Read Southern Rengma Naga TEJVÜZONIKESHÜ 1 Bible Online

TEJVÜZONIKESHÜ 1 - Southern Rengma Naga bible

TEJVÜZONIKESHÜ 1

¹Hile Mosa le Jordan pere npho zin tehenyhunkemvu nyu Israel nyu ka kezo jo. Anyugun le Suph khoka Jordan ketejon nyu Paran rünyi lo Tophel, Laban, Hazeroth, lo Dizahab rünyi dan ja nyu hokehü ka.

²(Edom nyu rincho tson then-o Sinai kazüthun ka gü Kadesh Barnea keti le jonryü nme lo.)

³Anyugun le Ijipt nyu chwikeryü chen henzi ka shye tseryü nme gü jon kerinyü Mosa le Npugü le a-no zoshü lotse johokeshü aphu pe temi dan ka zoshü.

⁴Hile Npugü le Heshbon nyida nyu kedathyü kebin Amor raja gü Sihon, lo Ashtaroth lo Edrei nyida hvu ka kebin Bashan raja gü Og so kvulo kela siki.

⁵Tsüle temi le Jordan npho zin Moab nyu terhi nyu kehü ka Mosa le Sunggigü tejvü lo sen kethyü jo kon zo kekho shü. A-le zoshü,

⁶“Ngun le Sinai kazüthun ge kebin ka Npugü ngun Sunggigü le zoshü, ‘Hagun le kazüthun higü ge bin thon laso.

⁷Kensenbin rho lo-o ketu shülo. Amor nyu kazü rincho lo lojvu tsü kehun aphu-- Jordan ketejon, rincho, kazü kenkun, lojvu tesinzin lo Mediterranean seki gülo. Kanan kazü lo Lebanon kazüthun nken-o Eufrates züri keda gü keti gülo.

⁸Kazü hi aphu ale pe hagun pvübon nyu Abraham, Isak, Jakob lo anyugun tsipwen tsüti tse zoshwishü njün. Gü tsü nkhen lolo.’ ”

⁹Mosa le temi dan ka zoshü, “Ngun Sinai kazüthun ge kehü ka, ‘A npvü hagun tsontsin titse kethyü agenyu rüri letse ale hagun ka zoshü. Ale a npvü tsü thyülo kemvui.

¹⁰Npugü hagun Sunggigü le hagun no chwü pe tsangge Shyenyü hontse laso.

¹¹Npugü hagun pvübon nyu Sunggigü no a-le zoshwishü kenjü hontse hagun thyüpe ntsoka nyeki jün yie chon kenye lo gwa kenye shü nda!

¹²Lo dihontse a npvü hagun jünkerathü kethyü khvu kensu gü hi pvü lo mon?

¹³Tsügenyu hagun tsipwen nmeme ka temi kensü, thashakekho lo kegwa lo thyüshwi kehü nyu peha kejü shülo tson-o ale tsüdan pe hagun so kedanyu thyü shüti.’

¹⁴Tsüka hagun le tsüle thakegwa nme letse hagun kendo la.

¹⁵Tson-o hagun le hagun tsipwen dan nyu kensü lo thyüshwi kela sharhi nyu kejü keshü dan. Peha no yieme, peha no tsime, Peha no henpvün lo peha no tseryü tse so ale pe hagun so keda thyüshü. Ale hagun tsipwen aphu ka keda nyu kecha ko kejüshü laso.

¹⁶“Tsüka ale anyugun ka, ‘Hagun temi dan nyu kekenya le soryü lo nyüshü. Hagun npvü hagun dan nyu nmvue tesin hagun dan nyu yhun kehü nyu janyu ke kenyae kenjü nyu kera shü.

¹⁷Hagun le jopen kethyü ka pehazin no pen loshvu. Ligü higü ge-e keme tse jopen shü mvu loshvu. Jopen keshü gü tsüle Sunggigü kipon ryü, tsügenyu temi nme nshvunya. Kekenya peha le hagun genyu rüritsin layatselo sen aki ryülo ale tsü pen shüti.’

¹⁸Ale tsüka hagun no thyümvulo keshvu kecha ko aphu zoshü laso.

¹⁹“Npugü ngun Sunggigü le nyu johoshüyo ngun le tsü thyü. Ngun le Sinai kazüthun ka bin-o kazü kesi kenrin kethyü pfüthü sen tse Amor nyu rincho ki kegü tson ki gü. Tson-o ngun le Kadesh Barnea tikelo ka,

²⁰Ale zoshü, ‘Ntsoka we hagun le ryü npvübon nyu Sunggigü, tsüle ngun Npugü Sunggigü le pe ngun tsü kebin Amornyu rincho tilo laso. Shwishü, tsüle li. A-le johoshü kela hontse gü nkhen lo. Kenyuhvu nmvue nshvunya.’

²²“Ai hagun le aka zoshü, ‘Ngun temi nipe kazü gü rhi shwio tson digü le gwatsin tiyo lo nyida dihontse kethyü le binyo agun ka zoshü lo, tsonshü.’

²³“A mhundyü ka tsüle thyüzü le tseo ale tsipwen nme ka nmeme tse mi tseryü kenyhun kejülo.

²⁴Lo anyugun le rincho ki gü Eshkol ketejon keti kazü rhishü.

²⁵Tson-o anyugun le tsüki hyukelo terasha peha senryüo Npugü ngun Sunggigü le pe ngun tsü kebin kazü gü le gwasa letse zoshü.

²⁶“Ai hagun le Npugü hagun Sunggigü le johokeshü ntsun-o kazü gü nyu yümvula.

²⁷Hagun le kebükerüo khinyunyu ka: ‘Npugü le ngun nrhi bin le. A-le Ijipt nyu ngun zen chwiryü Amor nyu ben nyu shüo no ngun dushvu lati tse bin laso.

²⁸Nyuthyüo tsüki gü mon? Nshvu le. Ngun le nikeshü dan le kezole, tsünyu keyhun nyu le ngun nyeki nko, thongon, lo anyugun chwida le kügü tsang tun bin nyo. Anyugun le tsünyu thungi dan hyu laso!’

²⁹“Ai ale, zoshü, ‘Temi tsüdan nshvu nya.

³⁰Npugü hagun Sunggigü le hagun mhundyü riti, a-le hagun genyu teri thyü ti, hagun le Ijipt nyu

³¹lo kazü kesi ki kehü ka kehyu hontse. Mepvünyu le a-nyu pvü kehü hontse a-le tsonthen hagun ntsen zenryü bin hinyu keshü hagun le hyu laso.’

³²Ale tsü hontse zoshü-e hagun le Npugü tenyen mvula,

³³a-le a-zintse hagun tson rio hagun no nsen nrün bin fü. A-le hagun mhundyü nyu khejenyu lo mahchwe lo nhenyu lo nmhuchwe nme ka tson tsin pe hagun hi.

³⁴“Hagun le kenyo kebin Npugü le nyülo-o anyuntala njüo a-le swe la,

³⁵‘Hagun serikemvu shenhe higü temi nme-e no ale zope hagun pvübon nyu ketsü kazü kegwa günyu tsü yülo ho.

³⁶Jephunneh nyugü Kaleb nti no tsünyu yüti. A-le rhi kela kazü gü tsü ale pe a-lo a-nyenyu tsüti, a-le a mhundyü nyu tenyen lo kekü thyü bin-o ti kethyü genyu.’

³⁷Hagun genyu Npugü no age ko a-nyuntao, ‘Mosa n-ko no kazü tsünyu yü loho tse zola.

³⁸N keche gü Nun nyugü Joshua nyunthyü peche shü. A-le Israel nyu tson ri gü kazü gü nkhen loti.’

³⁹“Tsonshüo Npugü le agun aphu ka zoshü, ‘Hagun nyenyu ncherio kegwa keshvu sha kemvu dan, hagun shwikerüchün nyu le tenlo kelai le tse hagun le zo kebin dan le kazü gü nyu yüti. Ale kazü gü pe anyugun tsüo anyugun le tsü nkhen loti.

⁴⁰Ai hagun we ranio kazü kesi nyu Aqaba zükenchon tson gü lo.’

⁴¹“Tsontsin hagun le, ‘Mosa, agun le Npugü mhundyü ka mu laso. Ai ntsoka we Npugü le johokeshü hontse, agun le gü teri thyüti.’ Tson-o hagun kerüchün le nne satse rincho ki rünyi dan hülo ti ado tse teri thyü nrün genyu gwen ndolo.

⁴²“Ai Npugü le aka zoshü, ‘Anyugun no gü teri thyü nya lo tse zoshülo, ale anyugun dan nyu hü kemvui genyu anyugun shwikerüchün nyu le anyu so kvukelai le.’

⁴³Npugü le aka nyu zoshü yo ale pe hagun ka zoshü ai hagun le nyümvu. Hagun le a-ntsun la, njüo ketekho-o rincho ki kü.

⁴⁴Ai rincho tsü ki kebin Amor nyu le khu hontse hagun ntsun chwiryü. Anyugun le hagun hü tsüryüo Hormah ti tson-o Edom rincho ki tsü hagun so kvula.

⁴⁵Tson-o hagun le chüo Npugü ka keche hi, ai hagun kehinyü, nmvue hagun phin rüchün shü mvula.

⁴⁶“Tson-o tsüsiki ngun le Kadesh ka bin thon sa tin la.