Read Southern Rengma Naga TEJVÜZONIKESHÜ 19 Bible Online

TEJVÜZONIKESHÜ 19 - Southern Rengma Naga bible

TEJVÜZONIKESHÜ 19

¹“Npugü hagun Sunggigü le anyugun kazü pe hagun tsüti tse kebin temi dan nke lao hagun le anyu nyida lo ka dan lolo njüo bin kelo siki,

²kazü gü kenjün pe jünshen thyülo, nmeme ka nne-o tilo kegwa nyida nme no bin lo. Tson-o medu shvukela gü no tin gü tsüdan nme nyu techwen lokegwa thyülo.

⁴Temi nme le shamvuo a-kenrhinyu kemvu peha dushvu laya tselo, a-no chwigü nyida hidan lika hikae rhünlo nrün genyu.

⁵Keshanyu laka, mihvu le senlü titse chün nyu kengü güo, senbin phün tseo nme le a-nri le ntho pe kechagü dushvu laya tselo, a-no tin-o nyida kenshen hi nme ka gü rhün lo nrün genyu.

⁶Nyida nme nti yatselo tsonthon rio kesigü khenzo titse kebin a-tsasikezen nyu le a-hü lo-o nyunkenthün ka kemu kendi gü dushvula loshvu. Shamvuo a-kenrhinyu kemvu dushvu kela gwen zin genyu.

⁷Hi genyu ale hagun no nyida kenshen khi kecha thyüla lotse ahza khishü le.

⁸“Npugü hagun Sunggigü le hagun pvübon nyu ka zokeshü hontse a-le hagun kazü thyü ngon shüo, a-le zo kenjü kazü aphu pe hagun tsüshü yatselo

⁹hagun le nyida kenshen kejü ni loti. (Hagun le ale nthu hagun ka johokeshü hi aphu thyü, lo Npugü hagun Sunggigü so-o a-senkethyü jodan then-o yhun loya tselo a-le kazü higü pe hagun tsüti.)

¹⁰Npugü le pe hagun tsü kebin kazü günyu kemu kendi nyu no simvu nrün, lo anyugun no sikela genyu hagun nmu mvu nrün genyu hi thyülo.

¹¹“Ai temi nme le a-shweron thyü a-kenrhinyu dushvu la njüo tesunlo nrün genyu rünyi hidan nmenyu yüla.

¹²Tson kethyü we, a-rünyi nyu sharhinyu le me nishüo no a-zenryü sikela gü khenzo titse kebin shvunye ben nyu shüo no dushvula logwa.

¹³Shwi njün nya. Aphu no gwa bin nrün genyu, medu keshvu kemu hi Israel nyu dan nyu thyü kenshünla.

¹⁴“Npugü le pe hagun ketsü kazü günyu, nduka sen kenjü nkazon gü kazü rhi tso bokela nya.

¹⁵“Temi nme le mula letse kethyü shahu nme nti we penmvu; temi gü le mula tse kethyü rhotsin-e shahu mihvu no bin mvu loshvu.

¹⁶Temi nme le kechanyu nme no kenjün thyülo nrün genyu nkuo kemu pe a-njü yatselo,

¹⁷mihvu nren kerüshvu bin ki güo tsünyu kebin püshükedanyu lo jünkeranyu no kerapen shüti.

¹⁸Jünkeranyu le kekevü tsügü ketsopetsüo; temi tsügü le nkuo a-pvü gü Israel nmu bin yatselo,

¹⁹a-le nmu kelanyu le hyulo nrün shaja gü tsü hyu loti. Hihontse hagun le thagwa kemvu hithyü kenshünlo.

²⁰Tson-o nyuthyü layo temi aphu nyü loti; anyugun le nshvu lao, temi nme-e gwakemvu tson kethyü thyüni mvu lati.

²¹Kekevü tson kethyü nyutsü meshwi njün nya; kerhün ronzin nme genyu terhün ronzin nme, Yhütyü nme genyu yhütyü nme, hü nme genyu hü nme, ben nme genyu ben nme lo pha nme genyu pha nme.