Read Southern Rengma Naga TEJVÜZONIKESHÜ 15 Bible Online

TEJVÜZONIKESHÜ 15 - Southern Rengma Naga bible

TEJVÜZONIKESHÜ 15

¹“Chen tsenyü gü kepen ka hagun le hagun pu pvü kebin nyu gwün pe tsü lati.

²Hihontse thyüti. Israel nyu ligü higü-e pisa pe Israel nyu tepu kenjü güle tsü khe lati; a-le pisa tsü hi loti tsenya; Npugü le tepu tsü khela sele tseshü laso.

³Hagun le tesin hagun pu pvü kebin nyu ka we hi logwa, ai n npvü ntemi npu pvü kebin nyu ka we hinya.

⁴“Npugü hagun Sunggigü le a-le pe hagun ketsü kazü günyu jochü pe hagun tsüti. Hagun nme rhodyü la loho,

⁵hagun le a-jozen lo pütsüsao ale nthu hagun ka johoshü kebin hi then hü yatselo.

⁶Npugü le zokenjü hontse jochü pe hagun tsüti. Hagun le pisa pe senye kechon tepu ti, ai hagun we nme hon tepu loho; hagun no senye kechon sa gonti, ai senye nme no hagun sa gon loho.

⁷“Npugü hagun Sunggigü le pe hagun ketsü kazü nyu rünyi lika hikae Israel nyu nme le rhodyü bin yatselo njün kegwa füo a-cheshümvu lanya.

⁸Tsonkethyü gümvule nho-o a-le sen mvulo keshvu pe a-tepu shülo.

⁹Tepu gwün pe tsü nrün chen kho nnikela genyu pe a-tepu mvukela thyü nya. Nyun kenda gwakemvu tsühontse kethyü no nnyun ka ryünya. Nle tha pe atepu mvulao a-le Npugü ki nge kenya shülo nle mu lati.

¹⁰Njün kegwa fü nyao kenrun nyu pe a-tsü shülo Npugü le ntho aphu; nyu jochü pe ntsüti.

¹¹Azintse Israel nyu thakendi lo rhokedyü peha le binti, tsügenyu hagun no nho-o tha pe tsü dan tsü lotse a-le hagun ka johoshü bin nle.

¹²“Israel nyu peche nmvue tenu nme le a-npvü a-khipe do hontse nka jwe shü yatselo, a-le chen tsero nlothyü kela siki nle a-hoshü lati. Chen tsenyü güle keryü ka nle a-hoshüo no gunla mvuloshvu.

¹³Nle a-hokeshü ka a-kenben nishü nya.

¹⁴Npugü le nyu jochü pe ntsüyo nho-o tanyü, shye lo vainzu pe a-tsüshü.

¹⁵Hagun le Ijipt nyu medo thyü kebin Npugü hagun Sunggigü le hagun hokeshü tsü rüchünlo; tsügenyu ale ntsoka johigü hope hagun tsü bin nyo.

¹⁶“Ai ndo güle tinla nyümvu, a-le nso lo hagun kaminyu so-o hagun zen bin titse logwa.

¹⁷Tson yatselo a-zen n khenpvü kagü a-yhütin bünla; tsonlo a-yhunthen a-le ngo thyüti. Ngogi ge-e tsü hontseti.

¹⁸Ndo nme hoshü latitse kethyü ka nkenyümvu lanya; a-le jonshe gonyu chün peha minka chen tsero n lothyü laso. Hi thyülo, lo Npugü hagun Sunggigü le ntho aphu nyu jochü pe ntsüti.

¹⁹“Hagun methu lo tanyü nyuri aphu khikho kecha thyüpe Npugü hagun Sunggigü tsüla; methu hidan nme-e sen-o thatho thyü lo tanyü hidan nme-e hütse nya.

²⁰Chen kechwi nkami zen-o Npugü kerüshvu bin nyu Npugü mhundyü ka tsü tyüti.

²¹Ai senru tsü gü le tha peha ka gwamvu, a-pha nyho, nmvue ayhüpo nmvue tetsin peha le bin yatselo hagun le tsüpe Npugü hagun Sunggigü rüshvunya.

²²Senru tsühontse kethyü tsü hagun le kaki tyülogwa. Hagun le thyüzhie nmvue thyünyu tyü kehü hontse nshün-e nshün mvue hagun aphu tyü logwa.

²³Ai a-zi we tyünya, hagun le zü hontse tsü run pe kazünyu shüla mvuloshvu.