Read Southern Rengma Naga TEJVÜZONIKESHÜ 4 Bible Online

TEJVÜZONIKESHÜ 4 - Southern Rengma Naga bible

TEJVÜZONIKESHÜ 4

¹Mosa le temi dan ka zoshü, “Ale pe hagun senthyü kebin tejvü dan aphu thyüzen lo, lo hagun le rhün bin-o Npugü hagun pvübon nyu Sunggigü le pe hagun tsü titse kebin kazü gü nkhenlo ti.

²Thame pe ale joho pe hagun ketsü sin nmvue tsünyu thame sen tin lanya. Ale Npugü hagun Sunggigü johokeshü pe hagun ketsü thyüzenlo.

³Npugü le Peor ka nyuthyü shüyo hagun npvü hyu laso. A-le tsüka Baal kerüshvunyu aphu nkela,

⁴ai hagun Npugü hagun Sunggigü tenyen ketsin thyü kehü dan we nthu keti rhün bin nyo.

⁵“Npugü a Sunggigü le ano thyü lotse zokeshü hontse ale tejvü aphu pe hagun senthyü shü laso. Hagun le hüo nkhenlo titse kebin kazü günyu tsü thyüzen mvuloshvu.

⁶Ketsinthyü tsüdan thyüzen loyatselo, hile senye kecha mhundyü ka hagun le ditsü ki nsü yo tsin shüti. Anyugun le tejvü hi aphu nyü lo-o, ‘Senye keda higü hile dihontse nsü lo thasha yono tse zoti!’

⁷“Senye gon sa bin-e Npugü ngun Sunggigü hontse, mvu lo keshvuka a-tero gü le a-kho nnisa kehü ndi. Lihi gwenkho kae keche hishülo a-le ngun ntho shühü.

⁸Senye gon sabin-e kecha le ale nthu pe hagun senthyü keshü hontse tejvü khenjü ndi.

⁹Pütsülo! Rhün kebin then, hagun npvü hagun yhütyü pe nyu hyu layo tsü nmhin la mvu nrün genyu. Hi rüla pe hagun nyenyu lo hagun nyenyu dan nyenyu

¹⁰Sinai kazüthun ka hagun le Npugü hagun Sunggigü mhundyü nyu so bin lo a-le a nthon-o ‘Temi dan no kequenlo. Ale anyugun no ale nyuzo yo nyülo njüo anyugun rhünthen ajokezen jvü shalo lo pe anyugun nyenyu dan nyenyu senthyü lo nyü bin nle.’

¹¹“Hagun nyenyu dan ka, hagun le a-phanyu sokebin kazüthun gü nmhukezün le je lola lo mah le nnyü pe tsangne ki kü.

¹²Tson-o Npugü le mah nyu hagun kenthon khwenyülo ai thame hyu mvu.

¹³A-le hagun zen-o Kejozenkelo tsü, lo a-le tso ponhvu ge johokeshü kontseryü dan thukeshü tsü hagun no thyüzen mvu loshvu tse zoshü.

¹⁴Npugü le hagun le hüo nkhen lo gü kezhü kazü günyu thyüzen nrün tejvü aphu ano pe hagun senthyü shülo tse aka zoshü.

¹⁵“Npugü le Sinai kazüthun ge mah nyu hagun kenthon ka hagun le a-joja hyumvu. Tsüle hagun genyu kegwa

¹⁶hagun teromen thyüo mula nya peche nmvue tenunyu,

¹⁷tehenthyü, nmvue tegü,

¹⁸nyokehüdan, nmvue tsehü.

¹⁹Tsangneki hagun le hyu kehü yhüko, shye lo shyenyü dan rüshvu nya. Npugü hagun Sunggigü le hidan pe temi kecha dan no rüshvu lotse tsü laso.

²⁰Ai hagun hile Ijipt ki mah kenyü nyu süshwikelo temi dan. Nthu hi hontse hagun no a-temi thyü titse hagun zen chwiryü.

²¹Hagun genyu Npugü hagun Sunggigü le age a-nyun ntao ano Jordan Züri nken-o a-le pe hagun tsü kebin kazü kegwa günyu yü loho letse swe la le.

²²Tsügenyu awe Jordan züri nken mvuo kazü higü nyu sila ti, ai hagun we nken gü kazü kegwa gü nkhen lotiso.

²³Npugü hagun Sunggigü le hagun zen Kejozenkelo gü nmhin lamvu titse rüchün tonlo. A-johokeshü zen-o teromen nme thyü nya;

²⁴Npugü hagun Sunggigü le mah kenyü hontse kethyü nme; a-le mele a-ntsun kehünyu ge a-keshathyü tsela hümvu.

²⁵“Hagun le kazü günyu binthon-o hagun nyenyu lo hagun nyenyu dan nyenyu le bin lae teromen lihi hontse kethyü thyüo kemu thyü nya. Hile Npugü mhundyünyu gwamvu tsügenyu a-le a-kenyümvu lati.

²⁶Hagun le a-jozenmvu yatselo whütse kazü günyu hümvu lati, ale tsang lo kazü ko pe nthu kemisha thyü bin nyo. Hagun le nkhenlo gü kejü Jordan pere zin kazü günyu kethon yhun loho. Hagun nkeshü lati.

²⁷Npugü le hagun hü kezen pe senye kecha dan nyu shülati, tsüki hagun medan nyu kerho khitse yhunti.

²⁸Tsüki hagun le temi le tesen lo tso pe kethyü teromen hyu, nyü, tyütsü nmvue tha rünsha hü kemvu dan lothyü ti.

²⁹Tsüki hagun le Npugü hagun Sunggigü füti, lo hagun nyun aphu sen a-fü lo a-hyu loti.

³⁰Tha hidan hi aphu hagun ge ryüo hagun le kenjün thyü kelo siki rani Npugü ki ryüo a-jozen ti.

³¹A-le shwinjün kehü Sunggigü. A-le hagun khela nmvue nkela loho lo a-le hagun pvübon nyu zen kejozenkenjü gü nmhin la loho.

³²“Hagun nnyunkelo mhundyü, gü Sunggigü le temi nyhun pe kazü nyu keshü gwenkho keti aphu rüchün shwi. Kazü aphu füshwi. Hi mhundyü tha gon pe hihontse kethyü thyü le mvula? Temi nme hihontse kethyü nyülo-o le?

³³Hagun hontse Sunggigü le mah nyu nthon keshü khwenyü lo-o yhun kelo temi peha le bin le?

³⁴Tero nme-e Ijipt ki Npugü hagun Sunggigü le thyü keshü hontse pecheo senye kecha ki gü temi dan me sen chwiryü a-temi thyü kelo le bin le? Hagun yhühyu nyu a-le a-kekvu lo kenko keda sen-o kenpen, teri, nduntho, lo shatilokeho senryüo nkerükeshvu thadan thyüshü.

³⁵Npugü le a npvü Sunggigü a-nyeki kecha nme ndi tse kethyü tsin shü.

³⁶A-le hagun senthyü shü nrün genyu hagun no tsangge a-khwenyü lo; lo kazü hinyu hagun no a-kenshün mah hyu, lo a-le tsünyu hagun nthon.

³⁷A-le hagun pvübon nyu so kethyü genyu hagun kejülo lo a-kekvu kedanyu Ijipt ki hagun zen chwiryü.

³⁸Nthu hagun hon thyü kebin anyugun kazü hipe hagun tsü titseo hagun le kethün keshü ka a-le hagun nyeki gon lo kvu kethyü senye dan hü shwila.

³⁹Tsü rüchün hülo lo nmhin nya: Tsangge lo kazü nyue Npugü le Sunggigü. Tero kecha nme ndi.

⁴⁰Ale nthu pe hagun tsü keshü a-tejvü aphu zenlo, tsonlo yatselo hagun lo hagun tsipwen-e gwa loti. Lo Npugü hagun Sunggigü le kethonthen hagun hon thyü lotse pe hagun ketsü kazü günyu yhun zin binti.”

⁴¹Mosa le Jordan npho zin nyida kenshen pe bin la

⁴²temi nme le shamvuo a-le shwirüchün bin kemvu nyu peha dushvu la yatselo tin gü tsünyu sunlo nrün genyu. A-le nyida hidan nme ka gü simvu lo nrün genyu.

⁴³Reuben tsipwen genyu tehenyhunkemvu kazü gü sun ki Bezer nyida gü, Gad tsipwen genyu Gilead lojvu Ramoth, lo Manasseh tsipwen genyu Bashan lojvu Golan ka.

⁴⁴Mosa le Sunggigü tejvü lo senkethyü jo dan pe Israel nyu tsüshü.

⁴⁵Anyugun le Ijipt nyu chwiryü kelo siki Jordan npho zin Bethpeor rünyi kentsun ka kehü ka a-le tejvü hidan pe anyugun tsüshü. Hile Heshbon nyida nyu keda thyü kehü Amor raja Sihon kazü. Ai Mosa lo Israel nyu temi le Ijipt nyu chwikeryü ka a-so kvu lola.

⁴⁶

⁴⁷Anyugun le a-kazü lo Jordan npho zin kebin Amor raja kecha Bashan ka raja gü Og kazü ko nkhenlola.

⁴⁸Kazü higü le Arnon züri se Aroer rünyi ka tesozin nsin gü Sirion kazüthun, Hermon kazüthun letse kehü tsü keti.

⁴⁹Tsüle Jordan nphozin lojvu aphu, tesin zin züda kesi lo nphozin Pisgah kazüthun phati.