Read Southern Rengma Naga TEJVÜZONIKESHÜ 25 Bible Online

TEJVÜZONIKESHÜ 25 - Southern Rengma Naga bible

TEJVÜZONIKESHÜ 25

¹“Keshanyulaka Israel nyu mihvu le kenya lolao jokera binki güo nme le njü lo nme le mu kela zoshwi shüla.

²Tson-o kemu gü vü titse penla yatselo, kerathü güle a-no nkhün zhü lo-o a-vüti. A-le kemu dikho thyü layo tsü rüchün-o vüti.

³Gwen henzi keti vü logwa, ai tsünyeki chon nya; tsünyechon laya tselo süda mhundyü a-le kemeni laso.

⁴“Methu tse zen shyenyu kethyü ka a-münkhen nya.

⁵“Tsasikezen mihvu le kengü yhun hüo nme le a-nyu peche ndi tse sila yatselo, a-nu no kami tsügü nken-o kechaki kalu lo nrün ndi; sikela gü sikezen gü le tsügi loti.

⁶Lo au nyu peche nyuri gü tsü pe kesigü nyu thyüti, tson-o Israel nyu dan nyu a-kami no bin ti.

⁷Ai kesigü sikezen gü le tsügi lonyümvu yatselo, tsügi le gü rünyi sharhinyu ka, ‘A nyepvü sikezen gü le a nyepvü tho age thyümvu laso; a-le Israelnyu dan nyu a-tsagü tsipwen no bin kethyü a-kendo mvula sele’ tse zoshüti.

⁸Tsonyatselo rünyi nyu sharhi dan le a-ko shüo nthon ti. Tson-e a-le tsügi lomvu le tse layatselo,

⁹a-tsagü nu tsüle rünyi sharhi nyu mhundyü ka a-ki gü a-phakü nme shwülo njüo nsü pe a-mhun dio, ‘Atsagü tsipwen khishümvu kela gü ge hihontse ti’ tse zoti.

¹⁰Tson-o Israel nyu dan nyu tsü gü kaminyu lope, ‘A-phakü tho kela kami’ tse lati.

¹¹“Mihvu le kega bin-o nme nu le a-nyepvü cheo kechagü thyümi tejen bin yatselo,

¹²tsügi shwinjün nya; a-ben duthü lalo.

¹³“Hagun le kensu sü lo tha ndo kethyü ka mesa nya.

¹⁵Npugü hagun Sunggigü le pe hagun ketsü kazü günyu yhunthon lo nrün genyu kensu sü lo tha ndo kethyü ka ketsin lo kenjü sen lo.

¹⁶Npugü le mesa kehünyu shwintsü hü nyo.

¹⁷“Hagun le Ijipt ki bin-o ryü kejü ka Amaleknyu le hagun ge nyuthyü shüyo rüchünlo.

¹⁸Anyugun le Sunggigü nshvu mvuo hagun le hokeli lo kenjünthyü kebin ka hagun nren-o mehülo ho-o siki kehü nyu aphu dushvu la.

¹⁹Tsügenyu, Npugü hagun Sunggigü le kazü gü pe hagun tsüla lo hagun tehun-o yhun kebin shwikerüchün nyu aphu ge kenshvu ndi lalo, Amaleknyu aphu dushvula mvulo shvu, tson-o temi nme-e no anyugun rüchün sin ya. Nmhin nya!