Read Southern Rengma Naga TEJVÜZONIKESHÜ 30 Bible Online

TEJVÜZONIKESHÜ 30 - Southern Rengma Naga bible

TEJVÜZONIKESHÜ 30

¹“Ale ntso ka nno jochü lo shochün kejü lolo tse pe ntsü shü laso. Npugü le hagun no nrenru senye kecha dan nyu yhun-o thahi aphu hagun ge ryü kelo ka, ale hagun no kejü lolo tse pe hagun ketsü hagun le rüchün loti.

²Tson-o hagun lo hagun nyenyu dan le Npugü ki rani ryü hagun nyun aphu sen-o ale nthu khi keshü johokeshü dan zen lo yatselo,

³Npugü hagun Sunggigü le hagun shwinjün shüti. A-le hagun no nrenru tin kela senye dan ki hagun zen niryü, lo a-le hagun no gwakenye nilo ti.

⁴Hagun le kazü qün nithentsin ki nrenru lae Npugü hagun Sunggigü le hagun fü kequen nizen ryüti,

⁵tson-o gwen gwa me ka hagun pvübon nyu le keyhun kazü gü hagun no loni loti. Lo a-le hagun pvübon nyu nyeki hagun no gwakenye lo chonkvu loti.

⁶Npugü hagun Sunggigü le jokezen nyun pe hagun lo hagun nyenyu tsüti, tson-o hagun le hagun nyun aphu sen-o a-so lo kazü tsügü nyu yhunzin loti.

⁷A-le shochün hi aphu rani pe hagun nrhi lo nshwe kehü nyu ge shüti,

⁸lo hagun le a-jozen nilo ale nthu pe hagun tsü kebin a-johokeshü aphu thenti.

⁹Npugü le hagun tho aphu no gwakenye loti; hagun le nyu kechon lo senru kechon le binti, lo hagun low le nsha sa shüti. A-le hagun pvübon nyu thyü pe gwakenye keshü hontse a-kenyüo hagun thyü pe gwakenye shüti,

¹⁰ai hagun le a-senkethyü lesü hinyu thu kebin tejvü aphu thyüzen lo mvu loshvu. Hagun nyun aphu sen a-ki rani ryüti.

¹¹“Ale nthu khishü kebin johokeshü dan le hagun genyu rü ritsin nmvue then tilo keho mvu.

¹²Tsüle tsangne ki binmvu. Hagun le, ‘Ngun no tsü nyüo zenlo nrün genyu segü le kü gü sen tsenryü ngun tsü mon?’ tse ketso kemvui.

¹³Nmvue tsüle züda pere ki bin mvu. Hagun le, ‘Ngun no tsü nyüo zenlo nrün genyu segü le züda pfüthü gü tsü senryü ngun tsü mon?’ tse ketso kemvui.

¹⁴Tsü le hika hagun zen bin, hagun le shabin lo zo logwa, tsügenyu ntsoka we tsü zenlo.

¹⁵“Ale nthu hagun no kegwa le keshvu lo tiyo, lo kerhün le kesi lo tiyo kejü lolo tse khishü bin nle.

¹⁶Ale nthu pe hagun ketsü Npugü hagun Sunggigü johokeshü zen, a-so, a-jozen lo a-tejvü aphu then hü yatselo hagun le gwakenye loti, lo temi kechon kebin senye nme thyü loti. Hagun le gü nkhenlo titse kebin kazü günyu Npugü hagun Sunggigü le jochü pe hagun tsüti.

¹⁷Ai hagun le zenmvu lo nyümvuo tero kecha rüshvu tin la yatselo,

¹⁸hagun le nke lati--hagun no pütsü lo lotse ale ntsoka zoshü bin nle, hika. Hagun le Jordan nken gü nkhenlo nrün kazü günyu yhunthon loho.

¹⁹Ale ntsoka hagun no kerhün le kesi tiyo, Sunggigü jochü le shochün tiyo kejü lo lotse khishü bin nle, ale tsang lo kazü no hagun le kejü kelo tsü shahu thyü lotse koshü bin nyo. Kerhün kejü lo.

²⁰Npugü hagun Sunggigü solo, a-jozen lo, lo a-nkulo tson yatselo hagun lo hagun nyenyu le a-le zope hagun pvübon nyu, Abraham, Isak lo Jakob ketsü kazü günyu yhunthon loti.”