Read Southern Rengma Naga TEJVÜZONIKESHÜ 23 Bible Online

TEJVÜZONIKESHÜ 23 - Southern Rengma Naga bible

TEJVÜZONIKESHÜ 23

¹“Temi a-züshe thyükela nmvue a-zü rüthü kela nyu no Npugü temi dan nyu kerhün loho.

²“Teshvunyu nmvue tson kethyü nyu tsipwen no phu tseryü kie Npugü temi dan nyu kerhün loho.

³“Amornyu nmvue Moabnyu tsipwen phu tseryü kie no Npugü temi dan kerhün loho.

⁴Hagun le Ijipt ki bin-o chwiryü kejü ka anyugun le ketyüketsü pe hagun tsümvu lo Mesopotamia nyu nyida gü Pethor ka Beor nyugü Balaam jonshe zenryü shochün pe hagun ketsü genyu.

⁵Ai Npugü hagun Sunggigü le Balaam khwenyümvu, a-le hagun so kehü genyu shochün gü kelu pe jochü thyüla.

⁶Hagun le senye nme thyü kebin then senye hidan keche nmvue anyugun thyü pe no gwakenye lonya.

⁷“Edom nyu ntsünya; anyugun le hagun shvunye. Ijipt nyu ntsünya; hagun le gwengwa anyugun kazü ki yhun kethyü genyu.

⁸Phushen güka anyugun tsipwen swüpe Npugü temi dan nyu shü logwa.

⁹“Hagun le teri kensenbin nyu kebin ka, hagun thyü nrhu lalo kegwa lihi nyue kekhenilo mvulo shvu.

¹⁰Temi nme le khejenyu a-minki nshünmvu laya tselo, a-le kensenbin tegwen ki gü bin ti.

¹¹Tson-o ngwün ki zülu lao yhüko kecheki kensenbin nyu niryü ti.

¹²“Hagun le mvulokeshvu ka rüyülo kegwa tegwen ki kensenbin nme no bin ti.

¹³Nkanyükarun dan nyu thün nme ko senlo, tson-o kazü run shüo vüzun lalo henla mvuloshvu.

¹⁴Npugü hagun Sunggigü le kensenbin nyu bin-o hagun ntsen lo shwikerüchün nyu so kvukelo pe hagun tsü kebin genyu kensenbin no nshün binlo. Shwikeshvu tho thyü shüo Npugü no hagun kheo ranila nya.

¹⁵“Do nme le a-npunyu kanyu tin-o nfü ryüya tselo, a-nini shü nya.

¹⁶A-le hagun rünyi lika hika a-kenyü günyu bin lo gwa, hagun le a-nshwe nya.

¹⁷“Israel nyu peche nmvue tenu-e kershvubin nyu keyüla chün ketyü thothyü lo nrün ndi.

¹⁸Lo zoshwishü kenjü thyü pen titseo hihontse kethyü ka chün kelo pisa sen-o Npugü hagun Sunggigü kanyu ryü nya. Npugü le kershvubin nyu keyüla chün ketyü nyu shwi ntsü hü.

¹⁹“Nle pisa nmvue ketyüketsü nmvue tha lihi-e pe Israel nyu tepu keshüka kechwi lonya.

²⁰Nle pe tesin tepu keshüka kechwi lo logwa, ai pe n npvü ntemi Israel nyu tepu keshüka we lonya. Tejvü hidan thenlo lo hagun le gü nkhenlo titse kebin kazü günyu hagun tho aphu nyu Npugü hagun Sunggigü le jochü pe hagun tsüti.

²¹“Nle Npugü n Sunggigü zen keswe nme thyüshü yatselo, nle zoshwi keshü tsü thyümvu lanya; Npugü le nle swe kenjü tsü hiti lo tsü thyü kemvu le kemu.

²²Npugü zen-o keswe thyü kemvu genyu kemu ndi,

²³ai nle nkenyüo zoshü yatselo, tsü then mvulo shvutsin.

²⁴“Nle tsonthen-o temi peha vain low nyu gü kethyü ka, vainsha ntyükenyü tyü logwa, ai nle tsü pe nthakhin ka shüpvü tin nya.

²⁵Nle tsonthen-o temi peha ndasha low nyu gü kethyü ka, nle nben pe lülo kegwa kho lütyülo ai nle jonkhi pe bin me-e rülo nrün ndi.