Read Southern Rengma Naga TEJVÜZONIKESHÜ 28 Bible Online

TEJVÜZONIKESHÜ 28 - Southern Rengma Naga bible

TEJVÜZONIKESHÜ 28

¹“Hagun le Npugü hagun Sunggigü jozen-o ale nthu pe hagun tsü kebin johokeshü dan thyüzen lo yatselo, a-le hagun thyü pe senye kecha aphu nyeki gon shüti.

²Npugü hagun Sunggigü jozen lo jochü hidan aphu hagun hon:

³“Npugü le jochü pe n rünyi lo n low nyu shüti.

⁴“Npugü le ntsenyu kechon, shye kesükela kethyü, methu lo tanyü jochü pe hagun tsüti.

⁵“Npugü le hagun rasha ge lo ketyüketsü kera bin nyu jochü shüti.

⁶“Npugü le hagun tha aphu nyu jochü shüti.

⁷“Npugü le hagun shwikerüchün nyu le hagun when keryü ka anyugun so kvu lati. Anyugun le tsonme nyu hagun whe titse ryü, ai tson aphu nyu hagun mhundyü tinti.

⁸“Npugü hagun Sunggigü le jochü pe hagun thanyu shüti, lo shye pe hagun süse sü shüti. A-le pe hagun tsü kebin kazü gü nyu a-le jochü pe hagun tsüti.

⁹“Hagun le Npugü hagun Sunggigü jozen lo a-johokeshü aphu thyüzen hülo, a-le zokenjü hontse hagun pe a-npvü a-temi thyüti.

¹⁰“Tson-o kazü nyu temi aphu Npugü le hagun kejü pe a-temi thyülo kela hyuo anyugun le hagun nshvuti.

¹¹“Npugü le pe hagun tsü titse hagun pvübon nyu ka zoshü kenjü kazü günyu ntsenyu kechon, senru, kechon lo shye kesü kela kethyü pe hagun tsüti.

¹²A-le tsangge a-kenyaka günyu a-gwenkho toka tsangri pe hagun tsü lo jochü pe hagun tho aphu nyu shüti, tson-o hagun le tha khipe senye kechon tepu ti, ai hagun we no nme-e ka tepu loho.

¹³Npugü hagun Sunggigü le hagun no senye dan sikethen mvu le sharhi gü thyü shüti; hagun le nthu a johokeshü aphu thyüzen hü yatselo hagun no gwakenye zin loti lo thame ka chela loho.

¹⁴Hagun le lihi thyü-e tsüdan zenmvu, nmvue tero kecha rüshvu lo lothyü tin lanya.

¹⁵“Ai hagun le Npugü hagun Sunggigü jozenmvu lo ale nthu pe hagun tsüshü kebin johokeshü lo tejvü aphu then mvu yatselo thagwa kemvu hidan aphu hagun ge ryüti:

¹⁶“Npugü le shochün pe hagun rünyi lo low nyu shüti.

¹⁷“Npugü le shochün pe hagun rasha lo ketyüketsü nda nron kebin nyu shüti.

¹⁸“Npugü le shochün shüo nnyenyu, shyeni, methu lo tanyü kerho khi shüti.

¹⁹“Ntho aphunyu Npugü shochün le bin ti.

²⁰“Nle gwakemvu thyüo Npugü kenila lo a-le kenke, kevükeben lo kenjünkethyü senryü ntho aphunyu shüti, whütse n nke la kemvuthen.

²¹Hagun le nkhenlo titse kebin kazü günyu hagun nme-e nsen kebin then a-le kenpen nishüti.

²²Npugü le kenmen lo kerüka kegekü kethyü keho pe hagun ge shüti; a-le tsangken lo keyün teshye nipe hagun low nke lati. Hagun le sila kemvuthen kenke hile hagun zen binti.

²³Tsangri shü mvuo hagun kazü no nko pe tegi hontse lati.

²⁴Hagun nkela kemvuthen, Npugü le tsangkenri sunka kenphü lo hachon tsangkenbu terhi nipe hagun nke lati.

²⁵“Npugü le hagun shwikerüchün nyu no hagun nyekvu lati. Hagun le tsonme nyu anyu whe gü, ai tson aphu nyu anyu mhundyü tin ti, tson-o kazü temi aphu hagun ge thyükeshü tsü hyu pe kekerü thyüti.

²⁶Hagun le silo, tegü lo tehenthyü le hagun simin tyü bin-e temi nme tsü hüla kethyü min ndi lati.

²⁷Npugü le Ijipt nyu ge thyü keshü hontse kinthyü nipe hagun ge shüti. A-le hagun min ge kethyüshvu no chwiryü ti. Kenga lo kenjün no hagun min jeo tsüle pon loho.

²⁸Npugü le nyun ntsen kemvu, yhükepo lo kevükeben kethyü pe hagun ge shüti.

²⁹Hagun le nhennyu yhükepo nyu hontse kese bin-e hagun tson hyu loho. Hagun le lihi thyü bin-e gwakenye loho. Me no n nshwe lo nhon selo lala tseti, lo nno kepen nme bin loho.

³⁰“Nle tenu ketso njün, ai kechanyu le lo lati. Nle kathyü shü, ai thame ka tsünyu yhun loho. Nle vain low tsü shü, ai thame ka a-sha tyü loho.

³¹N yhühyu ka nthu ga lati, ai nle a-thyü tyü loho. Nle nri kebin ka ngada süzen tin lati, lo tsü khinipe ntsü loho. Ntanyü pe nshwikerüchün nyu tsü lati, lo nno kepen nme bin loho.

³²Nyhühyu ka nnyenyu pe do hontse pe tesin tsü lati. Khenyütsen nnyenyu dan no rani keryü nripe nyhütyü nyüho pe thaja thyüti.

³³Senye kechanyu le nle nhokelio thathyü kehü nrasha aphu khilo lati, lo me no nnshwe lo nboren bin gwenzin ti.

³⁴N kenjün kethyü pvüo nnyun ntsenmvu lati.

³⁵Npugü le kethyü pon lo keho pe npha ge shüti; npesun ka tsügü nphaje keti kinthyü no süti.

³⁶“Npugü le hagun lo hagun raja zen gü sinrünyi kazü, himhundyü hagun lo hagun pvübon nyu le yhun kemvu bin ki shü lati; tsüki hagun le tesen lo tso pe teromen kethyü rüshvuti.

³⁷Npugü le hagun no kezen tin kela kazü ki temi le hagun rüla shape kerü keshvu thyüti; anyugun le hagun shwinyü lo zo pe keyü thyüti.

³⁸“Hagun le ntsi kechon shü, ai tsekhvu le tyü kela genyu kerho gvü loti.

³⁹Hagun le vain lowtsü lo nucha ti, ai nyu le vainsha tyükela genyu hagun le vainsha lü nmvue vainzu tsü loho.

⁴⁰Hagun kazü lika hikae oliv le yhun ti, ai oliv sha le nrhi kela genyu oliv terzü le bin loho.

⁴¹Hagun nyenyu peche, tenu le bin, ai teri ka ten zen tinlao, anyugun nmhen lati.

⁴²Hagun senbin lo terasha aphu nyukhu le tyü lati.

⁴³“Hagun kazü nyu kebin tesin dan le kvukenye soryü ti lo hagun le a-shvuthyü tsenyo tsü lati.

⁴⁴Anyugun le tha pe hagun tepu ti ai hagun we thame pe anyu ketepu-i ndi lati. Kenkhin ki anyu le hagun so gon ti.

⁴⁵“Hagun le Npugü hagun Sunggigü le pe hagun ketsü tejvü aphu zenmvu kela genyu hagun nkela kemvuthen shochün hidan le hagun ge ryüti.

⁴⁶Tsüdan le Sunggigü le hagun jün kera ketsin tse kethyü kethonthen hagun lo hagun nyenyu ge bin ti.

⁴⁷Tson aphu nyu Npugü le jochü pe hagun tsü, ai hagun le sherhün lo hagun nyunnyüo a-lo thyü mvula.

⁴⁸Tsügenyu hagun le Npugü le nipe hagun ntsun nrün hagun shwikerüchün nyu lothyü ti. Hagun le tha aphu rhadyüo--nnyo, teri lo bennya mvuti. Hagun nkela kemvuthen Npugü le hagun nshwe sati.

⁴⁹Npugü le kazü keni ki, hagun le a-khwe shakemvu senye senryü hagun ntsun ti. Anyugun le logi kenye hontse hagun ge tsüryü ti.

⁵⁰Anyugun le nsho sao nche peshü nme shwi njün loho.

⁵¹Anyugun le hagun senru lo shyeni-e tyü bulao, hagun no khensi ti. Anyu le hagun shyeni, vainzu, oliv terzü, senru nmvue tanyü nme kheshü loho; tson-o hagun le si lati.

⁵²Anyugun le Npugü hagun Sunggigü le pe hagun ketsü kazü günyu rünyi aphu, hagun le tenyen kehü chwida ketetso dan le chela kemvuthen hagun wheti.

⁵³“Shwikerüchün nyu le hagun rünyi hunpfü keloka ketyüketsü rhokedyü thyüo Npugü hagun Sunggigü le pe hagun ketsü hagun nyenyue tyüti.

⁵⁴Mele hagun hunpfü lo kelaka teshwe kepfü kakhwün nyu nnyu kelo temi kegwatsin gü-e ketyüketsü kendi genyu rhokedyü thyüo a-nyenyu peha tyüti. A-le tsü pe a-sikezengü, a-le so kehü a-nu, nmvue a-nyenyu rhün kebin dan-e tsü loho.

⁵⁵

⁵⁶Teshwe kepfü kakhwün nyu nnyu kelo tenunyu kegwatsin gi, nnyasa kethyü genyu tsonchüo thame ka gühü kemvu gi-e tsü hontse ti. Shwikerüchün nyu le tsügi rünyi hunpfü keloka a-le ketyüketsü, ndi pe rhokedyü thyüo a-le kebuo a-nyu nnyulo terie tyüti lo a-nyu kecha dan-e tyüti. Tsügi le tsüpe a-keso a-nyepvü nmvue a-nyenyue zen kenjün loho.

⁵⁷

⁵⁸“Hagun le ketsin thyüo lesü hinyu thu kenjü Sunggigü senkethyüjo aphu zenmvu, Ndun lo kenrin kethyü Npugü hagun Sunggigü zan rühvu mvu yatselo,

⁵⁹a-le pon kemvui kethyü kenyü lo khela kemvui kenpen nipe hagun lo hagun nyenyu ge shüti.

⁶⁰A-le hagun le Ijipt ki shalao nshvu kehü kethyü kenyü aphu sen niryü hagun ge shüti, lo thame kae pon loho.

⁶¹A-le Sunggigü tejvü lo senkethyüjo hinyu thu kemvu kethyü kenyü lo kenpen aphu senryü hagun nke lati.

⁶²Hagun le chon pe tsangge shyenyü hontse bin-e Npugü hagun Sunggigü jozen kemvu genyu kerho nti le rhünlo ti.

⁶³Npugü le hagun no gwa kenye lo chon kenye kelo le a-kenyü kethyü tsü hontse hagun nke nmhü kela le a-kenyü lati. Hagun le nkhenlo titse kebin günyu hagun menjwi lati.

⁶⁴“Npugü le hagun no nrenruo kazü nmezin gü kechazin keniketi, senye aphu dan nyu shü lati, lo tsüki hagun le himhundyü hagun lo hagun pvübon nyue rüshvu hükemvu tero, tesen lo tso pe kethyü dan lothyü tin lati.

⁶⁵Hagun le lika hikae nyunkebwe, lo hagun hon tse keko bin hyu loho; Npugü le nyunkenkhi, rhokedyü lo shekese nyun pe hagun ge shüti.

⁶⁶Azintse hagun keyhun le kenshvu nyu binti. Nhennyu lo khejenyue nrünho lo hagun le kesi nshvuzin-o yhun ti.

⁶⁷Hagun le lihi hyu shü-e nshvu pe hagun nyun thunthun tseti. Lonyü tsen ngwün gü nnyü, lo ngwüntsen lonyü nnyüho tseti.

⁶⁸Npugü le hagun no thame kae Ijipt ki nigü loho tse zoshü-e a-le run nyu hagun nipe tsüki shüti. Tsüki hagun le hagun npvü hagun pe do hontse shwikerüchün nyu ka jwe soti, ai temi nme hagun heinyü loho.”