Read Southern Rengma Naga LUK 5 Bible Online

LUK 5 - Southern Rengma Naga bible

LUK 5

¹Lo temi dan le a-taryü sen-o Sunggigü jo nyü kebin ka a-le tsükatsü Genesaret züda khoka bin,

²lo run kenyhun le tsünyu kebin a-le hyulo; ai tsehü keten nyu jule gü anyugun joh ketsükela bin.

³Lo run tsühvu nme le Simon run, a-le yügü tsü jen sen-o zi nyunki yülo lotse sola.Tson-o a-le yügü run nyu dunlo njüo temi dan senthyü.

⁴Tsüselo a-le jozo kheshüo Simon ka, “Run jen sen-o a-kentsun ki yülo, tson-o joh pe tsehü jonshü shwilo tseshü.”

⁵Tsontsin Simon le zoshü, “Npugü, agun le tsangkezün jon aphu agun yhenthyü le, ai thame hyulo mvula sele; ai n jo genyu ale ajoh kewhe shü tile.”

⁶Lo tsonshü ntsin joh nyu tsehü kechon henlo, anyugun joh-e nrhenla nrün hontsela.

⁷Tsügenyu anyugun le benze-o anyugun pvünnyu run kecha ki kehünyu ju no ryüo anyugun kechelo lotse tsüdan koso. Lo tsüdan le ryüo joh nyu tsehü jün pe run kenyhun ka süshü ntsin run tsüle zü nyuki chetsü zhüla.

⁸Ai Simon Pitor le tsü hyushü ntsin nkhün tsügü Jisu phanyu khosenlo-o, “Hire, Npugü, Nle a nrhi tinla lo, ale kemunyu genyu!”

⁹Kechamvule anyugun le tsehü kechon ki ten kelo genyu Simon-e lo a-zen kehünyu aphu,

¹⁰lo Simon zen-o kerhün kehü Zebedi nyu Jakob lo Johan hvue sin tse anyugun dunthyü kela genyu. Lo tsükatsü Jisu le Simon ka zo-o, “Nle nshvu nyalo, nthu gerhonyu nno temi ten tinla ti!”

¹¹Tsüselo anyugun le run zen-o zü seki chwiryülo ntsin anyugun kanyü aphu khelao a-sithen tinla.

¹²Tsüsika Jisu le rünyi nme nyu kebin ka nyun le tyüsa kehünyu nme ko tsünyu bin-o, a-le Jisu hyushü ntsin nkhüntsüla; tson-o Jisu ka a-kapu rüshvuo, “Npugü nle nkendo yatselo athyü kesherhün shülo ti.”

¹³Tsontsin Jisu le a-ben shwen pe temi tsügü ge shüo zo, “A kendo le, nkeho no gwalo chi!” Tsonshü ntsin a-ge nyun le ketyü tsüle ndi whütse la.

¹⁴Tsükatsü a-le temi tsügü no tha tsülo pe temi nme-e ka zo nyalo tseo, “Nkaki gun gü nmin khipe peshügü hishü chi, tson-o anyugun no shalo nrün genyu tejvü nyu nthyü nshünlo kela kerüshvu tha Mosa le zo kenjü jvü tsü thyüla chi.”

¹⁵Ai a-rüla tsü zo kemvu gü mvule zo chon kvüla, tsügenyu temi danda le, a-khwenyü titse, lo a-kehokenyü thyü n gwalo titse ryüo kequenlo.

¹⁶Tsüselo a-le ketu sen-o temi nme-e hü kemvu bin ki gü tinla.

¹⁷Lo khenyüme Jisu le me senthyü kebin ka, Galil lo Judia lo Jerusalem rünyi aphu nyu Farisinyu lo tejvü keshanyu ju le ryüo a-kho lukipon hikipon hunpvü bin. Lo kehokenyü thyü kesherhünlo kegwa kekvu le a-zen bin.

¹⁸Lo tsükatsü temi dan me le no nme ge terothonyu nme pen ryü; tson-o temi tsüdan le temi tsügü pen yügü kanyu ki Jisu mhundyü ka shü titse so.

¹⁹Ai temi chonri tsin kela genyu a-khisen yü kelo tson fü kendila, tsügenyu anyugun le ka ge külo-o Jisu ntsen ka bophe-o temi gü lo no kesin pe Jisu mhundyü ka hoshü.

²⁰Tsüselo a-le a-pen keryü dan ketenyen hyulo njüo temi tsügü ka, “Nkemu jvü pe ntsü la sele nye!” tsonshü.

²¹Tsüselo lesü keshatsin nyu lo Farisinyu dan le kebuo kenthon-o zo, “Sunggigü nkhin kehü temi higü hile temi nyutse kethyünyu nme la? Sunggigü kemvu we segü le me kemu jü pe me tsülo gwa tila?”

²²Ai Jisu le anyugun kerüchün shalo njüo anyugun ka, “Hagun le nyuthyüo hagun nyunki tsü hontse kethyü rüchün hü nla?

²³‘Nkemu jü pe ntsüla sele,’ tson kezo, lo ‘So-o tsonchü lo chi,’ tson kezo, jo tsühvu digü le nne kvu la.?

²⁴Ai temi kemu jü pe tsülo kegwa kazü hinyu Temi Nyugü kekvu le kebin, hagun no shalo kenyü genyu.” Tson-o a-le terotho gü ka, “Ale nno so-o, njü sen-o nkaki gunlo chi, tson zoshü le!”

²⁵Tsonshü ntsin a-le anyugun mhundyü ka so-o a-jü khisen-o Sunggigü shwen-o a-kaki gunla.

²⁶Tsügenyu temi aphu anyugun dunthüo Sunggigü shwen sola; lo anyugun le nshvuo, “Nthu ngun le tha ketetsin nme hyu laso,” tsonso.

²⁷Lo a-le hidan hi thyü kela siki chwizhü laryü a-zen le Levi tsekethyü khajana keshvu gü le khajana keshvu kanyu bin-o hyulo, tson-o tsügü ka, “A sithen lo re,” tsonshü.

²⁸Tsüselo temi tsügü le a-tho aphu khelao a-sithen tinla.

²⁹Tsügenyu Levi le a-genyu me zen gü a-kanyu ho; lo khajana keshvunyu kechon lo me kechanyu peha tse gü a-kanyu anyugun ho.

³⁰Tsükatsü Farisinyu lo lesü keshatsin nyu jule a-le senthyükelonyu ge kenyo-o, “Hagun le nyuthyüo khajana keshvunyu lo kemunyu zen-o tyütsü hü nla?”

³¹Ai Jisu le anyugun ka, “Kesherhün nyu le dawa keshanyu zengü thame kethyüi ndi, ai dawa keshanyu le kehonyu genyu le.

³²Ale kemunyu no a-nyunkelulo nrün genyu a-me kentsen nyu koti tse ryü mvu.”

³³Tsüselo anyugun le a-ka, “Johan le senthyükelo nyu dan we nyen lo kehithyü chonsa; lo Farisinyu kethen nyu jue tson, ai nle senthyükelo nyu ju we tyütsü kehü gwenzin hile la?”

³⁴Ai Jisu le anyugun ka, “Temi nme le tenu lolo-o me zen-o ho kethyü ka senhü gü le kebin ka a-sin nyu ju no nyen bin logwa le?

³⁵Ai anyugun dan nyu senhü gü zen tinkela gwünkho le ryüti, tsükatsü tsüdan le nyen ti.”

³⁶Lo a-le anyugun ka jokejvü nme zonishü, “Temi següe phikeshün ge peha rürhen sen gü phiren ge shüo nkhvü kesin hü mvu; tson yatselo a-keshün güe nrhen lati, lo a-keshü gü ge sürhen sen kegü güe phiren gü hontse mvu lati.

³⁷Lo temi nme-e vain zu keshün pe thyügi khin ren nyu shü hümvu; tson yatselo vain zu keshün le thyügi khin pvürhen lati, khin pvürhen lati, tson-o tsun tin lati, lo thyügi khin-e nkela hünyo.

³⁸Ai vain zu keshün pe thyügi khin keshün nyu shü mvuloshvu.

³⁹Lo temi nme-e vain zu when tsü bin-o a-keshün nnyüni hü mvu, a-le a-when güe no gwa letse hü nyo.”