Read Southern Rengma Naga TEJVÜZONIKESHÜ 5 Bible Online

TEJVÜZONIKESHÜ 5 - Southern Rengma Naga bible

TEJVÜZONIKESHÜ 5

¹Mosa le Israel nyu temi aphu ko kequen lo njüo anyugun ka zoshü, “Israel nyu temi dan ale nthu tejvü khishü kebin dan aphu nyülo. Tsü shalo lo thyüzen lo.

²Sinai kazüthun ka Npugü ngun Sunggigü le ngun zen kejozenlo,

³ngun pvübon nyu ntimvu ai ngun nthu yhunkebin nyue sin.

⁴Tsüka Npugü le kazüthun gü ge mah nyu mhuntsun hagun zen kenthon shü.

⁵Ale tsüka Npugü hagun jaka so-o a-le nyuzo shüyo pe hagun kazo, hagun le mah gü nshvuo kazüthun ge kümvu kela genyu. “Npugü le zoshü,

⁶‘Ale Npugü hagun Sunggigü, Ijipt ki hagun le medo thyü kebin hagun keni zenchwi keryü güle.

⁷“ ‘Anyeki tero nme rüshvunya.

⁸“ ‘Hagun genyu tsangge, nmvue kazü nyu, nmvue kazü hensin zü nyu ki kehü hontse kethyü men nme thyü nya.

⁹Nkhün tsü gü teromen nme rüshvunya, ale Npugü hagun Sunggigü lo ale a ntsun kehü nyu ge a-keshathyü tse hümvu. Ale shaja senryü a ntsü kehünyu ge lo anyugun nyenyu phushen phuzi kie shü hü nyo.

¹⁰Ai aso lo a tejvü zen kehünyu shenhe yie yie kie ale keso pe hishü hü.

¹¹“ ‘Gwakemvu thyü titse azan sen nya, Ale Npugü hagun Sunggigü, ligü higü azan senzü kehü gü ale shaja pe tsüti.

¹²“ ‘Sabbath jon then lo, lo tsü zen kenshün lo, Ale Npugü hagun Sunggigü, ale johokeshü hontse.

¹³Hagun tho thyülo kegwa jon tsero le bin nyo,

¹⁴ai jon tsenyü gü we thyükenshün pe atsükela kerüyü jon. Tsünyü temi nme thatho thyünya- Nle, nnyenyu, ndo, nsenru nmvue nkazü nyu yhun kebin tesin-e no thathyü nya. N hontse ndo kono rüyülo.

¹⁵Hagun ko Ijipt ki me do thyükebin, ale Npugü n Sunggigü a kekvu lo kenko ka ale nkeni keshü rüchünlo. Tsügenyu hagun no Sabbath zen lo tse ale johoshü le.

¹⁶“ ‘Ale Npugü n Sunggigü ale johokeshü hontse npvü njvü rühvulo, tha aphu ngenyu gwa lo ale pe nketsü kazü günyu yhunthon lo nrün genyu.

¹⁷“ ‘Me dushvu nya.

¹⁸“ ‘Keyüla nya.

¹⁹“ ‘Rühu nya.

²⁰“ ‘Nkuo temi nme nmu nya.

²¹“ ‘Kechanyu nu tepen nya; a-ka, a-kazü, a-do, a-thu, a-gada nmvue a-hon lihi-e tepen nya.’

²²“Hagun le kazüthun güka kequen kelo ka Npugü le johokeshü hidan pe hagun aphu tsüshü. A-le nrasen-o mah lo nmhu kezün nyu johokeshü hidan khishü lo jokecha zo sinmvu. Tson-o a-le tsüpe tso ponhvu ge thu pe atsüshü.

²³“Kazüthun gü apentha mah le nnyü lo hagun le kezün nyu thakhwen gü nyü kelo ka, hagun sharhi lo tsipwen sokedanyu dan le akiryüo,

²⁴‘Npugü ngun Sunggigü le mah nyu ngun nthon kethyü nyü kelo ka a-kekvu lo a-zan kechwi pe ngun hi shü laso! Sunggigü le temi nthon shü-e temi le rhün bin logwa tse nthu hyu laso, tson zoshü.

²⁵Lo nyuthyüo ngun sila ti la? Mah kenrin kethyü gü tsüle ngun nke lati. Npugü ngun Sunggigü le ngun nthon ni kethyü we ngun le sila tsentsü.

²⁶Temi segü le kerhün Sunggigü le mah nyu a-nthon keshü siki yhun kelo le bin nla?

²⁷Mosa, nle rani gü Npugü ngun Sunggigü le kejozo aphu nyüshü. Tson-o rani ryü a-le nyu pe nka zo yo agun ka zoshülo. Lo agun le nyüo thyüzenti.’

²⁸“Npugü le jo hi nyülo njüo aka zoshü, ‘Temi dan le zo kebin tsüle njüle.

²⁹Anyugun le azintse hihontse rüchün! Azintse a rühvu lo a johokeshü zen kehü we anyugun lo anyu nyenyue gwa loti.

³⁰Gü anyugun no rani anyugun phika ki gü la lotse zoshü lo.

³¹Ai Mosa, nle azen-o hika binlo, lo ale a tejvü lo a johokeshü aphu pe ntsüti. Temi dan no ale pe anyugun ketsü kazü günyu thyüzen nrün genyu anyugun senthyü shülo.’

³²“Israel temi dan, Npugü hagun Sunggigü le jo hope hagun ketsü aphu thyüzen lo. A-tejvü nme zenmvu lanya.

³³Tsü aphu zenlo, tson yatselo tha aphu hagun genyu gwa lo hagun le gü nkhen lo titse kebin kazü günyu bin zin loti.