thu bin: “Temi nme le tehenyu nra sen-o: ‘Hagun le Npugü tson ketsü lo; tsonkhu thyü kenjü lochi!

⁵Kazü ketsenyo aphu lu lati, lo kazüthun lo rincho thyü kentsin lati. Tson kese thyü kenjü lati, lo tson kenko thyü nshwü lati.

⁶Lo temi aphu Sunggigü le kenikelo khi keshü gü hyu kü ti!’ ”

⁷Lo a-no baptism pe anyugun tsü lotseo kegun temi dan ka, “Hire, ribo tsipwen ju, hisiki nyunkekhü hagun ge ryü nrün nrhilo titse kethyü segü le hagun ka zo shüla?

⁸Hagun nyun kelulo gwa nrün sha nshalo chi, tson-o hagun nyunki,‘A-gun ai agun pvü Abraham nyu le,’ tson kethyü zo nya. Lo hire, ale hagun ka zo tsentsü shüti, Sunggigü le tso hidan ge Abraham nyenyu thyü shü logwa.

⁹Lo ntsoka hi ai nri gü khipe senbin pha nyu nden bin nyo. Tsügenyu tesen a-sha nshalo kemvu nyu aphu gwen pe mah nyu shwen shü lati.”

¹⁰Tsontsin temi dan le a-ka, “Tsonyatselo ale nyu thyülo mvulo shvula?” tson-o ketso sola.

¹¹Lo a-le anyugun ka, “Ligühigüe a-bolaphi kenyhun le kebin nyu no pe a-bolaphi kendinyu tsüla chi; lo a-ketyü ketsü le kebin nyue no tsühontse thyülo chi.”

¹²Tsüselo khajana keshvunyu dan mele baptism hyulo nyüo gunryüo a-ka, “Senkethyü gü, agun ko no nyu thyülo mvulo shvula?”

¹³Lo a-le anyugun ka, “Hagun no lo lotse keshü soki hisin nya chi.”

¹⁴Lo shüpahü dan me ko a-ka, “Agun we nyuthyülo mvulo shvula?” tson-o ketso laryü, a-le anyugun ka, “Hagun le mekesüo mehon senya nye, lo nkuo temi nme nkhin nya; tson kethyü gü mvule hagun shün ai gwa letse kethyü rüchün lo.”

¹⁵Lo tsükatsü temi dan le temi nmele yhun soryü titse kethyü nrin bin laryü temi tsüdan le anyugun npvü a-nyunki Johan rüla rüchün gungü a-le Khrista gü le nmvuyo tse rünchün kü lola.

¹⁶Ai Johan le anyugun aphu ka, “Ale zü nyu hagun baptaiz thyü keshüi nti, ai anyeki kegon nme le asiki ryü zhü, ale a-phaje kephinron-e shwü kethyü tho-e thyülo kümvu; lo a-le Kenshün Kapu lo mah nyu hagun baptaiz thyü ti.

¹⁷A-le nryü le a-ben nyu bin nyo, lo a-le a-bün whün shünshvu lati, tson-o a-shyetsin ju pe a-süsen nyu shü loti; ai shyebün ju we pe nmhülo hü kemvu mah nyu shü lati.”

¹⁸Tson-o a-le thu keyhun jo kechon sen-o jolokegwa zo pe temi dan hi.

¹⁹Ai Johan le Herod raja gü le a-sikezen gü nu Herodia genyue lo Herod le thyüzü kemvu kethyü aphu genyu a-kemeni shü.

²⁰Lo thagwakemvu tsüdan kethyü ntimvule a-le Johan ten pe doka nyu shüla.

²¹Tsükatsü temi tsüdan aphu baptaiz thyülo ntsin Jisu ko baptaiz thyülo njüo kehi thyü bin laryü tsang le ko shü.

²²Tson-o Kenshün Kapu gü le nsu hontse a-ge tsüryü, lo tsangge tha khwen nme le, “Nle Anyu asogü le, nle akenyü tsin gü le,” tson kethyü zo gunryü.

²³Lo Jisu le me senthyü so kezhü ka a-nnyu kelo chen shenryü laki kho thyüla; lo temi kerüchün hontselo a-le Josef nyu, Heli nyu,

²⁴Mathat nyu, Janai nyu, Josef nyu,

²⁵Matathia nyu, Amos nyu, Nahum nyu, Esli nyu, Nagi nyu,

²⁶Maath nyu, Semein nyu, Jasek nyu, Joda nyu

²⁷Joanan nyu, Rhesa nyu, Zerubabel nyu, Sheathiel nyu, Neri nyu

²⁸Melkhi nyu, Addi nyu, Kosam nyu, Elmadam nyu, Er nyu,

²⁹Joshua nyu, Eliezer nyu, Jorim nyu, Mathat nyu, Levi nyu,

³⁰Simeon nyu, Juda nyu, Josef nyu, Jonam nyu, Eliakim nyu,

³¹Melea nyu, Mena nyu, Matatha nyu, Nathan nyu, David nyu,

³²Jesse nyu Obed nyu, Boaz nyu, Salmon nyu, Nashon nyu,

³³Aminadab nyu, Admin nyu, Arni nyu, Hezron nyu, Perez nyu, Juda nyu,

³⁴Jakob nyu, Isak nyu, Abraham nyu, Tera nyu, Nahor nyu.

³⁵Serug nyu, Reu nyu, Peleg nyu, Eber nyu, Shela nyu,

³⁶Kainan nyu, Arfaksad nyu, Shem nyu, Noah nyu, Lamek nyu,

³⁷Methusila nyu, Enok nyu, Jared nyu, Mahalalel nyu, Kainan nyu,

³⁸Enos nyu, Set nyu, Adam nyu, Sunggigü nyu.