Read Southern Rengma Naga TEJVÜZONIKESHÜ 22 Bible Online

TEJVÜZONIKESHÜ 22 - Southern Rengma Naga bible

TEJVÜZONIKESHÜ 22

¹“Nle Israel nyu nme methu nmvue tanyü le a-ron pvüshweo tin kejü hyue, tsü hyukemvu hontse lanya; sen niryü atsüshü mvu loshvu.

²Ai a-le nithen ki bin nmvue a-npunyu shamvu yatselo, zen-o ka ki ryüla. Tson-o a-npunyu le füryü lo pe tsüshü.

³Hagun Israel nyu le nmhen kela gada, phi, nmvue lihi-e hyu lolo tsü hontse lo.

⁴“Nle Israel nyu nme gada nmvue methu le nto kebin hyulo, hyukemvu hontse la nya, a-cheo penso pe no rhunnilo mvulo shvu.

⁵“Tenunyu le pechenyu phinya bennya lo peche nyue tenunyu phinya bennya; Npugü hagun Sunggigü le temi tson kethyü nyu ntsü hü nyo.

⁶“Nle senbin nme ge nmvue kazü nyu tegü seü nme nyu a-tsü le a-zü gwen nmvue a-nyuzen hü yatselo a-tsü tünlo lanya.

⁷Nle a-nyu khilo gwa, ai a-tsü we no tinla mvuloshvu, tsonya tselo nle yhunthon lo nnya loti.

⁸“Nle ka keshün nme thyülo, nka soge a-tekehun thyüla mvu loshvu. Tson yatselo temi peha le nto silae tsüle nkhvü kemvu.

⁹“Vain low nyutsü ntsi kecha pe shü nya; tson yatselo nle vainsha nmvue kecha gü-e sen lo nrün ndi.

¹⁰“Methu tse nme lo gada nme tse kerhün sen low tso nya.

¹¹“Thyühü lo linen kerhün pe kedo phi ben nya.

¹²“Hagun phi quenzi ka tejvü khilo.

¹³“Keshanyu laka temi nme le lünyu nme lolo njüo, tsü siki khekela kerüchün genyu,

¹⁴nkuo tsü le au bin kelo ka phusen mvuletse a-nmu la.

¹⁵“Hihontselo, lünyugi pepvünyu le lünyugi le phusen tse kethyü tsinshü nrün tezi le yünkela sunkethyü zhü kela sen ryü jokera bin nyu rünyi gü sharhi dan hiti.

¹⁶Lünyu gi a-pvü le anyugun ka hihontse zoti, ‘Ale anyugi pe temi higü ka sunthyü shü, lo ntso ka we a-le anyugi lonyü mvulaso.

¹⁷A-le nkuo au sunthyü kelo ka anyugi le phusen mvule tse pe a-nmu bin nle. Ai a nyugi le phusen tse tsin keshü le hika re, tezi le yünkela sunkethyü zhükela shwishüta!

¹⁸Tson-o rünyi sharhi nyu le a-nyepvü tenpe vüti.

¹⁹Anyugun le rakagi tsime npu pe lünyugi a-pvü tsüti, temi güle kezha kepvü senryü Israel nyu lünyu ge keshü genyu. Tsü nyeki tsügi no a-nu thyü binti, a-keyhun then a-khela lo nrün ndi.

²⁰“Ai a-nmu kebin tsü ketsin thyüo lünyu gü le phusen tse tsinshü lo kegwa ndi yatselo,

²¹anyugun le a-zen a-pvü kaki kegü tson ka ryüo nyida günyu pechenyu dan no tso pe a-jonshvu lati. A-le kalu mvuo a-pvü kanyu yhun kebin ka keyülao ntemi dan nyu kezha kepvü tha kethyü genyu. Hihontse hagun le gwa kemvu higü thyü kenshünlo.

²²“Temi nme le mekechanyu nu zenzhü bin-o hyu lolo, au mihvu nre no siti. Hihontse hagun le gwakemvu higü thyü kenshünlo.

²³“Rünyi nme nyu temi nme le mele ketso kenjü lünyu nme zenzhü bin-o tünlo.

²⁴Tson yatselo hagun le au zen nyida gü nken chwigü tso pe jonshvu lati. Lünyu gü le siti, a-le rünyi nyu bin-e meno a-keche lo tse nrashü kemvu genyu. Peche gü ko siti, a-le mele ketso kela lünyu zenzhü kela genyu. Hihontse hagun le gwakemvu higü thyü kenshünlo.

²⁵“Temi nme le lojvu ki mele ketso kenjü lünyu nme zenzhü laya tselo. Peche gü nti no siti;

²⁶tenugi ge thame thyü loho, a-le sila kekü kemu thyü kemvu genyu. Hile temi nme le kechanyu nme nden-o dushvu kela au keme.

²⁷Temi gü le lojvu ki mele ketso kenjü gi süo tsügi le nra shüe a-keche keloi mi kendi genyu.

²⁸“Temi nme le mele ketso mvuzun kethyü lünyu nme sü bin-o tünlo.

²⁹Tson yatselo a-le senhügi mi rakagi henpvün pe lünyu gü a-pvü tsüti, lo a-le tsügi kemvuthyüo zenzhü kela genyu tsügi le a-nu thyü lati. A-le yhunkebin then tsügi khelo nrün ndi.

³⁰“Temi nme-e a-pvü nunyu zenzhüo a-pvü nshwe lo nrün ndi.