Read Southern Rengma Naga TEJVÜZONIKESHÜ 16 Bible Online

TEJVÜZONIKESHÜ 16 - Southern Rengma Naga bible

TEJVÜZONIKESHÜ 16

¹“Ahib Shye ge nkenkela ngao Npugü hagun Sunggigü rühvulo; tsü shye ge khejeme a-le Ijipt nyu hagun kenishwishü.

²Kerüshvu bin nme ka tsügü hagun nkenkelo ketyüketsü genyu tanyü nmvue methu nme dushvu pe Npugü hagun Sunggigü rühvulo.

³Hagun le hi ketyü ka kebu lo keshü tensü tyünya. Hagun le nyhun-o Ijipt nkenkechwi ka hontse jon tsenyü kebu lo shükemvu tensü tyüti. Tensü higü tyülo-- tsü lope kenjün kethyü tensü tse koti-- tson-o hagun le yhun kebinthen kenjün kethyü bin Ijipt nkenchwi keryü jon tsü rüchün hüti.

⁴Jon tsenyü hagun kazünyu temi nme kanyu kebu no bin loho; lo jon kerinyü ngwün gü senru dushvu kelo tsü tsüje tyüla mvuloshvu.

⁵“Kerüshvu bin günyu tsü nkenkelo nga senru gü dushvu lo Npugü hagun Sunggigü le kazü nyu bin kecha nme-e pe hagun tsükemvu genyu. Tsügü tsü ngwün gü yhüko keche ka hagun le Ijipt nkenkethyü jon nyü gwenkho ka thyüti.

⁷Tsü nilo-o kerüshvu bin günyu tyülo njüo lonyü gü ka ki rani gunlo.

⁸Jontsero hagun le kebu shükemvu tensü tyüti, lo jon tsenyü gü nyü thame thyü nyao Npugü rüshvu nrün genyu kequenlo.

⁹“Logvü so kethyü swüo hapta ja tsenyü swülo,

¹⁰lo Npugü le jochü pe nketsü kechon kerho rüchün-o nnpvü nkendo ka senryü logvü nga pe Npugü hagun Sunggigü rühvu lo.

¹¹Nnyenyu, ngo, Levinyu, tesin, tegonyu, lo nrünyi nyu kebin magi nyu zen-o Npugü mhundyü nyu shekerhün thyülo. Kerüshvu bin günyu hi thyülo.

¹²Johokeshü hidan hi thyümvu loshvu; hagun le Ijipt nyu medo kethyü tsü nmin lanya.

¹³“Hagun shye aphu nyu lola lo vainsha aphu thünlo kela siki jon tsenyü then nyu bin-o nga ti.

¹⁴Hagun nyenyu, gonyu, lo hagun rünyi nyu kebin Levinyu, tesin, tegonyu lo maginyu aphu zen-o shekerhün thyülo.

¹⁵Kerüshvu bin günyu jon tsenyü nga higü thyü Npugü hagun Sunggigü rühvulo. Npugü le jochü pe n lowgvü lo ntho so keshü genyu shekerhün thyülo.

¹⁶“Hagun senye pechenyu aphu chen meka gwünshen ge ryüo kerüshvu bin günyu Npugü rüshvuti. Nkenkelo, Lowgvü lo Then nyu kebin nga hidan ka. Nmeme tse jwe senryü

¹⁷a-le thyülo kegwa kho, Npugü hagun Sunggigü le jochü kechon kerho pe a-ketsü kho ka.

¹⁸“Npugü hagun Sunggigü le pe hagun ketsü rünyi aphu ka kerathünyu lo kedanyu kecha kejü külo. Hidan le mesokechathyü mvutse jünkera nrün dan.

¹⁹Anyugun le mejünkera kethyü ka njümvu nmvue peha so kecha thyü loho; lo anyugun le jvujwe lo loho, jwe le kensü nyu lo kenjü nyue yhütyü bopha lao no jo penron züla kehü genyu.

²⁰Npugü hagun Sunggigü le pe hagun ketsü kazü gü nkhenlo lo tsünyu yhunbin nrün genyu a-zintse ntsen njülo.

²¹“Npugü hagun Sunggigü genyu kershvubin kethyü ka a-kho ka tesen pe terogi Asherah zansü thyü pe shü nya.

²²Lo teromen kerüshvu genyu tso nme-e sen nya; Npugü le tsü shwi ntsü hü nyo.