Read Southern Rengma Naga TEJVÜZONIKESHÜ 31 Bible Online

TEJVÜZONIKESHÜ 31 - Southern Rengma Naga bible

TEJVÜZONIKESHÜ 31

¹Mosa le Israel temi dan ka,

²zoshü, “Ale ntsoka we chen tsio nki laso, tsügenyu hagun sharhi thyü keloimvu so. Tsünyeki Npugü le ano Jordan nken loho letse aka zo laso.

³Npugü hagun Sunggigü le a-npvü hagun mhundyü rigü tsünyu yhun kebin senye dan khe lao, hagun no anyugun kazü nkhen loti; lo Npugü le zokeshü hontse Joshua le hagun sharhi thyüti.

⁴Npugü le Amornyu raja Sihon lo Og nyekvu kela hontse a-le temi tsüdan lo anyu kazü nke lati.

⁵Anyu nyekvu kelo Npugü le pe hagun tsüti, lo hagun le ale hagun ka zokeshü hontse anyu ge thyüti.

⁶Nko lo peche binlo. Anyugun nshvu nya. Hagun Npugü Sunggigü le a-npvü hagun zen hüti. A-le hagun khela nmvue ho shü loho.”

⁷Tson-o Mosa le Joshua ko lo-o Israel nyu temi aphu mhundyü nyu a-ka zoshü, “Nko lo peche binlo; nle temi hidan tson rio gü Npugü le pe anyugun pvübon nyu tsüti tse zokenjü kazü gü nkhen loti.

⁸Npugü le ntsonri lo nzen hüti. Npugü le nkhe la nmvue nhoshü la loho, tsügenyu nnyunkhi nmvue nshvu nya.”

⁹Tson-o Mosa le Sunggigü tejvü dan thu lo-o khipe Npugü Kejozenkelo Khinpha ntsen kehü Levinyu Püshükeda ju lo Israel nyu sharhi ju tsüshü.

¹⁰A-le anyugun ka, “Chen tsenyü chen kenkhin ki tepu khekela gwenkho le ryülo then nyu kebin Nga ka johi swü tetso shü lo, tse johoshü.

¹¹Israel nyu le Npugü hagun Sunggigü rüshvu titse kershvubin ka ryülo swü pe temi dan zen shülo.

¹²Peche, tenu, ntsenyu lo hagun rünyi nyu kebin tesin aphu ko kequen shü, temi aphu no tsü nyülo njüo Npugü hagun Sunggigü rühvu lo a-senkethyü zen lo nrün genyu.

¹³Hihontseo Npugü hagun Sunggigü tejvü gü nyülo kemvu hagun nyenyu dan no nyü loti. Tson-o anyugun le hagun le Jordan pfüthü gü nkhenlo titse kebin kazü günyu yhun kebin then a-jo kezen jvü sha loti.”

¹⁴Tsüselo Npugü le Mosa ka zoshü, “Nle kethon yhun kemvui so. Tsügenyu Joshua ko zen Phika günyu ryüo, a-no thyü nrün dan ale pe a-ka zoshüti,” tsonshü. Mosa lo Joshua au le Phika gü nyu yü;

¹⁵lo Npugü le n mhuchwe nme nyu ryüo Phika gü khenpvü ka solo la.

¹⁶Npugü le Mosa ka zoshü, “Nle whütse sila tiso, lo nkesi siki temi hidan le akhwe nyü mvuo ale anyu zen kejozen kelo gü borho lati. Akhe lao gü anyugun le yü kejü kazü gü nyu tero dan rüshvu tin lati.

¹⁷Tsonlo ale anyu ge anyunta lati; Ale anyu khe lao anyugun le nke lati. Kenke kenrin kethyü kechon le anyu ge ryüti, hihontse keso ki anyugun le ale anyugun Sunggigü anyu zen sin hümvu laso tse rüchün loti.

¹⁸Lo tsüka ale anyu cheshü mvu lati; anyugun le tero kecha rüshvu lo thagwakemvu thyü kela genyu.

¹⁹“Tsügenyu lü higü thulo. Pe Israel nyu senthyü shülo, tsüle anyugun ntsun kebin nme thyü nrün genyu.

²⁰Ale anyu pvübon nyu ka zoshwishü kenjü hontse anyu zen gü kenya kazü kegwa higü nyu shüti. Tsünyu anyugun tyütsü kenyü aphu hyu lo-o yhun ketegvüti. Ai anyugun le rani tin gü tero kecha rüshvu ti. Anyugun le a kenila lo azen Kejozenkelo gü borho lati,

²¹tson-o kenke kenrin kethyü kechon le anyu ge ryüti. Ai lü higü thyü hüti, lo tsüle anyugun ntsun kebin nme thyü ti. Ale anyu zen gü pe anyugun tsüti tse zoshwi shü kenjü kazü gü nyu gü kemvu kanyu, anyugun le nyu rüchün bin yo ale sha bin nyo.”

²²Tsünyü Mosa le lü tsügü thu lo-o pe Israel nyu senthyü shü.

²³Tson-o Npugü le Nun nyugü Joshua nthon-o a-ka zoshü, “Nko lo peche binlo. Nle Israel nyu temi dan tsonrio ale pe anyu tsüti tse zoshwishü kenjü kazü günyu gü ti lo ale nzen hüti.”

²⁴Mosa le Sunggigü tejvü gü nme khela mvu nrün genyu nyun yhün satse thu pe lesü nme nyu shülo.

²⁵A-le thupen lo njüo Kejozenkelo Khinpha ntsen kehü Levinyu Püshükeda ju ka zoshü,

²⁶“Sunggigü tejvü lesü higü khi lo-o pe Npugü hagun Sunggigü zen Kejozenkelo Khinpha gü khoka bin lalo, tsüno tsüka bin-o a-temi dan ntsun nrün shahu nme thyü nrün genyu.

²⁷Anyugun le ditsüki nyunrü lo jozenmvu yo ale sha bin nle. A keyhun ka anyugun le Npugü jozenmvu, lo a kesi siki anyugun le tsü nye kie jozenmvu kvuti.

²⁸Ano tha hidan pe anyugun ka zolo nrün genyu hagun tsipwen sharhi ju lo kedanyu aphu zenryü a mhundyü ka shülo; ale tsang lo kazü kope anyugun ntsun-o shahu nme thyü shüti.

²⁹Temi dan le a kesi siki serimvu lo ale pe anyu senthyü keshü keni lati tse kethyü ale sha. Siki anyugun le kenke teno ti kechamvule anyugun le Npugü le thyü nyalo tse keshü thyüo no a-nyunta nrün genyu.”

³⁰Tson-o Mosa le Israel nyu aphu nyü kebin ka lü gü aphu thyü shü.