Read Southern Rengma Naga TEJVÜZONIKESHÜ 3 Bible Online

TEJVÜZONIKESHÜ 3 - Southern Rengma Naga bible

TEJVÜZONIKESHÜ 3

¹“Tsüsika, ngun le ketuo tesozin Bashan lojvu kipon gü, lo tsünyu raja Og le a-temi aphu zen Edrei rünyi khoka ngun zen kega titse ryü.

²Ai Npugü le aka zoshü, ‘A-nshvunya. Ale a-, a-temi lo a-kazü aphu pe ntsü lati. Tsügenyu Heshbon ka keda thyü kebin Amor nyu raja Sihon ge thyü keshü hontse a-ge thyü shülo.’

³“Tson-o Npugü le raja Og lo a-temi pe ngun ben nyu shüo, ngun le anyugun aphu boshvula.

⁴Ngun le a-rünyi aphu lolo la loti kemvu nme ndi. Bashan nyu raja Og le keda thyü kebin Argob, lojvu apentha lola-aphu le rünyi hentsero.

⁵Nyida hidan aphu chwida thyü tetsosa pe hun lo khin run khincha thyü kü, lo chwida kendi ko rünyi kechon le bin.

⁶Ngun le Heshbon ka raja Sihon ge kethyü hontse nyida dan nkela lo tsünyu pecye, tenu, lo ntsenyu aphu boshvula.

⁷Ngun le nyida tsüdan ka senru lo kanyü dan kholo la, lo nyida dan nkela.

⁸“Tsügwenkho ka Amor raja tsühvu kazü Jordan züri npho zin Arnon züri ka gü Hermon kazüthun keti lola.

⁹(Hermon kazüthun tsüle Sidon nyu le Sirion tse lo Amor nyu le Senir tse kohü.)

¹⁰Ngun le Bashan nyu raja Og kazü aphu lolo la: thunsun ge nyida dan, Gilead lo Bashan lojvu gü npho zin Salekah lo Edrei nyida keti.”

¹¹(Raja Og hile Rephaim temi yhun kenkhin gü. A-sikü le tso pe thyü, kethon meter pezi lo keda meter kenyhun, mele sen kehü kendo ka. Tsüle Ammon nyu nyida Rabbah ka hyu lo gwa.)

¹²“Ngun le kazü tsü gü lo kelo ka, Ale Arnon züri khoka Aroer kazü tesozin lo Gilead rincho pe nyida dan sin pe Reuben lo Gad tsipwen tsüla.

¹³Ale Gilead kazü nsen kebin dan lo Og le gon kehü Argob lojvu Bashan ko aphu pe Manasseh tsipwen ponha tsüla.” (Bashan tsü pe Rephaim nyu kazü tsehü.

¹⁴Manasseh tsipwen nyu Jair le Argob lojvu tsü le Bashan, kagü Geshur lo Maakah terhi keti aphu lolo la. A-le rünyi dan zan pe a-zan ka kolo, tsüle ntso kae Jair rünyi tse hü.)

¹⁵“Ale Gilead pe Manasseh tsipwen Machir kami tsüla.

¹⁶Lo Gilead ka gü Arnon züri keti pe Reuben lo Gad tsipwen tsüla. Tesinzin anyugun terhi le züri lvunyu lo tesozin terhi le Jabbok züri lo peha ki le Ammon nyu zen keterhi.

¹⁷Nkhünzin anyugun terhi le Jordan züri keti, tesozin Galil zi ka tsügü tesinzin Zida kesi keti lo npho zin le Pisgah kazüthun phaka.

¹⁸“Ale tsüka anyugun ka hihontse zoshü: Npugü ngun Sunggigü le Jordan npho zin kazü hi hagun no binlo tse pe hagun tsüshü laso. Tsügenyu hagun teri temi dan kanyü thyü shüo nipe Israel tsipwen kechadan mhundyü rio Jordan nken gü anyugun kecheo anyugun kazü nkhenlolo.

¹⁹Hagun nunyu, hagun nyenyu lo hagun senru-- hagun le senru kechon nkin kebin ale shabin nle tsüdan khe pe ale pe hagun tsü kela rünyi dan ka bin tse.

²⁰Npugü le hika hagun genyu thyü keshü hontse a-le nkhün zin kazü pe anyugun ketsü gü nkhenlo-o Npugü le anyugun no rüyü lo kemvuthen hagun tsasikezen ju keche shülo. Tsüsiki ki hagun le ranio ale pe hagun ketsü kazü hi günyu ryü logwa.”

²¹“Tson-o ale Joshua ka zoshü: ‘Npugü hagun Sunggigü le Sihon lo Og raja hihvu ge thyü keshü aphu nle hyu laso; lo nle a-kazü hü kethyü kecha aphu ge a-le tsü hontse thyü shü ti.

²²Npugü hagun Sunggigü le hagun sunthyüo kegati, tsü genyu nshvunya.’

²³“Ale tsüka Npugü ka hi tenge,

²⁴‘Npugü, Nle thakeda lo ndunthodan thyü nrün binzen gü nti pe ahi keshü ale sha bin nle. Tsangge-e lo kazü nyue teronme-e nle thakeda thyü keshü hi thyü keloi ndi.

²⁵Npugü, ano Jordan nken gü lizin kazükebwe, rincho kezegwa lo Lebanon kazüthun hyu shüta.’

²⁶“Ai hagun genyu Npugü le age a-nyuntalao akehi nyüshü mvula. Npugü le aka, ‘Tsü ntie gwaso! Tsüzo ninya! tsonzo la.

²⁷Pisgah kazüthun ra ge kügü teso, tesin, npho lo nkhün nrishü. Shwi kegwa thyü shüta, nle Jordan nken kemvui genyu.

²⁸Senkethyü Jodan pe Joshua tsüshü, a-le rhikebin thyü nko shü, a-le temi dan tsonri chwigü nle kehyu kazügü nkhenlo nrün genyu.’

²⁹“Tson-o agun le Bethpeor rünyi kentsun ketejon nyu bin tinla.”