Read Southern Rengma Naga TEJVÜZONIKESHÜ 18 Bible Online

TEJVÜZONIKESHÜ 18 - Southern Rengma Naga bible

TEJVÜZONIKESHÜ 18

¹“Levi tsipwen püshükeda nyu le Israel nyu dan nyu kazü anyugun jün nme hyu loho: tsü sunka anyugun le mele tha pe Npugü ketsü lo kerüshvu hon dan sen-o yhunti.

²Tsipwe kecha dan hontse anyugun kazü le bin loho; Npugü le zokeshü hontse, Npugü püshükeda lotho tsüle anyugun jün.

³“Lihigwenkho kae methu nmvue tanyü pe kerüshvu thyülo a-bu, a-sapha lo a-ginda tse pe püshükedanyu tsü lati.

⁴Shye, vainzu, oliv ter, lo thyühüphi hyulo keri tsin tsü anyugun le loti.

⁵Kethonthen püshükeda thyüo a-lothyü titse Npugü le hagun tsipwen aphu dan nyu Levi tsipwen kejü lo laso.

⁶“Israel nyu rünyi lika hika Levinyu ligü higü-e ryü kenyü nyule Npugü kerüshvu bin gü ka ryü logwa

⁷lo a-le Levi nyu kechanyu hontse tsünyu Npugü a-Sunggigü püshükeda thyülo gwa.

⁸A-le ketyüketsü püshükeda kechanyu le hyulo kehü kho hyu loti, lo tha lihi-e a-kami le nipe a-ketsü a-le sen logwa.

⁹“Hagun le Npugü hagun Sunggigü le pe hagun ketsü kazü nyu ryü lolo, tsünyu senye dan le thyü kehü kentsükenche thodan then nya.

¹⁰Hagun kershvubin ge hagun nyenyu rope rüshvu nya, hagun temi no teronyu ka tha ketso nmvue zansü nrin nmvue temvu,

¹¹nmvue jado thyü lo kesinyu kapu dan nthon nya.

¹²Npugü hagun Sunggigü le kentsükenchen hidan thyü kehü nyu ntsü hü, tsügenyu hagun le kethün keshü ka a-le kazü günyu senye tsüdan hü laso.

¹³Npugü jozenpen lo.”

¹⁴Tson-o Mosa le zo, “Hagun le nkhenlo gü kejü kazü günyu temi le teronyu ka thaketso kehü dan jo then lo zansü dan fü hü, ai Npugü hagun Sunggigü le hagun no tson loho.

¹⁵Tson kethyü sunka a-le hagun temi dan nyu ahontse kethyü sidyükesha nme nishü ti, lo hagun le a-jozen ti.

¹⁶“Hagun le Sinai kazüthun ka kehun kethyü nyü, Npugü no hagun nthonni lo a-le kehü mah gü hyu sin nya lotse hi, hagun le sikela kenshvu genyu.

¹⁷Tsügenyu Npugü le aka zoshü ‘Anyugun le hi kezü hibin nle.

¹⁸Ale anyugun temi dan nyu nhontse kethyü nipe anyu tsüti. A-no nyuzo tiyo ale a-ka zo shüti, lo a-le a johokeshü aphu pe anyugun ka zoti.

¹⁹A-le azan nyu thazo ti, lo ale shaja pe a-jozen kemvunyu aphu tsü ti.

²⁰Ai sidyükeshanyu ligü higü-e ale johoshü mvue pecheo azan ka jolo zoyatselo, a-le tsü genyu siti, lo tero kecha zan nyu thazo kethyü sidyükesha lihigü-e a-ko no tsonti.’

²¹“Hagun le dihontse sidyükesha gü zole Npugü ki ryüle nmvuyo shalo tila, tse hagun dunthyü bin logwa.

²²Sidyükeshanyu nme le Npugü zan nyu thazo shüo a-le kezo tsüle ketsin thyüryü mvula yatselo tsüle Npugü jo kemvu. Sidyükesha tsü güle a-kendo zo bin nyo, hagun le a-nshvu nya.