Read Southern Rengma Naga TEJVÜZONIKESHÜ 34 Bible Online

TEJVÜZONIKESHÜ 34 - Southern Rengma Naga bible

TEJVÜZONIKESHÜ 34

¹Mosa le Moab nyu kazü ketejon nyu bin-o Nebo kazüthun ge kü gü Jeriko npho zin Pisgah sun ka bin lo, tsüka Npugü le kazü gü apentha tsin pe a-hishü. Gilead kazü tesozin Dan rünyi keti;

²Naftali kazü aphu; Efraim lo Manasseh kazü; Judah kazü ka gü nkhün zin Mediterranean zida keti;

³Juda kazü tesinzin; lo ketejon Zoar ka gü Jeriko, Palm bin nyida gü keti.

⁴Tson-o Npugü le Mosa ka zoshü, “Ale pe anyugun tsipwen tsü titse Abraham, Isak lo Jakob ka zoshwi shü kenjü kazü le higü hile. Ale n no tsü shwishü, ai n no tsünyu gü loho.”

⁵Tson-o Npugü go gü Mosa le Npugü le kezo hontse Moab nyu kazü nyu sila.

⁶Npugü le Bethpeor rünyi kepen ka Moab nyu kazü ketejon nme nyu a-sunla, ai nthu keti temi nme-e a-bin gü shamvu.

⁷Mosa le chen tsio nki yhun-o si; a-le a-kenko le a-tünyen lo a yhütyüe gwa.

⁸Israel nyu le Moab nyu kazü ketejon ka jon sheryü a-chechü.

⁹Nun nyugü Joshua le thakesha le süpfü kechamvu le Mosa le kejü pe a-sunthyü shü kela genyu. Israel nyu le Joshua jozen-o Npugü le Mosa ben ka khikeshü johokeshü dan then lo.

¹⁰Israel nyu dan nyu Mosa hontse Npugü le mhuntsun zen kenthon kehü sidyükesha nme soryümvu.

¹¹Sidyükesha kecha nme-e Npugü le Mosa nipe Ijipt rajagü, a-hensin kedanyu lo a-kazü aphu nyu zansü lo ndun tho kethyü hontse shümvu.

¹²Sidyükesha kecha nme-e Mosa le Israel nyu aphu mhundyü nyu thyü keshü hontse thakeda lo kerükeshwe tho thyü lomvu.