Read Southern Rengma Naga LUK 4 Bible Online

LUK 4 - Southern Rengma Naga bible

LUK 4

¹Tsüselo Jisu le Kenshün Kapu no a-sü pvü tse Jordan züri nken ryü zhü; tsontsin kapu gü no a-nsü zen-o tehen nyu gü,

²jon henzi Satan no a-semen. Lo tsügwünkho tsü aphu a-le thame tyü mvu; lo jon tsü pen kela siki we a-le nnyon la.

³Tsontsin Satan le a-ka, “Nle Sunggigü Nyugü yatselo, tso higü ka jozo shüo no tensü ngwalo chi!”

⁴Tsontsin Jisu le a-ka, “Temi le tensü genyu nti rhünlo hümvu, tsonkethyü thu njü,” tsonla.

⁵Tsüselo Satan le a-zen-o ketetso nme ge nsinlo-o kazü nyu rünyi keda aphu gwüngwa nme thyü tsin pe a-hi.

⁶Tson-o Satan le a-ka, “Ale nno hi aphu so keda thyülo kegwa kekvu lo hinyu tha kegwa aphu pe ntsü lati; kechamvule tha hidan hi aphu pe atsü laso, lo ale pe akenyünyu tsülo gwa kela si genyu.

⁷Tsügenyu nle nkhün tsügü a mhundyü nyu arüshvu yatselo hi aphu pe nhon thyü lati!” tsonni.

⁸Tsüselo Jisu le a-ka, “Nle n Npugü Sunggigü rüshvulo, lo a-lo nti thyülo mvulo shvu,” tsonkethyü thu njü nyo.

⁹Lo tsüsika Satan le a-zen-o Jerusalem ki gü a-no Jerusalem Kershvuka pesun ge binlo-o a-ka, “Nle Sunggigü Nyugü yatselo nle hige hiche tsü chi.

¹⁰Kechamvule, ‘A-le ngenyu a-jolonyu nishüo anyugun no n ntsenlo ti,’

¹¹lo nno tso ge chetsü njon nthyü mvulo nrün genyu anyugun ben pe nkhi pen loti, tsonkethyü thu kenjü genyu.”

¹²Tsüselo Jisu le a-ka, “Nle Npugü Sunggigü semen loshvu, tsonkethyü zo pe bin la sele,” tsonla.

¹³Lo Satan le a-semen nrün pe a-semen penla ntsin a-khelao tinla.

¹⁴Tsüselo Jisu le Kapu gü kekvu nyu rani sen-o Galil kazü nyu gunla. Tsükatsü tsükho liki hiki kebin temi aphu a-rüla zo nyhun gunla.

¹⁵Lo a-le anyugun sinagog ka nyu me senthyü lo me-e a-shwen kü.

¹⁶Tson-o a-le nduka gü yhun kethyü rünyi Nazaret nyu tsü ryü. Lo Sabbath jon nyü a-jvü hontse a-le sinagog ka nyu yülo, lo jo nme swü titse solo.

¹⁷Lo mele sidyükeshagü Isaya lesü khipe a-ben nyu shü. Tsüselo a-le lesü tsügü he yügü, jo hidan hi hyulo:

¹⁸“Npugü Kapu le age bin; lo a-le ano jolokegwa gü pe kendinyu senthyü lotse lo a-yhükepo nyu no tha hyu lotse kethyü genyu akejü lo. A-le ano do kethyünyu ho nishü nrün, lo meno nshwen kehünyu no bwenlo nrün jo gü zope mezen lotse

¹⁹tson-o Npugü le kenilo nrün gü chen zope me hizin shülo tseo anishü!”

²⁰A-le tsonshüo lesü hekeminlao pe me chülo thyü kehü gü tsülao bin tinla. Lo tsükatsü sinagog kanyu kebin nyu aphu a-nri ryü bin.

²¹Tsügenyu a-le anyugun ka, “Nthu hagun le sha kebin ka ketsin lesü jo higü le pen laso.”

²²Tsontsin anyugun aphu a-mün nyu chwikeryü temi shwikenjün jo tsügenyu anyugun dun thyüo a-shwen sola. Tson-o anyugun le, “Higü hile Josef nyugü kemvu ole?” tson.

²³Tsüselo a-le anyugun ka, “Dawa kesha gü, nle n npvü nkenilo chi, tsonkethyü mele zo kehü hontse hagun ko aka zo ti; tsüntimvule hagun le ahi no, nle Kapernaum nyu thyükeshü, tsüdan tsü nkazü nyue thyüshü chi, tson-e ti.”

²⁴Lo a-le, “Ale hagun ka zo tsentsü shüti le, sidyükeshanyu nme-e a-npvü a-sunphen nyu we me le a-no gwa letse hü mvu.

²⁵“Tsüntimvule ale hagun ka zotsentsü shüti; nduka Elia phou ka Israel nyu dan nyu maginyu kechon le bin hü tsükatsü chenshen-o shye tsero tsangkenri khinla; tsüselo kazü tsünyu chenda thyü pe ketetsin thyü ryü.

²⁶Ai Elia nipe Sodin kazü nyu Zarepta rünyi nyu maginyu nme ka nyu keshü nyeki magi kechanyu nme-e kanyu shü mvu.

²⁷Lo Elisha sidyükesha phou ka Israelnyu dan nyu nyun le ketyünyu kechon le yhun hü, ai Sirianyu Naman tsekethyü gü nyeki, kechanyu nme-e thyü kenshün shü shwimvu.”

²⁸Tsontsin sinagog kanyu kebin nyu aphu jo tsügü sha pe anyugun kenyü mvusalo,

²⁹Tson-o anyugun le phen nyu tsü a-hüla, tson-o a-sü zen-o anyugun le rünyi thyü kebin rincho a-khin pvü din kethyü nme ka gun, kechamvule anyugun le a-kewhen pe tsünyu shüla kenyü genyu.

³⁰Ai a-le anyugun dan nyu tsonchü chwio a-npvü a-kenyü ki gunla.

³¹Tson-o a-le Galil kazü Kapernaum rünyi nyu nshyeryülo, tson-o a-le Sabbath jon nyü me senthyü.

³²Lo anyugun le a-le anyugun senkethyü jo genyu anyugun dun thyüla; kechamvule a-jo le kvusa kethyü genyu.

³³Tsükatsü nshünkemvu kapu kezen nme le sinagog ka nyu bin-o nra sen-o,

³⁴“Ei, Nazaretnyu Jisu, ngun kengüo nyu thyü mon? Nle agun nkela titse ryü ole? Nle segü yo ale nsha; nle Sunggigü temi kenshün gü le.”

³⁵Tsontsin Jisu le a-kesüo, “Nle matse tinla, tson-o a-nyuki tinchwila chi!” tsonshü. Tsüselo tero gwakemvu gü tsüle temi gü pvükelilao a-npvü temi tsügü nthyünnyü simvu tse a-ge chwila.

³⁶Tsügenyu temi aphu a-dun thyüla, tson-o anyugun khinyunyu ka, “Temi higü jo hile nyu tsethyü hihontse la? Kechamvule temi higü hile kekvu sen-o zen mvulo keho johoshü pe nshünkemvu kapu dan tsü shülo anyugun le a-jo zen-o tinla kehü hile.”

³⁷Tsüselo tsü temhun rünyi thyü kebin aphu a-rüla zope kesü thyülo la.

³⁸Tsüselo a-le sinagog kanyu chwilo njüo Simon kanyu yü, tsükatsü Simon nu a-jvü le rüka sabin. Lo anyugun le a-rüla zo pe Jisu hishü.

³⁹Tson-o a-le tsügi khoka bin-o kerüka tsü kesüshü ntsin, a-le rüka mvula. Tson-o tsügi le whütse sogü anyugun lothyü tinla.

⁴⁰Lo yhüko che nrün münki we temi kehokenyü nyu aphu zen-o a-ki ryü; lo a-le aben shwen pe anyugun ge shüo anyugun aphu thyü ngwashü.

⁴¹Tsükatsü tero gwakemvu dan le temi kechon ge chwiryüo nra nhyuo, “Nle Sunggigü Nyugü le,” tson. Ai anyugun le a-le Khrista gü letse kethyü shalo kela genyu a-le tsüdan kesülao anyugun no jozo mvula.

⁴²Lo tsangbenlo ntsin a-le mele hü kemvu bin nme ki gun, tsontsin temi dan me le a-fü ryüo a-tilo tson-o anyugun le a-khin zen bin nyü sola.

⁴³Ai a-le anyugun ka, “Ale Sunggigü jolokegwa pe rünyi kechanyue senthyü shü mvulo shvu; kechamvule tsügenyu a nikeshü genyu.”

⁴⁴Lo a-le tsükitsü le Galil kazü nyu me senthyü kehü gwünzin.