Read Southern Rengma Naga LUK 9 Bible Online

LUK 9 - Southern Rengma Naga bible

LUK 9

¹Tsüselo a-le tseryü kenyhun che dan ko kequenlo-o tero gwakemvu aphu hülo kegwa, lo kehokenyü thyü kesherhünlo kegwa kekvu hope tsüdan tsüshü.

²Tson-o a-le tsüdan no Sunggigü jo gü pe me senthyü lotse lo me kehokenyü thyü kesherhün shülo tseo anyugun nishü.

³Lo a-le anyugun ka, “Hagun le kegun ka thün, nmvue jola, nmvue tensü, nmvue pisa, hidan hi nme-e sen nyalo; nmvue bolaphi kenyhun-e ben nya.

⁴Lo hagun le ka lika hika yüe tsünyu bin gü hagun le tin nrün tilo.

⁵Tson-o temi lihigüe hagun zenlo mvu yatselo hagun le rünyi tsünyu tin kezhü ka tsüdan kemu tsin pe hishü nrün zansü hagun pha ka kenphüe kekhüshü la chi,” tsonshü.

⁶Tsüselo anyugun le gü rünyi aphu ka jolokegwa gü zope me hi, lo liki hiki me kehokenyüe thyü kesherhün kü gun.

⁷Tsükatsü Herod rajagü le jo tsü aphu shalo njüo a-nyun keyhun kerun sola.

⁸Kechamvule temi peha le Johan le kesinyu dan nyu rhünni soryüla sele tse, lo peha le Elia le nigun ryü bin nle tse, lo kechanyu le nduka sidyükeshanyu dan nyu nme le rhünni soryü bin la sele tse zo kehü genyu a-nyun keyhun kerun lola.

⁹Tsügenyu Herod le zo, “Johan we ale a-pe gwen laso; lo ale a-rüla aphu shakela higü hile temi nyu tsekethyü nme yo?” Tson-o a-le Jisu hyushü nyü sola.

¹⁰Tsüselo apostel nyu dan le ni keryü ka anyugun le tha thyükelo rüla pe Jisu ka zoshü. Lo a-le anyugun zen-o rünyi nme Betsaida tsekethyü ki gunla.

¹¹Ai temi kechon le tsü shashüo a-sithen ryü. Tsontsin a-le tsüdan gunkeryü shwi pe a-sherhün-o Sunggigü keda rüla zope anyugun hishü; lo a-le anyugun kehokenyüe thyü kesherhün kezü nyu thyü kesherhün shü.

¹²Tson-o tsangkeben jon güzhü bula ntsin tseryü kenyhun che dan le a-ka, “Nle anyugun no gü rünyi nyue lo low nyue me kanyu zhülo, lo a-pvü a-gin-e fülo nrün genyu anyugun nishüla chi; kechamvule ngun le temi kendi bin ki kehü genyu,” tsonshü.

¹³Ai Jisu le anyugun ka, “Hagun anyugun ginthyülo chi!” Tsontsin anyugun le, “Ngun le tensü pvü pvün, lo tsehü kenyhun nyesin sen hü mvula so; agun no gü temi hitsü laki genyu tha heilo tse ole?”

¹⁴Kechamvule temi yie pvün laki le kehü genyu. Tsontsin a-le senthyükelonyu dan ka, “Hagun le anyugun no a-dan dan thyüo temi henpvün pvün no dunlo lotse zoshü chi,” tsonshü.

¹⁵Lo anyugun le a-jo zen-o temi dan no tsühontse dun külo.

¹⁶Lo a-le tensü pvün lo tsehü hvu khisenlo njüo nyi sogü tsangge nrilo-o jochü shü, tson-o boshwenlo; tsüselo pen gü temi dan kenjün shü lotseo pe a-le senthyükelo dan tsüshü.

¹⁷Tson-o anyugun le tsü tyü pe anyugun ginnyü külo, tsüselo tyü kensen khü kequen shü ntsin khvütsü tseryü kenyhunche kesü khülo.

¹⁸Lo gwüngwa nme ka JIsu le me kendi bin ki hi kebin ka a-le senthyükelonyu dan ko a-zen hü. Lo tsükatsü a-le anyugun ka, “Temi le alope segü le tse hü nla?” tson -o anyugun ketsoshü.

¹⁹Lo anyugun le a-ka, “Johan me baptaiz thyü kehü gü letse, lo peha le Elia letse, lo peha we nduka sidyükeshanyu nme le rhünni ryü bin nle tse zo hünyo,” tson.

²⁰Lo Jisu le anyugun ka, “Tsonlo hagun we ale segü letse hü nla?” tson-o ketso. Tsükatsü Pitor le a-ka, “Nle Sunggigü Nyugü Khrista gü le.” tsonshü.

²¹Tsüselo a-le anyugun no jo tsü lope me ka zo nyalo tseo anyugun khin tenge tseshü.

²²Tson-o anyugun ka, “Temi Nyugü le kenjünthyü pe ketetsin thyüti, lo pelünyu ju, lo peshünyu ju, lo lesükeshatsin nyu ju no a-nkhinla njüo a-dushvula ti; lo a-le jonshen nyü rhünniso lati,” tsonshü.

²³Lo a-le anyugun ka, “Temi lihigüe a sithen kenyünyu, tsünyu no a-npvü a-kekhenilo-o khenyütsen a-krus pen-o a sithenlo.

²⁴Kechamvule temi lihigüe a-npvü aphu ntsen pe a-hon thyülo nyü kehünyu le a-le tsü nmhen lati; ai temi lihigüe agenyu a-phou nke kelanyu le a-le tsü ntsen pe a-hon thyü lo nrün genyu.

²⁵Lo temi nme le kazü aphu pe a-hon thyükelogüe a-phou nke, nmvue nmhenla lo a-le nyuchwilo tila?

²⁶Lo temi lihigüe arüla lo ajo zokejala kehünyu Temi Nyugüe a-zan kechwi lo a-pvü zankechwi lo tsangge lokethyü kenshünnyu zankechwi sen tsü keryü nyü temi tsünyu rüla zo keja lati.

²⁷Ai ale hagun ka a-ketsin zo shüti, hika kebin nyu peha le Sunggigü keda thyü keryü hyu kemvuthen si loho tsekethyü dan me le bin nyo.”

²⁸Lo tsügü zokela sika a-le Pitor, Johan lo Jakob nyugun zen-o kehithyü titseo kazüthun ge nsin.

²⁹Lo a-le kehithyü kebin ka tsü a-mhun le a-kecha thyü sala, lo a-phi a-nyae chon pe shweshwe tsela,

³⁰Lo tsükatsü mihvu le ryüo a-zen-o kenthon; lo tsühvu tsü nme le Mosa lo nme le Elia.

³¹Au le zankechwi nyu ryüo a-le tinla nrün, lo Jerusalem nyu thyü pen titse kebin gü rüla tsü kenthon.

³²Tsükatsü Pitor lo a-zen kehü hvu le, zhüsa tinla kethyü genyu, anyugun le ntsen soryülo ntsin a-keben lo a-zen kebin mihvue hyulo.

³³Temi tsühvu le a-zen kekhola titse kebinka Pitor le Jisu ka, “Npugü, n gun hika bin lo gwa tile, tson-o agun no then kenshen thyü lota! Nme le ngenyu, nme le Mosa genyu, lo nme le Elia genyu,” tson. Lo a-le jo tsü kezo le tha rüchün-o zomvu.

³⁴Lo a-le jo tsü zokebin ka nmhu le ryüo anyugun renlo la; lo nmhu le ryüo anyugun renpfülo ntsin anyugun le nshvula.

³⁵Lo nmhu nyunki tha nme zo keryü le,“Higü hile Anyu, Ale a-kejülo kelagü, hagun a-khwe nyülo chi!”

³⁶Lo jo tsü zo keryü ka Jisu nti le kebin hyukelo gwünzin la. Tsüselo anyugun le thame zomvu tseo ntsema tsela, lo anyugun le tha kehyu tsüe pe temi nme kae zomvula.

³⁷Tson-o anyugun le tsüsinyü kazüthun tsügü ge n shyeryü zhü laryü, temi danda nnme le ryüo a-teno.

³⁸Tsükatsü temi nme le me dan nyu nra sen-o, “Senkethyü gü, nle a njünlo anyugü nrishü ta; kechamvule anyu le hi nti.

³⁹Lo a-le gwakemvu kapu le a-semen ryülo a-le chü whütse lola la tse hünyo, tson-o a-min thyü ketseryüryü tseo a-tsi nphwen tata tselo lahü, tson-o a-boshvu seren kela siki-e a-hoshü mvula latse hünyo!

⁴⁰Tsügenyu ale nle senthyükelonyu ju no hüla lotse hi-e, anyugun le hülo mvu laso.”

⁴¹Tsontsin Jisu le zo, “Hire, tenyen kemvu lo me gwünka hü kemvu shenhe dan, ano dithen laki hagun zen bin-o hagun ge nyu tsethyü mvu tseo akekheni bin tila? Nnyu zen-o aki ryülo.”

⁴²Tsüselo a-le nphazhü ntsin tero gwakemvu gü tsüle a-pvü kewhen pe kazü nyu shüo a-no a-min thyü ketseryüryü tse pe ketetsin thyülo la. Ai Jisu le nshün kemvu kapu tsügü kesüla njüo, ntsenyu gü thyü ngwashü, tson-o a-khipe a-pvü tsüni la.

⁴³Tsontsin anyugun aphu Sunggigü kekvu keda shwi pe anyugun dunthyüla.

⁴⁴Ai Jisu le thyükelo aphu genyu temi le a-dunthyü kü kebin ka a-le senthyükelonyu ju ka, “Jo hidan hi no hagun nyetin nyu yügü bin kegwa thyülo nye; kechamvule Temi Nyugü khipe temi dan ben nyu shüla nrün genyu..”

⁴⁵Ai anyugun le a-le anyugun ka kezo jo hi a-kon shalo mvula. Lo anyugun no shalo mvula nrün genyu pe anyugun kebula. Lo anyugun ko a-le anyugun ka kezo jo a-kon ketso nshvu la.

⁴⁶Lo anyugun dan nyu senyu no keda tsin thyüti yo tsekethyü zo-o kenyi hü.

⁴⁷Ai Jisu le anyugun kerüchün shalo-o ntsenyu nme zen ryüo a-khoka shülo-o anyugun ka zo,

⁴⁸“Temi lihigüe azan nyu ntsenyu higü hi zenkelonyu le azenlo hünyo, lo temi lihigüe azenlo yatselo a nikeshü güe zenlo hünyo. Kechamvule hagun dan nyu keshentsin gü tsügü tsü le kedatsin gü genyu,” tsonshü.

⁴⁹Tsüselo Johan le zo, “Npugü, agun le temi nme le nzan sen-o tero gwakemvu hü bin-o hyule, ai a-le agun then ryü kemvu genyu agun le a-no tson nya lotse laso.”

⁵⁰Ai Jisu le zo, “A-khin nya, kechamvule hagun ntsun kemvu gü le hagun kipon genyu.”

⁵¹Tsüselo a-zen-o tsangge küla nrün kho nnila ntsin a-le Jerusalem nyu kegun rüchün tonlo la.

⁵²Lo nchwenyu tsonlo nishüo, tsüdan no gü a-genyu tha lihi-e ndo titseo Samaria rünyi nme nyu yüla.

⁵³Ai tsünyu temi dan le a-zenlo mvula, kechamvule a-le Jerusalem nyu gun kejü tson kela si genyu.

⁵⁴Tsüselo senthyükelo Jakob lo Johan au le tsü hyushüo, “Npugü, nle ayi no tsangge mah hishüo temi tsüdan ro kela le nkenyü tile nmvu la?”

⁵⁵Ai Jisu le rani gü au kesüla.

⁵⁶Tson-o anyugun le rünyi kecha nme ki gunla.

⁵⁷Lo anyugun le gunzhü ntsin temi nme le a-ka, “Nle lihika güe ako n sithen ti le.”

⁵⁸Ai Jisu le a-ka, “Mesükerun-e a-kü le bin, lo tegüe a-seü le bin, ai Temi Nyugü we a-pe no keshü bin-e ndi.”

⁵⁹Lo a-le kecha nme ka, “Nle a sithenlo re.” Tsonshü ntsin; a-le, “Npugü, ano gü apvü sunla rita,” tsonso.

⁶⁰Ai Jisu le tsügü ka, “Kesinyu dan no kesinyu sunlo chi; lo nwe gun gü Sunggigü keda rüla pe meka zoshü chi.”

⁶¹Lo kechanyu nme ko Jisu ka, “Ako n sithen ti, Npugü, ai ano gü a kaminyu zen kenthon terilo.”

⁶²Ai Jisu le a-ka, “Temi lihigüe methu dyükon nrhisü sen-o a-sizin nrini tinla yatselo, temi tsünyu le Sunggigü keda temi thyü kü mvu,” tsonla.