Read Southern Rengma Naga TEJVÜZONIKESHÜ 10 Bible Online

TEJVÜZONIKESHÜ 10 - Southern Rengma Naga bible

TEJVÜZONIKESHÜ 10

¹“Npugü le aka zonishü, ‘Kerigü hontse kethyü tso ponhvu yhenlo, lo tesen pe khinpha nme thyü lo-o pe tsünyu shü lo. Tson-o kazüthun gü ge aki ryülo,

²lo nle bokho kela tso ponhvu ge nyuthu yo ale tsüpe a-ge thu shüti tson-o nno khipe khinpha günyu shü loti,’ tsonshü.

³“Tsügenyu ale akakia sen pe khinpha nme thyülo lo keri gü hontse kethyü tso ponhvu yhen sen-o kazüthun gü ge kü.

⁴Tsüka Npugü le hagun le kazüthun ge kequen kelo nyü a-le mah nyu hagun nthon kethyü ka jokon tseryü pe hagun ketsü dan, keri gü ka kethu hontse tso ponhvu ge thu shü. Npugü le tso ponhvu tsü pe atsüshüo,

⁵ale kazüthun gü ge rani tsenryü. Lo Npugü le johokeshü hontse tso ponhvu pe ale thyükelo khinpha gü nyu shüla, tson-o tsüle tsü gerho nyu tsünyu bin.”

⁶(Israel nyu le Jaakan nyu zülvu nken-o Moserah ki gü. Tsünyu Aaron le silao a-sunla, tson-o anyugü Eleazar le a-sun ka püshükeda thyülo.

⁷Tsünyu bin-o Gudgodah ka gü, lo tsüka kethün nio Jotbathah tse kethyü zü kegwa bin nme ka gülo.

⁸Tsügwenkho ka Npugü le Levi tsipwen no püshükeda thyüo a-lothyülo Kejozenkelo Khinpha gü ntsen tson-o a-zan nyu jochü pe me tsüti tselo. Lo nthu keti hile anyugun tho.

⁹Tsügenyu Levi tsipwen le tsipwen kechanyu hontse kazü hyu lomvu; anyugun le hyukelo le Npugü püshükeda kethyü, Npugü hagun Sunggigü le zokeshü hontse.)

¹⁰“Ale keri gü ka hontse kebenjon henzi lo kezünjon henzi kazüthun gü ge bin tinla. Npugü le akehi nyü nishüo hagun nke mvula.

¹¹Tson-o a-le hagun no gü a-le hagun pvübon nyu ka zoshü kenjü kazü gü lolo nrün genyu ano gü hagun tsonri lo tse zoshü.

¹²“Ntsoka we Israel temi dan, Npugü hagun Sunggigü le hagun ka nyu hi bin nyo nyülo: Npugü rüshvulo lo a-johokeshü aphu thyülo. Nnyun aphu sen-o a-so lo a-lothyülo,

¹³lo a-tejvü aphu zenlo. Hagun kechwi genyu ale nthu tsüdan pe hagun tsüshü bin nle.

¹⁴Tsang ketetsotsin dan-e Npugü hon; kazü gü lo tsünyu kebin aphu ko a-hon.

¹⁵Ai a-le hagun pvübon nyu soritsin kela genyu temi kechanyu mvuo hagun kejülo, lo nthu-e hagun le a-le kejükelo temi.

¹⁶Tsügenyu ntsoka gerho hagun nyunrü bin nyao Npugü jo zenlo.

¹⁷Npugü hagun Sunggigü le tero kecha lo kekvu kecha aphu nyeki gon. A-le gon lo kvu lo a-nshvu zü. A-le meso kecha thyü hümvu lo jwe lo hümvu.

¹⁸A-le tegonyu lo magi nyu ge a-kezü thyü hü, a-le ngun temi dan nyu yhun kehü tesin dan so hü tson-o ketyüketsü lo phinya pe anyugun tsü hü.

¹⁹Tsügenyu tesin tsüdan solo, hagun ko gwengwa me Ijipt ki tesin thyü kehü genyu.

²⁰Npugü hagun Sunggigü zozen lo lo a-nti rüshvulo. A-jozenlo lo a-zan nyu nti hagun johoshü lo.

²¹A-shwelo-- A-le hagun Sunggigü, hagun le hagun npvü hagun yhütyü pe a-le hagun genyu thakeda lo ndun tho thyü keshü gütsü hyu laso.

²²Hagun pvübon nyu le Ijipt nyu ketsü ka temi hentsenyü nti. Ai ntso ka we Npugü hagun Sunggigü le hagun thyü pe tsangge shyenyü hontse swülo buho laso.