Read Southern Rengma Naga TEJVÜZONIKESHÜ 17 Bible Online

TEJVÜZONIKESHÜ 17 - Southern Rengma Naga bible

TEJVÜZONIKESHÜ 17

¹“Methu nmvue tanyü tetsin kebin nme-e pe Npugü hagun Sunggigü rüshvu nya; Npugü le tsü shwi ntsü hünyo.

²“Hagun rünyi nme ka peche nmvue tenunyu nme le Npugü johokeshü gwenrho-o mukela rüla nyülo lo,

³a-le Npugü johokeshü thenmvuo yhüko nmvue shye, nmvue shyenyü rüshvu lo lothyü bin.

⁴Tson kethyü zotesha nyülo yatselo, kechaketsü kegwa thyülo. Tson-o Israel nyu dan nyu thagwakemvu hi thyü bin ketsin yatselo;

⁵temi tsü gü zen rünyi teki chwigü tso pe jonshvula.

⁶Mihvu nmvue tsünyeki kechon shahu le bin ya tselo a-dushvu lagwa, shahu nme nti yatse kethyü we a dushvu lo nrün ndi.

⁷Shahu nyu no tso shwe teri shüo tsüsiki kechanyu no tso shwe pe temi tsügü jon ti; hihontseo hagun dan nyu gwakemvu thyü kenshün lati.

⁸“Kenya ketesu, nmvue tejün, tüshü, lo kedushvu hi hontse kethyü kekenyo hagun dan nyu jünkeranyu genyu tsenri layatselo, sen-o Npugü hagun Sunggigü le kejükelo kerüshvu bin gü kiryüo

⁹hagun kekenyo pe tsüka thatho thyü kebin Levinyu püshükeda ju lo jünkera gü ka zoshüo no jopen shülo.

¹⁰Anyugun le jopenron shülo anyugun le zokeshü hontse hagun le thenti.

¹¹Anyugun le penron keshü loti lo anyu le nyu zoshü yo aphu then lo.

¹²Jünkera gü nmvue lotho thyükebin püshükeda jü jozen mvue nshvu kemvu gü dushvu la; hihontseo hagun le Israel nyu dan nyu thagwa kemvu khi lati.

¹³Tson-o temi aphu tsü nyü lo njüo nshvu, lo tsü hontse thyüsin nshvu lati.

¹⁴“Hagun le gü Npugü hagun Sunggigü le pe hagun ketsü kazü gü lolo njüo tsünyu bin kelo siki senye hagun hunpfü kebin dan hontse raja nme sen mvulo shvule tse rhilo ti.

¹⁵Lo hagun le kejü pe raja thyü titse kebin gü tsüle Npugü le kejülo kela gü le tse shatsentsülo. A-le hagun temi mvulo shvu; tesin nme pe hagun raja thyü nya.

¹⁶Raja güle a-rihü dan genyu keru kechon nkin nya, lo keru hei titse temi nipe Ijipt ki shü nya, Npugü le a-temi dan no thame ka tsüki nigü loho tse zo kenjü genyu.

¹⁷Raja güno a-nu kechon bin loho, hile a-thyü pe Npugü kheo ranikelai genyu lo a-no suna raka nnya loshvu.

¹⁸A-le raja thyü lolo; Levinyu püshükeda dan le sen kehü Sunggigü tejvü lo senkethyü dan lesüshen nme no binti.

¹⁹A-le a-rhünthen lesü higü no a-khoka bin-o swüti, tson-o a-le Npugü kerühvu jvü shalo lesü tsünyu johokeshü aphu thyüzen ti.

²⁰Hile a-ntsen pe a-le Israel nyu kecha dan nyeki gwakvu tse rüchün mvu loti lo thame ka Npugü johokeshü thyüzenmvu la loho. Tson-o chen kethon raja thyüti, lo a-tsipwen le shenhe kechon Israel nyu so gonti.