Read Southern Rengma Naga TEJVÜZONIKESHÜ 32 Bible Online

TEJVÜZONIKESHÜ 32 - Southern Rengma Naga bible

TEJVÜZONIKESHÜ 32

¹“Tsang lo Kazü a jodan nyü shülo, ale nyu zoyo nyü kegwa thyüshü.

²A senkethyü jo le tsangkenri hontse che tsüryü lo kazü so ge khezü hontse loti. A jo dan le tsangrio tehen kebwe ge tsü keryü hontse; tsangri pe tehen kesen ge keshü hontse.

³Ale Npugü zan shwe ti, lo a-temi dan le a-keda rüla zoti.

⁴“Npugü le nkeno kekvu gü, a-tson aphu gwapen lo njü; Hagun Sunggigü le tenyen lo kü lo ketsin; a-le nyu le nshün lo njü yo tsü thyü hü.

⁵Ai hagun le joketsin zomvu, a-temi thyü kümvu, kemu lo me sa kehü senye nme.

⁶Hagun le Npugü ge hihontse kethyüi ole, hagun kepin, tharüchün lohü kemvu temi? A-le hagun pvü, hagun nyhun keshü gü a-le hagun pe senye nme thyüshü.

⁷“Nduka, gükela gwenkho, rüla rüchün shü; nyuthyü layo npvü no nka zoshü lotse ketsoshü. Kethen nyu no gükela rüla pe nka zoshü lotse ketso shü.

⁸Ketetsotsin gü le senye dan kazü khipe tsüshü; temi dan no dika yhun tiyo a-le rhishü. A-le tero nme pe senye nmeme tsüshü,

⁹ai Jakob nyeyu dan we a-le a-npvü kejü pe a-hon thyülo.

¹⁰“Anyugun le kazü kesi nyu nmhon kehü a-le hyulo, khekela, tehen yhun kemvu nme nyu. A-le a-npvü a-kentsen hontse, anyugun ntsen lo nucha lo.

¹¹Logi le nyekelo tedo pe anyu senkethyü hontse, a-sekin sükhun lo-o anyugun tso pen hü, Npugü le Israel le chela lo kegwa nyu ntsen hü.

¹²Npugü npvü a-temi tsonri hü tesin kecha teronyu keche senmvu.

¹³“A-le anyugun no kazü ketetso ki kekvu sen, lo anyugun no low nyu yhun kelo dan tyü. Anyugun le tsonye ge khuzü hyulo; tsofü nyu anyugun oliv bin le yhun lo.

¹⁴Anyugun methu lo tenyü dan le nyüzü kechon hoshü; anyugun le tanyü, tenyü lo methu kegwa tsin le bin. thoshye lo vainzu kegwatsin le bin

¹⁵“Npugü temi le nnya lo, ai mejozen mvu; anyugun le da lo lo ketyüketsü kequen lo. Anyugun le Sunggigü anyu nyhun keshü gü khela, lo anyu kenikelo kekvutsin gü kenila.

¹⁶Anyugun le teromen kerüshvu genyu Npugü no a-nyun tegi la; anyu le gwakemvu kethyü genyu a-no a-nyunta la.

¹⁷Anyugun le tha dushvu pe tero ketsin kemvu rüshvu; tsüle anyu pvübon nyu le shahü kemvu tero keshün, Israel nyu le a-jozen hükemvu tero dan.

¹⁸Anyugun le anyu Sunggigü, anyu kenikelo kekvu gü, kerhün ronzin pe anyu ketsü gü nmhinla.

¹⁹“Npugü le hi hyu keshüka anyunta la tson-o a-nyu peche lo tenu-e kenila.

²⁰A-le zoshü, ‘Ale anyugun keche sin lo hoso; ’ ‘tson-o anyugun le dihontse tiyo shwi shüti, anyu kerü, joketsin zohü kemvu temi.

²¹Anyugun teromen dan genyu ano anyunta, anyugun tero le tse ko kehü dan genyu ano anyun tegi, ketsin kemvu tero dan. Tsügenyu ale senye tse ko kehü nme zen-o anyugun no anyu nyunta ti; anyugun no senye kepha nme shwi anyu nyun tegi ti.

²²A nyunkenta le mah hontse nnyü chwiryü kazü nyu tha aphu ro lati. Tsü le kazü hensin kie tsügü kazüthun men dan-e ro lati.

²³“ ‘Ale kenke kenikendi senryü anyu ge shüti lo tholevütsi aphu sen anyugun ntsun ti.

²⁴Anyugun no khün lo rükao si lati; anyugun le honyü pe ketetsin thyü siti. Ale tehen thyü nipe anyu when ti, lo peri a-tsiyi kerhu no anyugun ndu ti.

²⁵Teri no kesi senryü tsonda nyu shü; kenshvu no ka kesü thyü. Ponyu lünyu no siti, nyunhonyu nmvue kethen nyue nrho shü loho.

²⁶Ale anyugun nkeshü lati, tson-o temi nme-e no anyu rüchün mvu lati.

²⁷Ai ale a npvü anyugun boren kela ka anyu shwikerüchün nyu no anyugun le atemi nyekvu lola letse kemakin loho.’

²⁸“Israel le tha rüchün lohü kemvu senye nme; anyugun kensü ndi shü.

²⁹Nyu genyu mele anyugun nyekvu lo layo tsü anyu le sha lomvu; nyuthyü layo anyugun le sha lomvu.

³⁰Nyu genyu yie me le temi nme no a-nyekvu la, lo yie tseryü le mihvu no a-nyekvu la la? Npugü anyu Sunggigü le anyugun khela; Kekvutsin anyu Sunggigü le anyugun hoshü la.

³¹Anyugun shwikerüchün nyu le anyu npvü anyugun tero le kvu kemvu sha, Israel nyu Sunggigü kekvu hontse mvu.

³²Anyugun shwikerüchün nyu le Sodom lo Gomorrah nyu hontse serimvu. vain le kekhü lo terün nsha kebin hontse,

³³peri tseyizü pe zu thu kelo hontse.

³⁴“Anyugun shwikerüchün nyu le nyuthyü shüyo Npugü le rüchün bin; a-le gwenkho toka shaja pe anyu tsü titse khwe bin.

³⁵Npugü le khünzo lo shaja pe anyugun tsüti; anyugun le chela nrün gwenkho le ryüti; anyugun kenke jon gü kho nni laso.

³⁶Npugü le a-temi kenishü ti anyugun le kekvu ndi kela hyu kelo ka. A-le a-lothyü kehü nyu shwinjün shüti, anyugun le keche ndi kebin hyu shülo.

³⁷Tson-o Npugü le a-temi ketson-o, ‘Hagun le tenyen kehü tero kekvu dan tsüle diki la?

³⁸Hagun le kerüshvu kethyü gü keshvu pe anyugun gin thyü lo anyu no tsü lotse zu pe tsü. Anyugun no ntsoka ryü hagun che shüta; anyugun no hagun kenishwi shü titse tin ryülo.

³⁹“ ‘Ale lo ahigü nti le Sunggigü; tero kecha nme-e ketsin mvu. Ale boshvula lo kerhün ronzin khishü, ale jünshü lo thyü ngwa shü hü, lo ale nyuthyü bin yo temi nme ntsun loho.

⁴⁰Ale Rhünkehü Sunggigü ketsin, Ale aben shweo swe bin nle

⁴¹Ale a jethon kenshwen yi thyü sen-o kenjü nyu thyü shü tse kethyü shwi ti. Ale ashwikerüchün nyu ge a khünzo lo shaja pe a kenrhinyu tsüti.

⁴²A thotsi no anyu zi nyu ntsen ti, lo a jethon le a ntsun kehü nyu aphu dushvu ti. Ale a zen kega kehünyu nme nrhoshü loho; jünkelonyu lo donyue no siti.’

⁴³“Senye dan, hagun le Npugü temi dan shwe mvu loshvu-- anyugun dukeshvu nyu aphu a-le shaja pe tsüti.”

⁴⁴Mosa lo Nun nyugü Joshua au le lü hi thyüshü, tson-o Israel nyu temi no nyülo nrün genyu.

⁴⁵Mosa le Sunggigü senkethyüjo pe temi dan ka zo penshü la njüo,

⁴⁶a-le zoshü, “Ale nthu pe hagun tsü keshü johokeshü aphu zen titse rüchün tonlo. Zoni pe hagun nyenyu hishü, tson-o anyu no Sunggigü senkethyüjo aphu zen petsü lo.

⁴⁷Senkethyü jo hidan le jo kenrun kemvu; tsü le hagun kerhün ronzin le. Tsü zen lo lo hagun le Jordan pfüthü gü nkhen lo titse kebin kazü günyu yhunthon loti.”

⁴⁸Tsünyü Npugü le Mosa ka zoshü,

⁴⁹“Gü Jeriko kepen ka Moab nyu kazü nyu Abarim kazüthun ka Nebo thun ge kü gü ale pe Israel temi tsüti tse kebin Kanan kazü shwishü lo.

⁵⁰Ntsa Aaron le Hor kazüthun ge sikela hontse nle kazüthun tsü gü ge si lati,

⁵¹kechamvule hai mihvu nren Israel temi mhundyü nyu a jozen mvu kela genyu. Nle Zin tehen yhunkemvu nyu Kadesh rinyu kho ki Meribah zü ka temi dan mhundyü nyu a rühvu mvula.

⁵²Nle nithen ki bin-o kazü gü shwishü ti, ai n no ale pe Israel nyu tsü kebin kazü gü nyu yü loho.”