Read Southern Rengma Naga TEJVÜZONIKESHÜ 29 Bible Online

TEJVÜZONIKESHÜ 29 - Southern Rengma Naga bible

TEJVÜZONIKESHÜ 29

¹Moab kazünyu Npugü le Mosa no Israel nyu temi zen-o hidan hi kejozen lolo tse johoshü; hidan hile Npugü le Sinai Kazüthun ka anyu zen-o kejozen kelo dan sin keshü.

²Mosa le Israel nyu aphu ko kequen lo-o anyugun ka zoshü, “Npugü le Ijipt rajagü, a-hensin kedanyu, lo a-kazü ka nyu thyü shüyo hagun npvü hyu laso.

³Hagun le kenpen kenrin kethyü, zansü, lo nduntho keda dan Npugü le thyü keshü hyu laso.

⁴Ai nthu keti a-le hagun no shakela dan rüchün kekha lomvu zun.

⁵Chen henzi Npugü le hagun tsonrio kazükesi nyu ho, hagun phinya lo phakü le ren lamvu.

⁶A-le hagun Sunggigü letse hagun senthyü shü nrün genyu, hagun le tensü, vainzu nmvue zukekvu senmvu, ai Npugü le hagun senmvulo keshvu aphu pe hagun tsüshü.

⁷Lo ngun le bin hinyu ryükelo ka Heshbon Raja Sihon, lo Bashan raja Og le ngun nren titse chwiryü. Ai ngun le anyu nyeki kvula,

⁸tson-o anyugun kazü lolo-o pe Reuben, Gad lo Manasseh tsipwen ponha tse kenjün la.

⁹Tsügenyu Kejozenkelo hi aphu then lo, tson yatselo hagun tho aphunyu gwa loti.

¹⁰“Nthu hagun le Npugü hagun Sunggigü mhundyü nyu sobin hagun, sharhinyu, kedanyu, lo temidan,

¹¹tenunyu, ntsenyu, lo tesin hagun dan nyu yhun-o hagun senlü lo züpfü kehünyu aphu.

¹²Hagun le nthu Npugü hagun Sunggigü zen kejozen kelo nyu yü lo tsü then titse hika bin nyo,

¹³tson-o Npugü le hagun pvübon nyu, Abraham, Isak lo Jakob lo hagun ka zokenjü hontse hagun le a-temi lo a-le hagun Sunggigü tse kethyü ketsenishü nrün genyu.

¹⁴Npugü le hagun npvü zen-o kejozen kelo thyümvulo keshvu higü thyübinmvu.

¹⁵A-le nthu ngun hinyu a-mhundyü ka so kebin aphu lo ngun tsipwen nnyu lo nrün dan sin-o thyü bin nyo.

¹⁶“Ijipt ki keyhun le dihontse lo dihontse senye kechadan kazü pfüthüo njwe ryü yo hagun le tsü rüchün lo.

¹⁷Anyugun le tesen, tso, rakagi lo suna pe teromen kentsükenchen thyü kehü hagun le hyu laso.

¹⁸Nthu hinyu so kebin, peche, tenu, kakhwün nmvue kami nme Npugü hagun Sunggigü kheo rani gü senye kecha tero rüshvu mvu titse rüchün tonlo. Hile senmen nme ge kekhü lo türün bin le sen chwi keryü hontse lati.

¹⁹Nthu hinyu bin-o jo hidan nyü kelo nyu nme da no, a-le a-nyunrüo a-kendo thyü bin-e thame mvu letse lamvu nrün rüchün tonlo. Tsüle hagun kegwanyu lo keshvunyu aphu kesin nke lati.

²⁰Npugü le temi tson kehü nyu kemu jüshü loho. Ai Npugü nyun kekhü le ma kenyü hontse a-ntsun ti, lo Npugü le a-nkeshü la kemvuthen lesü hinyu thu kebin kenke aphu a-ge ryüti.

²¹Npugü le kejozenkelo nyu shochün Npugü senkethyü lesünyu thu kenjü aphu senryü a-ge shüo a-pe Israel nyu tsipwen aphu mhundyü nyu tsinhi nme thyüti.

²²“Sheshün ki hagun nyenyu lo kazü nithen ki keryü tesin no Npugü le kenke lo kenjün kethyü senryü hagun kazü nyu keshü hyuti.

²³Mahtso lo tsi no low süo khepe tha no yhun mvu lati; thatsi nmvue jontsü no tsünyu yhun loho. Hagun kazü le Npugü le a-nyunta kelo ka Sodom, Gomorrah lo Admah lo Zeboiim nke kela hontse lati.

²⁴Tson-o kazü apentha no, ‘Nyu genyu Npugü le kazü higü ge hi thyü shüla?’ ‘Nyukon ka a-le anyunta rila ola?’

²⁵Tsü kenikeshü le, ‘Npugü temi dan le, anyugun pvübon nyu Sunggigü le Ijipt ki a nyu zen chwi keryü ka anyuzen kejozenkelo gü borhola.

²⁶Anyugun le himhundyü thame ka rüshvu hü kemvu tero, Npugü le anyugun no rüshvu nya lotse khin kehü gü lothyü tinla.

²⁷Tsügenyu Npugü le temi hidan ge anyuntao lesü hinyu thu kenjü kenke aphu sen ryü anyugun kazü nyu shü laso.

²⁸Npugü le anyunta salao anyugun kazü nyu anyu menphü lo njüo anyu shwe pe tesin kazü ki shü lao anyu le nthu tsüki bin nle.’ tse zoti.

²⁹“Npugü ngun Sunggigü le kebukenjü peha le bin; ai a-le a-tejvü henshwi shü kela tsü le ngun lo ngun nyenyu le kethonthen tsü then ti.