Read Southern Rengma Naga LUK 7 Bible Online

LUK 7 - Southern Rengma Naga bible

LUK 7

¹Lo a-le zo hidan hi zopen pe temi nyetin nyu keshü siki a-le Kapernaum nyu gunla.

²Tsükatsü shüpahü tsiso kedanyu nme gonyu a-le sosa kehü nyu nme le ho-o si gü zhüla.

³Tsügenyu temi tsügü le Jisu rüla shalo ntsin Judanyu pelünyu peha nipe Jisu ki shüo a-no ryüo a-gogü si kenishülo tseo Jisu ka a-kenjü hi.

⁴Tson-o temi tsüdan le Jisu khoka ryülo ntsin anyugun kenjün hi tenge tseo, “Nle temi higü hi shwinjün shü züsa kethyü nmele.

⁵Kechamvule a-le temi sosa hünyo, tson-o a-le agun sinagog kae thyü pe agun tsü tse kethyü genyu,” tsonshü.

⁶Tsontsin Jisu le temi tsüdan zen gun. Tson-o gungü ka ti nrün le thonsari kemvu ka tsiso kedagü le a-pvünyu peha nipe a-ki shüo a-ka, “Npugü nle ryüo kenjün thyü bin nyalo; ale nno aka hensin nyu yüryülo kü mvu.

⁷Tsügenyu n ngükae nki ryü mvu laso; ai nle jo konme zoshüe agogü le gwalo ti.

⁸Ako kedanyu hensin nyu kehünyu nme, lo a hensin kie shüpahünyu le bin. Lo ale nme ka, ‘Nle gun nye,’ tsonshülo a-le ajo zen-o gun hünyo; lo kechanyu nme ka, ‘Ryülo,’ tsonshülo a-ko ryü hünyo; lo agonyu ka, ‘Nle tha higü hithyü shü re,’ tsonshülo a-ko tsüthyü pe atsü hünyo.”

⁹Jisu le jo tsü shalo-o, temi tsügü rüla sha pe a-dun thyüo, ranigü temi a-sithen kehü dan ka, “Hire, ale hagun ka zoshü ti, ale Israelnyu dan nyue a-ketenyen le hihontse kethyü keda hyu shwimvu!”

¹⁰Lo nikeshü dan tsüle gü ka tilo ntsin a-gonyu ho kebin gü tsüle gwalo kela hyulo.

¹¹Tsüselo a-le thonsari kemvu ka Nain tse kethyü rünyi nme nyu gun; lo a-le senthyükelo nyue lo temi danda nme ko tse a-sin-o gun.

¹²Lo a-le rünyi tsügü chwida khonni gunzhü ntsin mele kesinyu nme pen chwizhü; lo kesi tsügütsü le a-jvü nyuche gü, lo tsügi-e maginyu nme; lo rünyi tsünyu temi kechon le tenunyu tsügi zen chwizhü.

¹³Tsüselo Npugü le a-hyushü ntsin shwipe a-nyun gwamvuo tsügi ka, “Nle chü nyalo,” tsonshü.

¹⁴Tson-o a-le tsüdan khonni npha gü simin gü kepen khin kesü shü; lo simin gü kepen nyu le sun tinla, tson-o Jisu le, “Ponyu, ale nka zoshü le, nle soryülo chi!” tsonshü.

¹⁵Tsonshü ntsin sikela gü le so-o jozo sola, lo a-le khipe a-jvü tsü nila.

¹⁶Tsügenyu temi aphu nshvu sao Sunggigü shwen-o, “Sidyükeshanyu keda nme le ndan nyu soryü laso! Lo Sunggigü le ryüo a-temi nri bin laso!” tson.

¹⁷Lo a-rüla higü hi zope Judia kazü aphu nyu lo rünyi tsü khoki kebin aphu no sha gunla.

¹⁸Tsüselo Johan le senthyükelonyu dan le tha tsü dan tsü aphu pe a-ka zo küshü.

¹⁹Tsontsin Johan le a-le senthyükelonyu mihvu kozen ryüo tsühvu nipe Npugü ka shüo au no, “Nle ryü titse kehü gü le, le agun no kecha nme khwen bin tila?” tsonkethyü ketso lotse zoshü.

²⁰Tsügenyu temi tsühvu le gü, “Johan Baptist gü le ayi nipe nki shüle, a-le ayi no, ‘Nle ryü titse kebin gü le, le agun no kecha nme khweni bin tila?’ tson kethyü ketso shü lotse zoshü le!”

²¹Tsükatsü Jisu le, me kehokenyü, kethyükenyü lo gwakemvu kapu no nchün ndyü kehünyue kechon thyü kesherhün shü; lo a-yhütyü keponyu yhütyüe kechon thyü ngwa shü.

²²Tson-o a-le tsühvu ka, “Hai gungü hai le kesha kehyu aphu pe Johan ka zoshü chi; a-yhütyü keponyu le tha hyulo bin laso, terotho nyue tsonchülo bin laso, nyun le ketyünyue thyünshünlo bin laso, a-nyetin gwakemvunyue thakhwenyülo bin laso, kesinyue thyü nrhünlo bin laso, Jolokegwa gü zope kendinyu hishü bin laso.

²³Lo temi lihigüe age kenyunhvu mvushü kethyü gü le jochü kepvü tsin!”

²⁴Tsüselo Johan lothyü keryü ju le tinla ntsin, a-le Johan rüla pe temi dan ka zo titseo, “Hagun le tehen nyu nyu nri titseo chwila? Tsangkenbu le whünkeni kehü nbo bin ole? Le hagun le Nyu nri titseo chwila?

²⁵Temi a-phi a-nya kegwa sen kehü nyu ole? Temi a-phi a-nya a-min ketsen sen kehünyu lo ketegvüo yhun kehü nyu le kedanyu ka nyu bin kehü le!

²⁶Ai hagun le nyu nri titseo chwiryü la? Sidyükeshanyu ole? Ele, tsekethyü zolo gwa!

²⁷Lo tsüntimvule sidyükeshanyu nyeki gonkvu kethyü nme le, nduka a-rüla thu pe bin kenjü le : ‘Hire, nmhu kehyu mhundyü ale lilonyu nme nishü ti; lo a-le nmhundyü ki ntson ketsü ti, tson kehü gü tsü le a-le.’

²⁸Ale hagun ka zoshü tile, tenunyu ge yhun chwikeryü dan nyu Johan nyeki keda nme-e yhun soryü mvu; ai Sunggigü keda nyu we keshe güe a-nyeki gon.”

²⁹Lo temi aphu lo khajana keshvunyu ju aphu Johan jo shao Johan Baptism pe anyugun baptaiz thyülo njüo, Sunggigü le njü le tse la.

³⁰Ai tejvü kesha ju lo Farisinyu dan we anyugun baptaiz thyü mvuo anyugun npvü Sunggigü jo gü zenlo mvu laso.

³¹Jisu le zo sin-o, “Ano ntsokanyu keyhun hi lope nyu zen kendyü shülo gwa tila? Nmvue anyugun le nyu hontse kethyü dan me la?

³²Anyugun le ntsenyu le hakethyü bin nyu khinyunyu ka, ‘Agun le khüli khun pe ha hi, ai hale dathyülo mvu laso.’

³³Tsühontse Johan me baptaiz kethyü gü le keryü le tensü tyümvu, lo vain zu ai tsümvu, laryü hagun le a-ka, ‘A-le tero gwakemvu gü zen hünyo,’ tsonla.

³⁴Lo Temi Nyugü le ryü tha tyütsü laryü, hagun le a-ka, ‘Hire, ketyünyun, vain zü ketsü nyun nme, khajana keshvunyu, lo kemunyu pvü gü!’ tsonla.

³⁵Tson yatse-e tsü lo kelonyu aphu Sunggigü thakesha le ketsin letse kethyü pe hishü laso.”

³⁶Tsüselo Farisinyu nme le a-zen ho nyüo a-ko so. Lo a-le Farisi gü kanyu yügü tyütsü titse dunlo.

³⁷Tsükatsü rünyi tsünyu tenunyu kemunyu nme le bin hü, tenunyu tsügi le a-le Farisigü kanyu tyütsü titse kebin shashüo alabaster terzü khin nme sen ryüo, a-sikipon bin-o chü bin.

³⁸Tson-o a-yhüphu che pe Jisu pha nye nye tse bin, tson-o tsüsiki we a-shün pe a-pha shonlao a-pha nbo, lo a-le terzü lope a-pha nyen tsebin.

³⁹Tsüselo Farisigü a-no ho lotse a-ko keshü gü le a-npvü a-nyunki a-nthon-o, “Temi higü hile sidyükeshanyu nme yatselo tenunyu a-kesü kebin gi hile kemunyu nme tsekethyü shalo zü le la!” tson bin.

⁴⁰Tsontsin Jisu le a-ka zo, “Hire, Simon, ale nka jo nme zonyü bin nle!” Tsontsin a-ko, “Zoshülo, senkethyü gü,” tson.

⁴¹Lo Jisu le, “Raka pe me nkhün kehü nyu nme le temi mihvu le a-pu pvü bin; au nme le doli tsi pvü, lo nme le henpvün tse pvü bin.

⁴²Temi tsühvu le tha lope tepu tsü thyü loho kela genyu a-le tsühvu shwinjüo tepu tsü gwün kü pe au tsüla. Kha, tselo temi tsühvu digü le a-shwi pe a-sherhün kvu tila?”

⁴³Simon le a-ka zo, “Kechon gwün pe a-ketsü gü le ti ado.” Tsontsin Jisu le a-ka zo, “Nko rüchün sao zo laso.”

⁴⁴Tson-o a-le tenugi kipon ranigü, Simon ka zo, “Nle tenunyu higi hi hyu bin amon? Ale nka nyu yükeryüka nle zü pe ano apha sü mvu; ai tenunyu higi we a-yhüphu che pe apha nye-o a-shün pe shonle.

⁴⁵N we a nbo shwimvu, ai a-we ale nkanyu yüryü ntsin apha nbo bin-o ntsoka ti.

⁴⁶N we terzü pe ape kae shümvu, ai a-we terzü pe a-phae yünshü.

⁴⁷Tsügenyu hire, ale nka zoshü ti, a-kemu gonri kehü tsü jü pe a-tsü laso; a-le aso arüno sa kethyü genyu. Ai kerho jü pe ketsü gü le meso rho.”

⁴⁸Tson-o a-le tenunyu tsügi ka, “Nkemu jü pe ntsüshü la sele nye,” tsonshü.

⁴⁹Tsüselo anyugun a-zen-o tyütsü kebin nyu dan le kenthon-o, “Temi kemu jü pe tsüshü kehü higü hile temi nyu tsekethyü nyu nme la?” tson sola.

⁵⁰Tsüselo a-le tenugi ka, “N ketenyen le nkenilo la sele nye; ndyüben-o gunlo!” tson.