Read Southern Rengma Naga TEJVÜZONIKESHÜ 12 Bible Online

TEJVÜZONIKESHÜ 12 - Southern Rengma Naga bible

TEJVÜZONIKESHÜ 12

¹“Hile Npugü, hagun pvübon nyu Sunggigü le hagun no kazü tsügü nyu yhun kebin then thyüzen hü lotse pe hagun tsü kebin tejvü dan le. Tsüdan nyülo!

²Hagun le lokelo kazü gü nyu, kazüthun, rincho lo senbin kenjvu phanyu temi dan le tero rüshvu kehü bin aphu nke lalo.

³Anyugun kershvubin dan borhola lo anyugun kenshün tso kesen dan jonren la. Asherah terogi men kezü dan rola lo teromen dan boren lao anyugun no bin tsüdan ka rüshvuni nyala.

⁴“Temi hidan le anyugun tero rüshvu kehü hontse Npugü hagun Sunggigü rüshvu nya.

⁵Hagun tsipwen aphu kazü nyu Npugü le temi no a-kiryü a-rüshvu nrün bin nme kejü loti.

⁶Tsüka hagun le rope kerüshvu lo kerüshvu kecha dan, jün tseryü jün me lo thahokeshü, nkenyüo tha pe Npugü tsü titse keshü, nken do ka hokeshü, lo methu lo tanyü nyuri dan senryü rüshvu ti.

⁷Tson-o tsüka Npugü hagun Sunggigü, jochü pe hagun ketsügü mhundyü nyu, hagun lo hagun kami le thatho kegwa thyü keshü dan tyüo shekerhün thyüti.

⁸“Tsügwenkho le ryülo hagun le thyükehü hontse thyü nya. Ntsoka keti hagun aphu hagun kesha thyü rüshvu bin nyo,

⁹Npugü hagun Sunggigü le pe hagun tsü kebin, hagun le rüyüo yhun nrün kazü günyu yülo kemvuzun genyu.

¹⁰Hagun le Jordan züri pfüthü lolo, Npugü le hagun no kazü gü nkhen lo njüo tsünyu yhunti. A-le hagun shwikerüchün nyu aphu ben nyu hagun ntsen lo-o hagun le bweo yhunti.

¹¹Npugü le a-rüshvu nrün bin nme kejü loti, lo ale hagun ka zokeshü aphu sen tsü ka ryü mvuloshvu: Rope kerüshvu lo kerüshvu kecha, jüntseryü jünme lo tha hokeshü, lo hagun le Npugü ka zoshwi shü kenjü jwe kerüche dan sen ryüti.

¹²Tsünyu hagun nyenyu, hagun gonyu lo hagun rünyi nyu yhun kehü Levinyu zen a-mhundyü ka shekerhün thyülo; Levinyu le anyugun kazü bin kemvui tsü rüchün lo.

¹³Hagun le bin lika hika kejü lo-o kerüshvu thyü kemvui;

¹⁴Npugü le hagun tsipwen nme kazü nyu kejü kelo bin gü nti ka rüshvu mvu loshvu. Tsü ka nti hagun le ale zo keshü rope kerüshvu lo kechadan thyüti.

¹⁵“Ai hagun senru we hagun le lika hika bin-e hagun kendo thyü boshvu tyülo. Npugü le dikho pe hagun tsüyo tsükho tyü logwa. Hagun aphu tsü tyü logwa, nshün-e nmvue, hagun le thyüzhie nmvue thyünyu thyü tyü kehü hontse.

¹⁶Ai a-zi we tyü nya, zü hontse tsü run pe kazü nyu shüla mvu loshvu.

¹⁷Hagun le pe Npugü ketsü nme-e hagun kebin bin ki tyü loho: hagun shye jüntseryü jünme, vainzu, oliv ter, nmvue hagun methu lo tanyü nyuri, hagun le Npugü tsü titse zoshwi keshü, hagun kendo ka tha hokeshü nmvue kerüshvu kecha dan.

¹⁸Nle lo nnyenyu pe ngonyu lo nrünyi nyu kebin Levinyu sin-o Npugü hagun Sunggigü le kejü kelo bin nme ka Npugü hagun Sunggigü mhundyü nyu nti kerüshvu hidan hi tyüti. Lo nle thyü keshü aphu genyu nle tsünyu nsherhün ti.

¹⁹Hagun le hagun kazünyu yhun kebin then Levinyu keli lamvu titse kethyü ko rüchün tonlo.

²⁰“Npugü hagun Sunggigü le zoshü kenjü hontse a-le hagun kazü thyü nmhun keshü nyü, hagun le thyü tyükenyü ka tyü lo ti.

²¹Rüshvu nrün bin gü le nithen ri yatselo, ale hagun ka zokeshü hontse lihi gwenkho kae Npugü le pe hagun ketsü methu nmvue tanyü dushvuo hagun ka nyu tyülo gwa.

²²Nshün-e nshünmvue hagun le thyüzhie lo thyünyu thyü ketyü hontse tyü logwa.

²³Tezi pe thyü kesin-o tyünya, kerhün ronzin le tezi nyu kebin genyu hagun le kerhün ronzin pe thyü kesin tyü lo shvu.

²⁴Tezi tyü nya ai tsü pe zü hontse kazü nyu run la mvu loshvu.

²⁵Hagun le johokeshü hi thyüzen yatselo Npugü le a-kenyü ti, tson-o hagun lo hagun nyenyu genyue gwa gun loti.

²⁶Hagun kerüshvu dan lo hagun le Npugü ka zoshwi shü kenjün dan sen-o Npugü le kejükelo rüshvu nrün bin günyu gü lo.

²⁷Tson-o Npugü kershvubin ge ropen nrün kerüshvu tsü thyülo. Lo hagun le a-zi pe run lao a-thyü tyü nrün kerüshvu ko thyülo.

²⁸Ale johokeshü aphu hagun nyunketsin thyüo thyü zen lo yatselo hagun lo hagun nyenyu genyue kethonthen gwa loti; kechamvule hagun le nyu le Npugü hagun Sunggigü mhundyü nyu njü lo a-kenyü yo tsü thyü hü nrün genyu.

²⁹“Npugü hagun Sunggigü le hagun le senye dan kazü hü gü lo a-le tsüdan nkelao hagun no tsü nkhenlo njüo tsünyu bin loti.

³⁰Npugü le senye tsüdan nkekela siki hagun le anyugun nyünyü thenmvu titse rüchün tonlo, nmvu yatselo tsüle hagun sa lati. Hagun le anyugun hontse rüshvu mvulo nrün genyu anyugun le dihontse rüshvu yo tsü fü nya.

³¹Anyugun tero kerüshvu jvü hontse hagun le Npugü hagun Sunggigü rüshvu nya, anyugun le Npugü le ntsü kehü kentsükenchen aphu thyüo anyugun tero rüshvu kehü genyu. Anyugun le anyu nyenyue pe kershvubin ge mah nyu ro-o rüshvu hü nyo.

³²“Ale hagun ka johokeshü aphu thyülo, thame pe sin nya nmvue khe lanya.