Read Southern Rengma Naga TEJVÜZONIKESHÜ 27 Bible Online

TEJVÜZONIKESHÜ 27 - Southern Rengma Naga bible

TEJVÜZONIKESHÜ 27

¹Mosa le Israel nyu sharhinyu dan zen-o temi dan ka zoshü. “Ale nthu pe hagun tsü kebin senkethyüjo aphu zenlo.

²Hagun le Jordan züri pfüthü gü Npugü hagun Sunggigü le pe hagun ketsü kazünyu yükelo nyü, tso keda peha sen shüo, keyün-i pe yünlo,

³tsonjüo tejvü lo senkethyüjo aphu pe tsü ge thulo. Npugü hagun pvübon nyu Sunggigü le zoshwishü kenjü kenya lo kazü kebwe günyu yükelo ka,

⁴lo Jordan perezin tso hidan pe Ebal kazüthun ge sen lo, ale nthu hagun ka zokebin hontse, lo keyün-i pe yünlo.

⁵Lo tsünyu tegi pe yhen kemvu tso pe kershvubin nme khwelo,

⁶hagun le Npugü hagun Sunggigü genyu kershvubin kethyü nme-e keyhen tso pe thyünya. Tsüka hagun le ro nrün kerüshvu dan hoshüti,

⁷tsünyu hagun le kerüshvu lo kepvüshe kerüshvu hon tyüo Npugü hagun Sunggigü mhundyü nyu shekerhün thyüti.

⁸Lo tso yün kenjü dan ge Sunggigü tejvü dan aphu thu tsentsü shüti.”

⁹Tson-o Mosa lo Levinyu püshükeda ju le kengüo Israel temi aphu ka zoshü, “Israel temi nma tse, a-jonyülo. Nthu hagunle Npugü hagun Sunggigü temi thyülo laso;

¹⁰tsügenyu a-jozen lo a-le nthu pe hagun tsü kebin a-tejvü aphu thenlo.”

¹¹Tson-o Mosa le Israel nyu temi dan ka,

¹²“Hagun le Jordan nken kelo siki jochü pe temi dan geshü solo tsipwen hidan le Gerizin kazüthun ge sobin ti: Simeon, Levi, Judah, Issachar, Josef lo Benjamin.

¹³Lo Shochün solo tsipwen hidan le Ebal kazüthun ge sobin ti: Reuben, Gad, Asher, Zebulun, Dan lo Naftali.

¹⁴Levinyu le nrasen-o jo hidan zoti:

¹⁵“ ‘Sunggigü shochün no tso, tesen, nmvue tegi pe teromen thyüo, kebuo rüshvu kehü gü ge gülo; Npugü le teromen kerüshvu ntsü hünyo.’ “Tson shülo temi aphu tse, ‘Amen!’

¹⁶“ ‘Sunggigü shochün no a-pvü nmvue a-jvü rühvu hü kemvu ligü higü ge gülo.’

¹⁷“ ‘Sunggigü shochün no a-kajon nyu terhi lakela kehü gü ge gülo.’ “Tson shülo temi aphu, ‘Amen!’

¹⁸“ ‘Sunggigü shochün no a-yhükepo nyu tson tsin zü kehü nyu ge gü lo.’ “Tson shülo temi aphu, ‘Amen!’

¹⁹Sunggigü shochün no tesin, tegonyu, lo maginyu ge kenjü gü thyüshü mvula kehü gü ge gülo.’ “Tson shülo temi aphu, ‘Amen!’

²⁰“ ‘Sunggigü shochün no a-pvü nshwen-o a-pvü nu zenzhü kela gü ge gülo!’ “Tson shülo temi aphu, ‘Amen!’

²¹“ ‘Sunggigü shochün no senru zenzhü kela gü ge gülo.’ “Tson shülo temi aphu, ‘Amen!’

²²“ ‘Sunggigü shochün no a-lügi, a-pvü nyugi, nmvue a-jvü nyugi zenzhü kehü gü ge gülo.’ “Tson shülo temi aphu, ‘Amen!’

²³“ ‘Sunggigü shochün no a-nu jvü zenzhü kela gü ge gülo.’ “Tson shülo temi aphu, ‘Amen!’

²⁴“ ‘Sunggigü shochün no kebuo me dushvu kela gü ge gülo.’ “Tson shülo temi aphu, ‘Amen!’

²⁵“ ‘Sunggigü shochün no me pisa khilo-o kemukendinyu dushvu kela gü ge gülo.’ “Tson shülo temi aphu, ‘Amen!’

²⁶“ ‘Sunggigü shochün no Sunggigü tejvü senkethyüjo aphu zenkemvu gü ge gülo.’ “Tson shülo temi aphu, ‘Amen!’