Read Southern Rengma Naga TEJVÜZONIKESHÜ 20 Bible Online

TEJVÜZONIKESHÜ 20 - Southern Rengma Naga bible

TEJVÜZONIKESHÜ 20

¹“Hagun le hagun shwinyü kemvu nyu zen teri thyü titse chwio, anyugun kerugari, keru lo rihü hagun nyeki chon kethyü hyue nshvu lanya. Npugü hagun Sunggigü Ijipt nyu hagun kenishwi keshü güle hagun zen hüti.

²Hagun le teri thyü keso mhundyü püshükeda nyu nme no mhundyü chwiryüo rihü dan ka,

³‘Israel nyu temi dan, nyülo! Nthu hagun le terinyu gü zhünyo. Hagun shwikerüchün nyu nshvu, nyunshe, nmvue hagun ke nsü nya.

⁴Npugü hagun Sunggigü le hagun zen gü zhü nyo, lo a-le kvukelo pe hagun tsü ti.’

⁵“Tson-o kedanyu dan le temi dan ka, ‘Ka nme thyülo-o tsü thyükenshün la kemvu peha le hika bin nle? Tsonya tselo, a-no kaki gun la. Kemvu we, a-le terinyu si lalo, temi kechanyu peha le a-ka thyükenshün ti.

⁶Vain low tsüshüo a-sha kelü gwenkho hyulo kemvu peha le hika bin nle? Tsonya tselo, a-no ka ki gun la. Kemvu we, a-le terinyu silalo temi kechanyu peha le a-vainzu gü tsüti.

⁷Tenu lo titse ketso kenjü peha le hika bin nle? Tsonya tselo a-no ka ki gunla. Kemvu we, a-le terinyu si lalo, temi kechanyu peha le a-le ketso kenjü gi lo lati.

⁸“Kedanyu dan le temidan ka hihontse zosin shüti, ‘Nyushe lo nshvu kebin peha le hika bin nle? Tsonya tselo, a-no ka ki gun la. kemvu we, a-le kechanyu nyun thyünshe lati.’

⁹Tson-o kedanyu dan le rihünyu ka jozo thü shülo a-dandan so sharhi nyu kejülo ti.

¹⁰“Hagun le nyida nme hü titse gülo, a-keri le anyugun no hagun hensin ryü lalo tse zoshü.

¹¹Tson-o anyugun le khinrun khinshe shüo hagun hensin ryü lalo, anyugun aphu hagun do thyüo hagun tho thyüti.

¹²Ai nyida tsügü temi dan le hagun hensin ryü mvuo teri thyüti tse lo hagun rihü dan no tsü hunlo.

¹³Lo Npugü hagun Sunggigü le hagun no nyida tsü lolo, lo tsünyu peche aphu dushvula.

¹⁴Tson-e hagun le nyida tsünyu, tenunyu, ntsenyu, senru lo nyida tsügü nyu tha lihi-e pe hagun hon thyü logwa. Hagun le hagun shwikerüchün nyu hon aphu sen logwa. Npugü le tsü pe hagun tsü laso.

¹⁵Hagun le bin nrün kazü gü nyu mvuo nithen ki nyida dan ge tsühontse thyüti.

¹⁶“Ai Npugü hagun Sunggigü le pe hagun ketsü kazü gü nyu nyida dan tsü lolo, lo temi aphu dushvula.

¹⁷Temi dan aphu nkela: Hitnyu, Amornyu, Kanannyu, Periznyu, Hivtnyu lo Jebus nyu, Npugü le ahza khi keshü hontse.

¹⁸Anyugun no anyu tero rüshvu kehü kentsükenchen aphu pe hagun senthyü shüo hagun no Npugü mhundyü nyu mula mvu nrün genyu, anyugun dushvu lalo.

¹⁹“Hagun le nyida nme lolo titse jonkethon hunpfü bin yatse-e, tsünyu terasha bin phün lanya. A-sha tyülo ai a-bin nkenya. Senbin le hagun shwikerüchün nyu kemvu.

²⁰Hagun le senbin kecha phün sen gü nyida gü lolo kemvu then hun logwa.