Read Southern Rengma Naga TEJVÜZONIKESHÜ 13 Bible Online

TEJVÜZONIKESHÜ 13 - Southern Rengma Naga bible

TEJVÜZONIKESHÜ 13

¹“Sidyükeshanyu nmvue mikon zo kehünyu nme le thazansü nmvue nduntho thyüo,

²hagun nsü zen gü hagun le himhundyü rüshvu shwi kemvu terodan lothyü titse lo. A-le zokeshü le ketsin thyü la yatse-e,

³a-khwenyü nya. Npugü hagun Sunggigü le hagun le hagun nyun aphu sen-o a-so hü le mvuyo tse kethyü shalo nrün genyu a-sen-o hagun kegwakeshvu ten bin nle.

⁴Npugü sithen lo a-rühvu lo; a-nshvu lo a-johokeshü zenlo; a-rüshvu lo a-mhundyü nyu joketsin zolo.

⁵Ai mikon zokehü lo sidyükeshanyu ligü higü hagun le Ijipt nyu medo thyü kehü hagun kenishwi keshü Npugü kentsun jo kezo nyu we dushvu lalo. Temi tson kehü güle gwamvu lo hagun tson tsin pe Npugü le hagun le yhun lo tse johokeshü gü nrhila tiya bin nyo. Hagun le gwakemvu higü nrhilo nrün genyu a-dushvu lamvu loshvu.

⁶“Ntsasikezen, nnyu peche, nnyu tenu, nle so kehü nnu, nmvue npvünyu nkho kenitsin gü le kebuo nthukeyhun pe nno tero kecha, npvübon nyu le thame ka rüshvu hü kemvu rüshvu tinla logwa.

⁷Anyugun le nthukeyhun pe nno nkho ka yhun kehü nmvue nithen ki kehü nyu tero rüshvu tinla logwa.

⁸Ai nle a-jonyu yü nya; a-khwe-e nyü nya. A-shwinjün, a-so nmvue a-no pen nya.

⁹A-dushvula! Nle tso pe jon teri shüo, temi aphu no tsope a-jon lo.

¹⁰A-jon shvula! Npugü hagun Sunggigü hagun le Ijipt nyu medo thyü kebin hagun kenishwi keshü gü ben nyu a-le hagun tsontsin zentin la titse kebin genyu.

¹¹Tson-o Israel nyu aphu nyuthyüla yo tsü shati; anyugun le nshvuo temi nme-e gwakemvu tsü hontse thyüni mvu lati.

¹²“Hagun le Npugü hagun Sunggigü le pe hagun ketsü rünyi nyu yhun kebin ka,

¹³hagun senye dan nyu temi serikemvu peha le a-rünyi tson tsinzü zen gü hagun le nduka rüshvu hü kemvu tero rüshvu kethyü rüla nyü lo.

¹⁴Nle jobon tson kethyü nyü lo yatselo, tsü ketso petsü shü, lo thagwakemvu hile ketsin yatselo,

¹⁵rünyi tsünyu temi lo senru aphu dushvula. Rünyi tsügü nke shülalo.

¹⁶Rünyi tsünyu keyhun nyu kanyü aphu sen ryü phenlvu nyu kequen shü. Tson-o rünyi tsügü lo anyu kebin aphu rope Npugü hagun Sunggigü ki shü lati. Kethonthen tsü khe lao rünyi thyüni nya.

¹⁷Nkela titse swetsü kela hon lihi-e khilo nya, tsonyatselo Npugü le a-nyunkekhü nyu rani ryüo hagun shwinjün shüti. A-le hagun shwinjün-o hagun pvübon nyu ka zokeshü hontse hagun temi no chonkenye loti.

¹⁸Hagun le ale nthu pe hagun tsü keshü a-johokeshü aphu thyüzen lo lo a-mhundyü nyu kenjü gü thyülo yatselo.