Read Southern Rengma Naga TEJVÜZONIKESHÜ 24 Bible Online

TEJVÜZONIKESHÜ 24 - Southern Rengma Naga bible

TEJVÜZONIKESHÜ 24

¹“Temi nme le tenu nme lolo njüo a-rüla peha shwi a-kenyü mvuo khela titse rhilo la. Tsügenyu khekela lesü thu pe tsüshüo a-kanyu nishwi shü.

²Tson-o tsügi le peche kecha nme ka kalu,

³lo temi tsügü ko tsügi le a-kenyü mvuo khekela lesü thu nipe tsüo a-kanyu nishwi la. Nmvue a-nyepvü kenyhun güle sila.

⁴Lihithyü lae a-nyepvü kerigü le tsügi loni lo shvu; a-le tsügi le rhulaso tsela ti. A-le tsügi loni yatselo Npugü mhundyü ka thyüzü laso. Npugü hagun Sunggigü le pe hagun tsü kebin kazü günyu kemu ketetsin tson kethyü tsü thyü nya.

⁵“Temi nme le tenu lo terika, a-nipe terinyu shü nmvue süda lotho kecha pe tenyen nya; a-no chenme thatho thyü mvuo rüyü loti, a-no kanyu bin-o a-nu no a-kenyü nrün genyu.

⁶“Hagun le tha peha pe me tepu shüo a-le thalo mvu lalo lo nrün genyu a-shye kekerütso khilo lanya. Tsü le a-kami no yhunlo nrün genyu anyugun chvü ndo shü kehü khilo laso.

⁷“Israel nyu ligü higü Israel nyu nme rühu sen gü a-dothyü nmvue jwe bin yatselo no siti. Hihontse hagun gwakemvu hithyü kenshünlo.

⁸“Nyu le ketyü keha le hagun ge bin yatselo, püshükeda nyu le hagun kanyu zo shüyo thyümvu loshvu; ale anyugun senthyü keshü tsü thenlo.

⁹Hagun le Ijipt ki bin-o chwiryü kejü ka Npugü hagun Sunggigü le Miriam ge nyuthyü shüyo rüchün lo.

¹⁰“Nle tha peha pe temi nme tepu keshü ka, a-le tha lomvu lope ntsüti tse keshü phigü khilo titse a-kaki gü nya;

¹¹Kamhun ki khwe bin-o no tsü senryü ntsülo.

¹²A-le rhokedyü nyu nme yatselo kheje me-e tsü ntsen lola nya;

¹³a-no ben zhü lo nrün genyu kheje gü tsü pe a-tsüla la tselo. Tsonya tselo a-le ncheno ti lo Npugü n Sunggigü le nshwi a-kenyü ti.

¹⁴“Hagun le Israel nyu nmvue tesin hagun rünyi nyu kebin tha ndi lo rhodyüo chüntyü kehü nyue nshwe nya.

¹⁵Khenyütsen yhüko keche mhundyü tsü jonnyü a-chün pe tsüla; a-le senmvu loshvu kebin pisa gütsü rüchün bin hü nyo. Nle pe a-tsü mvulo a-le nrao Npugü ki nge kenyo shülo, nle mu lati.

¹⁶“Anyenyu kemu genyu a-pepvünyu no si loho, lo a-pepvü nyu kemu genyu a-nyenyu no si loho; temi nme le a-npvü a-kemu genyu nti siti.

¹⁷“Tesin lo tegonyu kenjü le kebin tejü lanya; nmvue magi nyu nme le tepu lo-o thalo kemvu genyu a-phi khilo lanya.

¹⁸Hagun le Ijipt ki medo thyü kebin Npugü hagun Sunggigü le hagun hokeshü rüchünlo; tsügenyu ale jo higü hoshü pe hagun tsü bin nyo.

¹⁹“Hagun le lowgvü kethyü ka lopwe peha gvü lomvu lalo tsü füni günya; tsü khepe tesin, tegonyu lo maginyu tsüla, tsonya tselo Npugü hagun Sunggigü le hagun tho aphu nyu jochü pe hagun tsüti.

²⁰Hagun le gwengwa oliv sha lü lolo, khe kenjü dan füni günya; tsüle tesin, tegonyu lo maginyu genyu.

²¹Hagun le gwengwa vainsha lü lolo, gwenhvu ge gü vain low ki gü nya; vainsha khe kebin tsüle tesin, tegonyu lo maginyu genyu.

²²Hagun le Ijipt ki do thyü tse kethyü nmhin nya; tsügenyu ale jo hi hoshüpe hagun tsü bin nyo.