Read Southern Rengma Naga TEJVÜZONIKESHÜ 21 Bible Online

TEJVÜZONIKESHÜ 21 - Southern Rengma Naga bible

TEJVÜZONIKESHÜ 21

¹“Npugü hagun Sunggigü le pe hagun ketsü kazü nyu low ki temi dushvu kenjü hyulo, lo segü le a-dushvulayo shamvu yatselo.

²Hagun sharhinyu lo jünkera nyu le gü kesimin hyu kelo bin temhun rünyi dan le dikho nithen yo ndoti.

³Tson-o kesimin hyu kelo bin kho kenitsin rünyi günyu sharhinyu le sen-o kam thyü mvushü kethyü methu bwe nme kejü loti.

⁴Anyugun le tsü sen tsügü züle sinla hü kemvu rinyu nme khoka low tsühü kemvu bin nme nyu methu gü gunda bose lati.

⁵Lo Levinyu püshükeda dan ko tsüka güti, kechamvule kevü kebin aphu anyugun le penronshü hü nyo. Npugü hagun Sunggigü le anyugun no a-lothyü lo a-zan nyu jochü pe metsü titse kejülo kela genyu.

⁶Tson-o mele dushvu kela gü hyukelo bin khokeni tsin rünyi gü nyu sharhinyu aphu methu gü soge a-ben tseo

⁷zoti, ‘Agun le temi gü dushvu mvu, lo segü le dushvu yo agun le shamvu le.

⁸Npugü, nle Ijipt nyu kenishwi keshü ntemi Israel nyu kemu jü shülo. Agun kemu jü shülo lo kemu kendinyu nme dukeshvu khvu hipe agun ge shü nyalo.’

⁹Tson-o Npugü le thyü lotse keshü gü thyülao, hagun le medukeshvu khvu gü tsü pvü mvu loti.

¹⁰“Npugü hagun Sunggigü le terinyu kvukelo pe hagun tsüo do tünlo,

¹¹lo tsüdan nyu tenu nyu kezegwa nkenyü kethyü hyu lo-o lonyü yatselo;

¹²tsügi zen nka ki ryüo, a-pe thula lo a-tsenlvula,

¹³lo a phinya kelula. Tson-o nkanyu bin-o shyeme a-pepvünyu chechü ti; tsü siki nyu nle a-zenbin logwa.

¹⁴Tsü siki nle a-tepenmvu yatselo, a-no a-keshathyü tinla logwa. Nle a-kemvuthyüo a-zen kengü yhun kela genyu a-khipe do hontse nmvue ajwe lo nrün ndi.

¹⁵“Temi nme le tenu kenyhun lo-o mihvu nren pechenyu nnyu pe a-tsü, ai peche nnyun lo kerigü tsüle a-nu a-yhüdyü gü nyu kemvu la.

¹⁶Tsonyatselo temi gü le a-kenya kenjün pe a-nyenyu dan ketsü ka, a-le a-nu a-yhüdyü gü so kechathyüo a-nyurigü jün pe tsügi nyu tsülo nrün ndi.

¹⁷Tsügü le a-nu a-yhüdyü gi nyu mvu yatse-e a-le kenya jünhvu pe a-nyurigü tsüti. Temi le a nyurigü shao, a-le hyulo kezü kho pe a-tsü mvuloshvu.

¹⁸“Keshanyu laka temi nme le a-nyu peche meron lomvu lo me ntsun kehü le bin, nyu tsügü le a-pepvünyu le a-senthyü-e nyümvu.

¹⁹Tsonya tselo a-pepvünyu le a-zenryü a-le yhun kehü rünyi nyu sharhi nyu mhundyü nyu so-o a-ketsoti.

²⁰A-pvü a-jvü hvu le me ka, ‘Nyu higü le meronlomvu lo me ntsun-o ayi khwenyü hümvu; a-le raka kenthyü lo nzü hü nle.’

²¹Tson shü lo nyida günyu temi dan le tso pe jonshvu lati, tson-o hagun le gwakemvu higü thyü kenshün loti. Israel nyu a phu tsünyü lo-o nshvu lati.

²²“Temi nme le kemuthyü kela genyu pe senbin nme ge hü shvu la yatselo,

²³tsüno khensin tsühontse bin nya. Tsü jonnyü sunla mvuloshvu, kesimin pe senbin ge hü kenjü le Sunggigü nyunkekhü senryü kazü günyu shü kehü genyu. Npugü hagun Sunggigü le pe hagun ketsü kazü gü nrhumvu nrün genyu simin gü sun lalo.