Read Southern Rengma Naga TEJVÜZONIKESHÜ 33 Bible Online

TEJVÜZONIKESHÜ 33 - Southern Rengma Naga bible

TEJVÜZONIKESHÜ 33

¹Sunggigü temi gü Mosa le sikela mhundyü jochü pe Israel temi ketsü jochü le hidan hi.

²Npugü le Sinai kazüthun ka tsenryü; Edom soki yhüko hontse a-le chwiryü lo Paran kazüthun ka a-temi dan ben shü. Tsangge lonyu yie tseryü le a-zen hü, a-ben njüzin mah kenyü sen hü.

³Npugü le a-temi so hü lo a-hon dan ntsen hü. Tsügenyu ngun le a-phanyu nkhün lo a-johokeshü zen hü.

⁴Ngun le Mosa le pe ngun ketsü tejvü gü zen hü, tsü le ngun senye kenya ketsin.

⁵Npugü le a-temi Israel nyu raja thyü lola, anyugun tsipwen lo sharhi ju le kequen kelo ka.

⁶Mosa le Reuben kami rüla zoshü: “Reuben no sila nya, anyugun temi le rho ya tse-e.”

⁷Juda kami rüla a-le zoshü: “Npugü anyugun le keche kehi nyü shülo; kami kecha sin-o anyu sü kerhün nishü. Anyugun genyu me nren shülo, Npugü. Lo anyu cheo anyu shwikerüchün nyu ntsun lo.”

⁸Levi kami rüla a-le zoshü: “Npugü, nle Urim lo Thummin ge nkendo henshwi shülo Njozen kehü ngo Levinyu ge; Nle Massah ka anyu kegwa keshvu shwi Lo Meribah zü ka anyu joketsin shalo.

⁹Anyugun le a-pepvünyu, tsasikezen nmvue a-nyenyu nyeki Njozenkvu kethyü tsinshü. Anyugun le njohokeshü zenlo Lo nzen kejozen kelo then hü.

¹⁰Anyugun le n nyenyu senthyü pe no ntejvü zen ti; Anyugun le n kershvubin ge tha pe nrüshvu ti.

¹¹Npugü, anyu kami che pe no nko so ryü lo; Anyugun le nyuthyü yo tsüno nkenyü lo Anyu shwikerüchün nyu aphu boren la; Tsüdan no ni soryü nyalo.”

¹²Benjamin kami rüla a-le zoshü: “Hile Npugü le so lo ntsen kehü kami; A-le jongwen anyu rikhun hü, Lo a-le anyu dan nyu bin hü.”

¹³Josef kami rüla a-le zoshü: “Npugü no jochü tsangri pe anyu kazü nyu shü lo Lo kazü hensin zü pe anyu tsülo.

¹⁴Tsangkenyü rasha jochü pe anyu kazü nyu shü, gwenkho aphu ka terasha kegwatsin pe anyu tsülo.

¹⁵Terasha kegwatsin no nduka bin kehü anyugun rincho dan kesü thyü.

¹⁶Tha kegwa aphu no anyu kazü kesü thyü lo. Npugü kegwa jochü no bin lo, Senhvu nyu mah kenyü ka jozo keshü gü. Jochü hidan no Josef kami ge ryülo, A-le a-tsasikezen dan nyu sharhi gü genyu.

¹⁷Josef le methutse kenko le a-ge bin, Tehen thutse nme tse. A-tse le Manasseh yie yie Lo Efraim yie tseryü. A-le tsü sen-o senye dan shen ti Lo anyugun rhun pe kazü keni ki shü lati.”

¹⁸Zebulun lo Issachar au rüla zoshü: “Zebulun no züda so hakethyü nyu gwa kenye lo, Lo Issachar kenya no kanyu chon kenye lo.

¹⁹Au le tesin dan ko pe au kazüthun ge shü, Lo tsüka kenjü kerüshvu hoshü. Au le züda nyu au kenya hyulo. Lo züda se hachon nyu.”

²⁰Gad kami rüla a-le zoshü: “Sunggigü shwe, anyu kazü thyü nmhun keshü gü. Gad le shünyho hontse khwen-o Mebu nmvue mepe sürhen la hü.

²¹Anyugun le kazü kegwa tsin khilo la; Sharhinyu jün pe anyugun tsüla. Anyugun le Npugü johokeshü lo tejvü dan zenlo. Israel sharhi ju le kequen kelo ka.”

²²Dan kami rüla a-le zoshü: “Dan le shünyho bwe nme; A-le Bashan nyu nchwü chwiryü.”

²³Naftali kami rüla a-le zoshü: “Npugü kenyü nyu jochü pe Naftali tsüsa; Anyugun kazü le Galilee zida ka gü tesin zin ti.”

²⁴Asher kami rüla a-le zoshü: “Asher le kami kecha nyeki jochü pfü chon, A-no a-tsasikezen dan sokepfü gü thyü. Lo oliv bin no a-kazü kesü thyülo.

²⁵Tegi chwida no a-rünyi hun lo, Lo a-no a-zintse kenshvu kendi nyu bin lo.”

²⁶Israel temi, tero nme-e n Sunggigü hontse ndi gingvü tse tsang pfüthüo nmhu ge bin nche titse ryü.

²⁷Sunggigü le a-zintse nkeno gü; kethonthen kehü a-ben le hagun che hü. Hagun le mhundyü ketu keshü ka a-le hagun shwikerüchün nyu hüla Hagun no anyugun aphu nke la lo tse zoshü.

²⁸Tson-o Jakob tsipwen le bweo yhun, Shye lo vainzu le sü kebin kazü nyu kenshvu ndio, Tsangge khezü le kazü ntsen kebin nyu.

²⁹Israel, ditsüki sherhün la! N hontse nme ndi Npugü le kenishü kela senye. Npugü npvü n gida lo njethon, n nokhin shülo kvu kelo pe ntsü. N shwikerüchün nyu le ryü nka shwi kenjün hiti, Lo nle anyu kedü lati.