Read Southern Rengma Naga TEJVÜZONIKESHÜ 14 Bible Online

TEJVÜZONIKESHÜ 14 - Southern Rengma Naga bible

TEJVÜZONIKESHÜ 14

¹“Hagun le Npugü hagun Sunggigü temi. Tsügenyu kesi chechü kethyü ka mekechanyu hontse hagun npvü hagun thyügvü nmvue hagun pe mhundyü zin thu ndo lanya.

²Hagun le Npugü hagun Sunggigü hon; kazü nyu yhun kebin temi aphu dan nyu a-le hagun kejü pe a-temi thyülo laso.

³“Npugü le nshünmvu tsekela lihi-e tyü nya.

⁴Hagun le nyukhu hidan tyü logwa: methu, tanyü, tenyü,

⁵thyüzhie, tehen tanyü, tehen tenyü, nmvue thyünyu,

⁶nyukhu lihi-e a-tsen ko lo a-chvü nshen kehü dan.

⁷Ai nyukhu lihi-e a-tsen komvu lo a-chvü nshen kemvu dan tyünya. Hagun le Ut, rabbit nmvue tsonyepfü hidan tyü nya. Tsüdan le a-chvü nshen hü ai a-tsen ko kemvu genyu nshünmvu tse rüchün mvuloshvu.

⁸Tebo tyü nya. Tsüdan le a-tsen ko ai a-chwü nshen hü kemvu genyu nshünmvu tse rüchünla mvulo shvu. Nyukhu hidan thyü tyü nmvue a-simin kesüe nya.

⁹“Tsehü a-thun lo a-kü kebin lihi-e tyü logwa,

¹⁰ai zü nyu yhun kehü a-thun lo a-kü kendi dan tyü nya; tsüle nshünmvu tse rüchün lamvuloshvu.

¹¹“Hagun le tegü kenshün lihi-e tyü logwa.

¹²Ai hagun le tegü hihontse kethyü dan tyü nya: logi, khinsu, tsemu, kheno; memhun, güda, tegvü, ostrik, zidagü, sahü, gürhon, zügü, zügükemetse, hoopoe lo senpho.

¹⁹“Nyukhu a-sekin kepvü aphu nshünmvu; tsü tyünya.

²⁰Hagun le nyukhu kenshün lihi-e tyü logwa.

²¹“Nyukhu lihi-e a-npvü kesi tsü tyünya. Hagun dan nyu yhun kehü tesindan no tyüla gwa nmvue pe tesin ka jwe logwa. Ai hagun le Npugü hagun Sunggigü hon; hagun le a-temi. “Tanyü nmvue tenyü nyu thyü pe a-pvü nyüzü ka ninya.

²²“Chen kechwi nlow nyu hyukelo aphu jüntseryü jünme pe a-kecha thyülo.

²³Tson-o Npugü hagun Sunggigü le a-rüshvu nrün genyu kejü kelo bin günyu gülo, lo tsünyu shye, vainzu, oliv ter, jüntseryü jünme lo methu lo tanyü nyuri tse pe a-mhundyü ka shülo. Azintse Npugü hagun Sunggigü ke rühvu jvü shalo nrün genyu hihontse thyülo.

²⁴Kerüshvu bin güle nka zen nithen rio Npugü le jochü pe nketsü jüntseryü jünme sen-o gülo nrün ndi yatselo hihontselo:

²⁵Nle tsü jwe lo njüo pisa gü sen-o kerüshvu bin gü nyu güti.

²⁶Tson-o Npugü hagun Sunggigü mhundyü nyu nkaminyu zen-o nyu sennyü bin nyo--methu thyü, tanyü thyü, vainzu, zu lihi-e sen-o shekerhün thyü tyütsü lo.

²⁷“N rünyi nyu yhun kebin Levinyu dan keli lanya; anyugun le anyugun npvü anyu hon ndi.

²⁸Chenshen gü kepen ka hagun aphu hagun shye jüntseryü jünme senryü hagun rünyi nyu kequen lo.

²⁹Hile Levinyu dan chvü, anyugun le anyun hon kendi genyu, lo hagun rünyi nyu hagun zen yhun kebin tesin, tegonyu lo maginyu dan genyu. Anyugun no ryü anyu senmvulo keshvu aphu khilo. Hihontse thyülo, lo Npugü hagun Sunggigü le hagun tho aphu nyu jochü pe hagun tsüti.