Read Southern Rengma Naga LUK 8 Bible Online

LUK 8 - Southern Rengma Naga bible

LUK 8

¹Tsüselo jon thonsari kemvu ka Jisu le Sunggigü keda jolokegwa zo sen-o rünyi nyida nyue lo nyishwe nyue me sentyüo ntsü sen-o liki hiki gun.

²Tsükatsü tseryü kenyhunche dan-e lo nduka tenunyu tero gwakemvu no semen zen-o hotse-o gwakelonyu dan me-e azen gun; lo tenunyu tsüdan tsü le Magdalin Maria tsekethyü a-ge tero gwakemvu tsenyü le chwikela gi, lo Herod gogi,

³Chuza nu Joana, lo Susana, lo anyugun kanyü sen-o nnu pe anyugun tsü kehü kechanyu kechon ki-e hü.

⁴Lo temi danda nme le rünyi aphu ka ryüo kequenlo ntsin a-le jokejvü zo-o anyugun senthyü:

⁵“Ntsi kegwünnyu nme le a-tsi gwünshü titseo tsüryü. A-le ntsi gwünshü ntsin peha le tson nyu chetsü la, tson-o meno me pha pe kedüla, lo tegü no jüntyü la.

⁶Lo peha le tsoshethun ge chetsüla; tson-o tsüchwiryü ntsin rügu la, kechamvule nnyon le rüpvüri kethyü genyu.

⁷Lo dan me le tsehü pvü nyu chetsüla, tson-o tsehü zen kentsin yhun soryüo tsehü le gon lo ntsin anyugun zeshvu la.

⁸Ai kechanyu dan we kazü kegwa nyu chetsülo-o yhu soryüo a-sha tsi nshalo.” Lo Jisu le jozo tetso-o, “Temi lihigüe a-nyetin le bin-o nyülo kenyü nyu tsünyu no nyülo chi!” tsonla.

⁹Tsüselo senthyükelonyu ju le jokejvü tsüle a-kon le nyu yo tsekethyü ketso.

¹⁰Tsontsin a-le anyugun ka, “Hagun we no Sunggigü keda jo kentsun dan shalo lotse shü laso; ai kechanyu ka we jokejvü sen-o zo hünyo; kechamvule tsüdan no nri-e hyulo ho, lo nyü bin-e shalo mvula nrün genyu.

¹¹“Lo jokejvü kon le hile: shyetsin tsü le Sunggigü jo gü.

¹²Lo tson nyu chyetsü kela nyu dan tsüle jo gü nyülo ntsin satan le ryüo anyugun no tenyenlo-o kenilo mvu nrün genyu anyugun nyun ki jo gü se sentin la kehünyu le.

¹³Lo tsoshethun ge tsükelanyu dan le, jo gü shalo ntsin anyugun sherhün sa-o zenlo; ai anyugun men ndio gwüngwa nme ka nti tenyen bin-o kesemen nme le keryü nyü ranila kehünyu le.

¹⁴Lo tsehü dan nyu tsükelanyu le, yhunsoryüo, ntso ntsenyü ka sen kehü kera lo a-kenya lo a-kenyü yhüdyü kethyü dan no a-ta kemhenlao a-sha nshalo mvula kehü nyu le.

¹⁵Lo kazü kegwa nyu tsükelo ntsi; dan tsü we jo tsü shalo-o joketsin lo a-nyun njüo tsü sen tsekho gü tilo-o a-shese lamvuo a-sha nshalo kehünyu le.

¹⁶“Lo temi nme-e mah nben pe thano rün pe bin la hümvu, nmvue khipe no hensin ki shüla hümvu; ai kanyu keyünyu no tha hyulo nrün genyu pe mah kenben bin ge shü njü hünyo.

¹⁷“Kechamvule pe me tesha mvule tseo thame kekebu ndi; nmvue gingvü chwiryüo me teshashü mvule tseo tesütebu kebin nme-e kendi genyu.

¹⁸“Hagun le nyü petsü salo titse kethyü hagun yhen thyü bin lo chi; kechamvule temi lihigüe kebin gü khipe a-tsü sinshü ti; lo temi lihigüe kendi gü we, a-le bin le tse rüchün kehü a-ben nyu kebin tsüe khisen ni tinla nrün genyu.”

¹⁹Tsüselo Jisu a-jvü lo a-sikezen nyu dan le a-ki ryü, tsükatsü temi chonri kethyü genyu anyugun le a-ki ryülo shvula.

²⁰Ai mele a-ka, “Njvü lo n sikezen nyu dan le n zen kehyu shü nyüo ryüo kamhun ki bin nle,” tsonshü.

²¹Tsontsin a-le anyugun ka, “Temi lihigüe Sunggigü jo sha-o thyü lo zen kehü nyu, hidan hile ajvü lo asikezen nyu dan le,” tsonla.

²²Lo khenyüme a-le senthyükelonyu dan sin tse run nme nyu yülo ntsin a-le anyugun ka, “Ngun züpere lukipon chwila tile je!” Tson-o anyugun le run jen-o tsonchü shü.

²³Ai anyugun le gun kezhü ka, Jisu le nngüo zhü tinla; lo tsükatsü zi nyu tsang nbu pe ketetsin thyü ryü la; tson-o zü le yüryüo anyugun run sülo gü zhü kela hyulo-o anyugun le nshvu sa lola.

²⁴Tsüselo anyugun le a-ki gü a-kesun-o, “Npugü, Npugü, n gun le sigü zhü laso!” Tsüselo a-le sogü tsangkenbu terhi lo zükeda tsü kesü shü ntsin; tsü le ketetsin thyüsin mvulao nyen tsela.

²⁵Tsüselo a-le anyugun ka, “Hagun ketenyen le dikipon tinla ola?” Tsügenyu anyugun le nshvu lo anyugun dunthyüo khinyunyu ka, “Tsangkenbu lo züda kae tha zoshülo tsüdan-e a-jo zen kehü hile temi nyu tsekethyü nyu layo!” tsonso.

²⁶Tsüselo anyugun le Galil mhundyü kipon Gerasin nyu kazü nyu gunlo, lo a-le kesinki chwiryülo ntsin rünyi tsünyu tero gwakemvu no nchün ndyü zen kehünyu nme le chwiryüo a-zen ketenolo.

²⁷Lo temi tsügü tsü le a-phi a-nya senmvu lo sika nyu a-me kanyu bin mvu kela le jon thon sala.

²⁸Tsükatsü a-le Jisu hyushü ntsin nra sen-o a-mhundyü ka nkhün tsügü zhü tinla, lo a-le nra a-yhenthyüo, “Ketetsotsin gü Sunggigü Nyugü Jisu, ngun kengüo nyu thyü mvuloshvu la? Ale nka hibin nle, a nthyü nnyü nya lo!”

²⁹Kechamvule a-le temi tsügü ge nshün kemvu kapu tsüno chwila lotse zobin kela genyu. Kapu tsügü tsü le himhundyü kinyu a-semen zen hü, lo meno a-khwe bin hü, lo tegiron lo phakekhen pe a-pha khenpvü bin hü ai a-kephin tsü bosebore lao tero gwakemvu gü no a-hü zen-o tehen ki tsüla la tse kehü genyu.

³⁰Tsükatsü Jisu le a-ketso-o, “Nzan le segü la?” Tsüselo a-le, “Azan le ‘Legion,’ le!” kechamvule tero gwakemvu kechon le yügü a-ge binlo kela genyu.

³¹Lo anyugun le a-no anyugun nipe kentsuntsin ki shüla nyalo tseo a-ka hi sola.

³²Lo tsükatsü tebo dan me le kazüthun phaka tha hotyü bin laryü; tero gwakemvu dan le Jisu no anyugun hüshülo anyugun no tebo dan ka yükelo zoshü lotseo a-ka hi sola.

³³Lo a-le anyugun no tsünyu güla lotse zoshü. Tsüselo tero gwakemvu tsüdan le temi tsügü ge chwiryüo tebo dan ka yüla. Lo tebo dan tsüle tinkehü sen-o tsokhin seka yüo zi nyu chetsü gü anyugun nrheshvu küla.

³⁴Tsüselo anyugun kekhwenyu dan le tsü hyu shüo gü rünyi nyu lo low nyu kebin nyu kae zokü shü.

³⁵Tsügenyu anyugun le nyu thyüo tsühontse yo tsekethyü nri titse gun ; tson-o anyugun le Jisu ki keryü ka a-ge tero gwakemvu hükela gü le ntsenlo-o a-phi ben-o Jisu phaka kebin hyulo, tson-o anyugun le nshvu sala.

³⁶Lo tha tsüdan kehyu dan le temi tero gwakemvu gü no a-semen zen hüo thyü ngwa keshü rüla pe anyugun ka zoshü.

³⁷Lo Gerasin kho lukipon hikipon kebin dan le aphu tse Jisu no anyugun nken tinla lotse sola; kechamvule anyugun le nshvurilo kela genyu. Tsüselo a-le yügü run nme ka binlo-o tinla.

³⁸Lo a-ge tero gwakemvu le chwikelagü le, a-no a-zen hü lotseo Jisu ka hiso.

³⁹Ai Jisu le a-ni-o, “Nle n n-pvü nka ki gü Sunggigü le nshwi njün pe ditsüki thyüshü yo tsü rüla pe me ka zoshü lo.” Lo a-ko gü Jisu le a-ge tha keda ditsüki thyüshü yo, tsü zope me tesha küshü.

⁴⁰Tsüselo Jisu le nigun ryüzhü ntsin temi danda le anyugun sherhün sa tse ryüo a-zenlo; kechamvule temi tsüdan le a-le keryü khwe kehü genyu.

⁴¹Tsükatsü a-zan le Jaira tsekethyü nme ko ryü, lo temi tsü gü tsüle sinagog kanyu kedanyu nme; a-le nkhü tsügü Jisu phaka zhülo-o Jisu no a-kaki gunlo tse hiso.

⁴²Kechamvule temi tsügü tsü le a-nyu le tenunyu chentseryü kenyhunche nyu nme nti bin laryü tsügi le sila nrün hontselo kela genyu. Lo Jisu le gü kezhü ka temi le a-ta mimi tse ryü la.

⁴³Tsükatsü chen tseryü kenyhun tezi tsuntin kela tenunyu nme le hü.

⁴⁴A-le a-hon kebin aphu nke pe dawa keshanyu tsüe gwa loho kela nme le Jisu sikipon ryüo a-phishwe kesü shü ntsin, tezi tsunmvu whütsela.

⁴⁵Tsügenyu Jisu le, “Akesü keshü gü tsü le segü la?” tson-o ketso shü. Tsüselo me le a-kesü mvu letse küla ntsin, Pitor lo a-zen kehünyu dan le, “Npugü, temi le nta mimi tse kehü le la?” tson zoshü.

⁴⁶Ai Jisu le zoshü, “Temi nme le akesü shü laso; kechamvule age kekvu le chwikela ale shabin kela genyu.”

⁴⁷Ai tenunyu tsügi le kebu keloi kemvu so tson-o nshvu ndün tse ryü-o, a-le a-mhundyü nyu chetsülo njüo a-le nyu genyu Jisu kesüshü yo, lo a-le gwa whütselo kela rüla pe temi aphu mhundyü ka zoshü.

⁴⁸Tsüselo Jisu le tenunyu tsügi ka, “Anyugi, nketenyen le nthyü kesherhün shüla sele nye; ndyübenlo-o gunla chi!” tsonshü.

⁴⁹A-le jo tsü zo ketseka sinagog ka nyu kedagü ka temi nme le ryüo, “Nyugü tsüle si laso, tsügenyu nle senkethyü gü no nka ki gun kenjünthyü nya chi!” tson zoshü.

⁵⁰Ai Jisu le jo tsü shashüo a-ka zonishü, “Nle nshvu nya chi, tenyen binlo, tsonlo yatselo a-no gwa loti,” tsonshü.

⁵¹Tsüselo Jisu le gü ka tilo ntsin a-le Pitor lo Johan lo Jakob lo nyu tsügi a-pvü a-jvü dan nyeki temi kechanyu nme-e no a-sithen-o kanyu ki yü mvula.

⁵²Tsükatsü temi selo dan le tsügi chechü bin. Lo Jisu le, “Hagun chü nya chi; kechamvule a-le sila mvu, ai zhü bin nyo.”

⁵³Tsüselo anyugun le a-le sila seletse kethyü sha kebin genyu a-shwinyü sola.

⁵⁴Ai a-le a-ben sülo njüo, “Lünyu, nle soryülo re!” tson-o a-koshü.

⁵⁵Tsontsin a-kapu le niryülo-o a-le whütse solo; tsüka Jisu le me no tha khisen ryüo lünyu tsügi no tyülo lotse zoshü.

⁵⁶Lo tsühontseo a-pvü lo a-jvü au no au dunthyü sala. Ai a-le anyugun no tha higü hi pe temi nme-e ka zo nya lo tsela.