Read Southern Rengma Naga TEJVÜZONIKESHÜ 2 Bible Online

TEJVÜZONIKESHÜ 2 - Southern Rengma Naga bible

TEJVÜZONIKESHÜ 2

¹Npugü le zokeshü hontse agun le ranio Aqaba zükenchon tson then-o kazü kesi ki gü jonkethon Edom rincho ki nmhon tinla.

²“Tsüselo Npugü le aka zoshü

³ngun le jonkethon rincho tsüki ho laso tsügenyu ngun no tesozin nsin mvuloshvu tse zoshü.

⁴A-le ano jo hidan pe hagun ka zo lotse shü: ‘Hagun le hagun shvunye nyu Esau tsipwen kazü Edom rincho pfüthü gü zhü nyo. A-nyugun le hagun nshvuti,

⁵ai anyugun zen teri thyünya, ale anyugun kazü phakvu gwa-e pe hagun tsü kemvui genyu. Ale Edom pe Esau tsipwen tsü laso.

⁶Hagun le anyugun ka ketyüketsü hei logwa.’

⁷“Dihontse Npugü hagun Sunggigü le hagun tho aphu nyu jochü pe hagun tsüyo rüchünlo. Hagun le kazü kesi keda hinyu nmhon kehü ka a-le hagun nucha shü. Chenhenzi hi a-le hagun zen hüo hagun le thame rhodyü lamvu.

⁸“Tson-o ngun le Elath lo Eziongeber rünyi ka tson le kesi Züda ki kegun gü khe-o ketu-o Moab den zin teso-npho zin ryü.

⁹Lo Npugü le aka zoshü, ‘Lot tsipwen, Moab nyu tsü kevü nmvue anyu zen-o teri thyünya. Ale Ar nyida gü pe anyugun tsülaso, ale anyugun kazü keshanyue pe hagun tsü loho.’ ”

¹⁰(Nduka Emim tse ko kehü thungi senye le Ar nyu yhun. Anyugun le thungi kethyü senye kecha Anakim nyu hontse thon.

¹¹Anakim nyu hontse mele anyugun lope Rephaim nyu le tsehü; ai Moab nyu le Emim nyu le tse anyugun kohü.

¹²Hor nyu le Edom nyu yhun hü ai Esau tsipwen le anyugun hüla lo a-senye nkelao tsünyu bin lola, Israel nyu le kenkhin ki Npugü le pe anyugun ketsü kazü nyu anyu shwikerüchün nyu tsü kela hontse.)

¹³“Tson-o Npugü le ngun ka zokeshü hontse ngun le Zered züri pfüthüla.

¹⁴Hile ngun le Kadesh Barnea nken kethyü chen shenryüo tetse ka. Anyugun le tson lati tse Npugü le zo keshü hontse shenhe tsügü teri temi aphu siküla.

¹⁵Npugü le anyugun aphu nke le kemvuthen anyugun ntsun lola.

¹⁶“Anyugun aphu sikela siki,

¹⁷Npugü le ngun ka zoshü,

¹⁸Nthu hagun le Ar tson then-o Moab kazü pfüthü ti.

¹⁹Hagun le tson-o Lot tsipwen, Ammon nyu kazü khonni gü ti. Anyugun keü nmvue anyu zen teri thyü nya, ale pe anyugun tsükela kazü keshanyue pe hagun tsü kemvui genyu.’ ”

²⁰(Higü hi ko pe Rephaim nyu kazü tse kohü, nduka tsünyu keyhun nyu zen ka; ai Ammon nyu le tsüpe Zamzummim tse kohü.

²¹Anyugun le Anakim nyu hontse thon. Anyugun temi kechon le bin lo kvusa kethyü senye nme. Ai Npugü le tsüdan nkelao, Ammon nyu no anyugun kazü tsü lolo lao tsünyu yhun lola.

²²Npugü le Edom rincho ki keyhun Esau tsipwen nyu ge ko tsü hontse thyüla. A-le Hor nyu nkelao Edom nyu no anyugun kazü lolao ntsokae tsünyu yhun bin nyo.

²³Lo Cret zü kehun kazü nyu temi le Mediterranean kerhon ka bin hü. Anyugun le tsünyu yhun keri Avvim nyu nke lao tesin zin Gaza nyida keti anyu kazü aphu lo lola.)

²⁴“Ngun le Moab pfüthü kela siki Npugü le ngun ka zoshü, ‘Tsonchüo Arnon züri nken lo. Ale Heshbon ka Amor nyu raja Sihon lo a-kazü tse pe hagun ben nyu shü laso. A-wheo a-kazü khin lolo.

²⁵Nthu gerho a le temi lika hika kebin aphu no hagun nshvuti. Hagun zan zoshülo temi aphu nshvuo a-ke nsü ti.’

²⁶“Ale Kedemoth kazü kesi ka Gwatho titse lilonyu nipe Heshbon raja Sihon kishü:

²⁷‘Agun no n kazü pfüthü lota. Agun le tsonda nken mvuo njü tin lati.

²⁸Agun chvü lo ketsü zü a-min thyüti. Agun le nnyü kebin gü le agun no n kazü pfüthü chwi lota,

²⁹agun le Jordan züri nken-o Npugü agun Sunggigü le pe agun tsü kebin kazü nyu gülo kemvu then. Edom nyu yhun kebin Esau tsipwen lo Ar nyu kebin Moab nyu le agun khin mvuo agun no anyugun kazü pfüthü lole.’

³⁰“Ai raja Sihon le ngun no a-kazü pfüthü mvula. Npugü hagun Sunggigü le ngun no Sihon so kvulo lao nthu ngun le sen kebin a-kazü gü hi nkhen lo nrün genyu a-nyun thyü pe rüla.

³¹“Tsontsin Npugü le aka zoshü, ‘Shwishü, ale raja Sihon lo a-kazü pe ntsü bin laso; a-kazü lolo-o tsünyu binlo.’

³²Sihon le a-temi aphu zen-o ngun zen kega titse Tahaz nyida khoka ryü,

³³ai Npugü ngun Sunggigü le a-khipe ngun ben nyu shüla, tson-o agun le a, a-nyudan lo a-temi aphu boshvula.

³⁴Lo ngun le anyugun rünyi aphu lolo-o tsünyu peche, tenu, lo ntsenyu aphu boshvula. Ngun le temi nme-e kheshümvu.

³⁵Ngun le tsünyu senru lo kenya dan khi lola.

³⁶Npugü ngun Sunggigü le ngun no Arnon ketejon teka kebin Aroer lo ketejon lvu ki nyida ka gü Gilead lolo la keti. Nyida chwida agun genyu nkori kela nme ndi.

³⁷Ai agun le Npugü ngun Sunggigü le gü nyalo tse keshü, Ammon nyu kazü Jabbok züri zhie, rincho rünyi dan, nmvu kecha nme khonni gü mvu.