Read Southern Rengma Naga TEJVÜZONIKESHÜ 11 Bible Online

TEJVÜZONIKESHÜ 11 - Southern Rengma Naga bible

TEJVÜZONIKESHÜ 11

¹“Npugü hagun Sunggigü solo lo a-zintse a-tejvü dan zen lo

²Hagun le nthu Npugü rüla hagun sishakelo tsü rüchün hülo. Tsü rüla sikesha le hagun nyenyu mvu ai hagun le. Hagun le Npugü keda, kekvu lo kenko,

³lo a-le ndun tho thyü keshü dan hyu laso. A-le Ijipt raja gü a-kazü aphu nyu thyükeshü hyu laso.

⁴Lo Ijipt nyu rihü dan le hagun then keryü ka Npugü le rihü dan pe anyugun keru lo terigari dan sin-o Kenhon Zida nyu nrheshvu kela hyu laso.

⁵Hagun le ryü hi tilo kemvu ka Npugü le tehenyhun kemvu kazü nyu nyuthyü shüyo shabin nyo.

⁶Lo Reuben tsipwen Eliab nyuhvu Dathan lo Abiram tse ge nyu thyü shüyo rüchün nilo. Temi aphu mhundyü nyu kazü le koshüo au, au kami, au phika, au gonyu lo au senru aphu yünlo la.

⁷Hagun hile Npugü le thakeda thyükeshü hi aphu hyu laso.

⁸“Ale nthu khi keshü tejvü aphu thyüzen lo. Tson yatselo hagun le züri gü pfüthü gü hagun le yütitse kebin kazü gü nkhen loti.

⁹Lo Npugü le pe hagun pvübon nyu lo a-tsipwen tsü titse zokenjü kazü kebwe kegwa günyu yhunthon sa loti.

¹⁰Hagun le nkhen lo titse gü kejü kazü gü le hagun le himhundyü yhun kehü Ijipt kazü hontse mvu. Tsüki we hagun le ntsi shüshüo kekvu thyü zünye tson süpe low nyu shü hü;

¹¹ai hagun le nkhenlo titse gü kejü kazü gü le kazüthun lo ketejon le bin lo tsangri pe ntsenshü kehü kazü nme.

¹²Npugü hagun Sunggigü le chen keri ka gü kenkhin keti aphu kazü higü nucha lo shwi bin hü nyo.

¹³“Tsügenyu ale nthu khikeshü johokeshü dan thyüzen lo; hagun nyun aphu sen-o Npugü hagun Sunggigü so lo a-lothyü bin lo.

¹⁴Tson yatselo a-le Seryü lo Tsenbwe zü sen mvulo keshvu gwenkho ka tsangri pe hagun kazü nyu shüti, tson-o shye, vainzu lo oliv terzü,

¹⁵lo hagun senru genyu tehen kenjvü no bin loti. Hagun tyü kenyü chvü aphu hyu loti.

¹⁶Npugü kheo gü tero kecha rüshvu lo a-lothyü tinla nya.

¹⁷Tson yatselo Npugü le hagun ge a-nyunta lati. A-le tsangri shümvu lao kazü no sin pe hagun rasha dan no yhun lomvu lati. Tson-o a-le pe hagun tsükebin gü tsüle kazü kegwa nme yatse-e hagun le tsünyu si whütse lati.

¹⁸“Johokeshü hidan rüchün lo rühvu hülo. Rüchün bin lo nrün genyu tsü pe nbu lo nsenpfü ge phin pvülo.

¹⁹Tsü pe nnyenyu senthyü shü. Hagun le kanyu lo tegwen ki hüe, rüyü bin nmvue thatho thyü bin-e tsü rüla zo binlo.

²⁰Tsüpe n khenpvü kachon lo nchonrha ge thulo.

²¹Tson yatselo hagun lo hagun nyenyu le Npugü hagun Sunggigü le zope hagun pvübon nyu ketsü kazü günyu yhunthon loti. Tsang le kazü so kebin then hagun le tsünyu yhun ti.

²²“Ale khishü kebin tejvü dan aphu zen pütsü lo: NPugü hagun Sunggigü solo, a-le johokeshü aphu thyü, lo a-tson then lo.

²³Tson yatselo hagun le kethün keshü ka a-le senye tsü dan aphu hü lao, hagun le senye hagun nyegon lo kvu kethyü dan kazü nkhen loti.

²⁴Hagun le kedü kelo ka zü aphu hagun hon thyü loti. Hagun rhi le tesinzin tehenyhunkemvu kazü gü gerho nsin gü tesozin Lebanon kazüthun keti, nphozin Eufrates züri ka gü nkhün zin Mediterranean zida keti.

²⁵Npugü hagun Sunggigü le zoshü kenjü hontse hagun le kazü lika hika gü-e mele hagun nshvuti lo temi nme hagun khin loho.

²⁶“Ale nthu hagun no digü tiyo kejülo lo tse jochü lo shochün khishü bin nle.

²⁷hagun le ale nthu khipe hagun tsü kebin Npugü hagun Sunggigü johokeshü thyüzen hü yatselo jochü hyu loti;

²⁸ai hagun le johokeshü hidan thyüzen mvuo rani gü hagun le himhundyü rüshvu hükemvu tero kecha rüshvu tin la yatselo shochün hyuloti.

²⁹Npugü le hagun zen gü hagun le nkhenlo nrün kazü günyu shü kelo ka, hagun le Gerizim kazüthun ge jochü shü lo Ebal kazüthun ge shochün shü tseti.

³⁰(Kazüthun kenyhun hile Jordan züri nkhün zin Kanan nyu le yhun kebin Jordan ketejon nyu bin. Tsüle nkhün zin Gilgal rünyi khoka Moreh nyu senbin kenshün dan zen nithen mvu.)

³¹Hagun le Jordan züri pfüthü gü Npugü hagun Sunggigü le pe hagun tsü kebin kazü gü nkhenlo titse bin laso. Nle tsü lo lo-o tsünyu yhunlo lo,

³²nthu le pe hagun tsü kebin tejvü dan aphu thyüzen titse rüchün tonlo.