Read Southern Rengma Naga TEJVÜZONIKESHÜ 26 Bible Online

TEJVÜZONIKESHÜ 26 - Southern Rengma Naga bible

TEJVÜZONIKESHÜ 26

¹“Npugü hagun Sunggigü le pe hagun tsü kebin kazü gü lolo njüo tsünyu bin kelo siki,

²hagun nmeme tse hagun rasha lülo keridan pe rokhu nme nyu shü ntseo sen kerüshvu bin gü ki ryü mvuloshvu.

³Tson-o gü tsü gwenkho ka püshükeda thyü kebin güka, ‘Npugü a Sunggigü le pe ngun pvübon nyu tsüti tse zoshwishü kenjü kazü günyu yüryülo laso tse kethyü nthu a-chekeno thyü bin nle,’ tse zoti.

⁴“Püshükeda güle nben nyu rokhu gü khipe Npugü n Sunggigü kershvubin mhundyü ka shüti.

⁵Tson-o Npugü mhundyü nyu nle jo hidan then-o zoti: ‘Abon le nmhon kehü Aramean nyu, a-le a-kamizen tsügü Ijipt ki yhun. Anyugun temi kerho le tsüki gü, ai senye kekvu keda nme thyü lola.

⁶Ijipt nyu le agun nshwe lo agun no do hontse agun kemvuthyü pe thatho thyü.

⁷Tsüselo agun le nrao Npugü agun pvübon nyu Sunggigü ka keche hi. A-le agun kehinyülo-- lo agun kenjün kethyü, kerü lo kenshwe hyu lola.

⁸A-le a-kekvu keda lo kenko sen-o Ijipt nyu agun kenishwi shü. A-le ndun tho, thazansü lo kerükeshwe thodan thyüshü.

⁹A-le agun zen ryü kenya lo kazü kebwe hi khipe agun tsüshü.

¹⁰Tsügenyu ale ntsoka a-le khipe aketsü arasha keri senryü Npugü tsü bin nle.’ “Tson-o Npugü mhundyü ka rokhu gü penshe shüo tsüka rüshvu ti.

¹¹Npugü n Sunggigü le thakegwa pe nkami lo nketsü genyu a-cheno lo; Levinyu lo hagun dan nyu kebin tesin dan kono hagun zen-o sherhünlo.

¹²“Chen shen tsen jüntseryü jünme pe Levinyu, tesin, tegonyu lo maginyu tsülo, tson-o logwa aphu ka anyugun le tyümvu lokeshvu no bin ti. Hagun le hi thyü keshü ka,

¹³Npugü ka zoshü, ‘Kenshün hon jüntseryü jünme tsü nme akanyu ndiso; Nle ano thyülo tse keshü hontse ale pe Levinyu, tezin, tegonyu lo maginyu tsü laso. Jüntseryü jünme rüla nle johokeshü tsü ale nme zenmvu nmvue nmhinla mvu.

¹⁴Ale chechü kebin ka tsü nme tyülamvu; ale nshünmvu kebin ka tsü nme sen aka nkenchwi mvu; lo tsü nme-e pe kesinyu tsü lamvu. O Npugü, ale njozen hü nle; jüntseryü jünme rüla nle johokeshü aphu ale thyü laso.

¹⁵Tsangge nkenshün bin nyu bin-o agun nrishüo jochüpe ntemi Israel nyu tsüta; nle agun pvübon nyu ka zokeshü hontse jochü pe nle pe agun ketsü kazü kenya kebwe higü ge ko shülo.’

¹⁶“Nthu Npugü hagun Sunggigü le hagun no a-tejvü aphu zen lolo tse johoshü bin nle; tsügenyu hagun nyun ketsin thyü tsü dan zenlo.

¹⁷Nthu hagun le Npugü le hagun Sunggigü letse; a-jo zen, a-tejvü aphu thyüzen lo a-johokeshü aphu thyüti tse zoshwi shü laso.

¹⁸A-le zoshwikeshü hontse nthu nlope a-npvü a-temi letse lolo laso; lo nno a-tejvü dan aphu zen lotse nka johoshü laso.

¹⁹A-le hagun thyü pe a-le nyhun keshü senye kecha aphu nyeki gonkvu shüti, lo hagun le keshwe lo kerühvu senryü a-tsüti. A-le joshwishü kenjü hontse hagun le a-npvü a-temi thyüti.”