Read Southern Rengma Naga TEJVÜZONIKESHÜ 6 Bible Online

TEJVÜZONIKESHÜ 6 - Southern Rengma Naga bible

TEJVÜZONIKESHÜ 6

¹“Tejvü hidan aphu Npugü hagun Sunggigü le ano pe hagun senthyü shü lotse joho shü le. Hagun le yügü nkhen lo titse kebin kazü gü nyu tsü zenlo.

²Kazü tsügü nyu yhunthon lo nrün genyu, hagun lo hagun nyenyu dan le hagun keyhunthen Npugü hagun Sunggigü rühvu, lo ale hagun tsü kebin a-tejvü aphu zenlo.

³Israel temi dan nyülo, lo thyüzenlo. Tsonyatselo Npugü hagun pvü bonnyu Sunggigü le zoshwi shü kenjü hontse kazü kenya kegwa gü nyu tsü tha aphu hagun genyu gwalo hagun le senye keda nme thyü chwiryü loti.

⁴“Hi rüchünlo Israel! Npugü--Npugü nti ngun Sunggigü.

⁵Lo nle nnyun aphu, nkeyhun aphu lo nkekvu aphu sen Npugü n Sunggigü solo.

⁶Ale nthu pe ntsüshü kebin johokeshü dan hi nmhin lanya.

⁷Tsü pe n nyenyu senthyüshü. Nle kanyu hü-e, tegwen ki hü-e, rüyü bin nmvue thatho thyü bin-e tsü zozin binlo.

⁸Rüchün binlo nrün genyu tsü pe nbu lo nsenpfü ka phin pvülo.

⁹Tsü pe nkachon ge lo nkhinrun ge thulo.

¹⁰“Npugü hagun Sunggigü le hagun pvübon, Abraham, Isak, Jakob dan ka zoshü kenjü hontse a-le hagun le thyükemvu nyida gon lo gwasasa le kebin kazü nme pe hagun tsüti.

¹¹Ka dan le hagun le peshü kemvu kanyü kegwagwa le sü, hagun le tso kemvu zülvu le bin lo hagun le senshü kemvu vain lo oliv low le bin nyo. Npugü le hagun zenryü kazü hi günyu shüo hagun tyü kenyü aphu hyukelo ka

¹²Ijipt ki hagun le medo thyü kebin hagun kenikeshü Npugü nmhinla mvu titse rüchün tonlo.

¹³Npugü hagun Sunggigü nti rühvu lo rüshvulo, a-zannyu nti hagun johoshülo.

¹⁴Tero kecha nme rüshvu nya, hagun tehun kebin temi dan tero me rüshvu nya.

¹⁵Hagun le tero kecha rüshvu yatselo Npugü le a-nyunta pe maH hontseo hagun nkeshü lati, Npugü hagun Sunggigü le mele a-ntsun kehü nyu ge a-keshathyü tsela hü mvu.

¹⁶“Npugü hagun Sunggigü seme nya, hagun le Massah ka a-seme kethyü hontse.

¹⁷A-le tejvü pe hagun ketsü dan aphu thyüzen mvuloshvu.

¹⁸Npugü le nyu zoyo thyülo tsüle njü lo gwa, tson loyatselo tha aphu ngenyu gwa ti. Lo Npugü le pe hagun pvübon nyu tsü titse zokeshü kazü kebwe kegwa gü lolo ti,

¹⁹lo a-le zokeshü hontse hagun le shwikerüchün nyu hü shwi loti.

²⁰“Ryü kejü gwenkho ki hagun nyenyu le, ‘Nyuthyüo Npugü ngun Sunggigü le ngun no tejvü hi aphu zen lotse johoshü yo? tse hagun ketso ti.

²¹Lo hagun le, ‘Agun le Ijipt raja do thyübin tsüka Npugü le a-kekvu kedanyu agun kenishü le.

²²Agun yhühyu ka a-le zansü lo nduntho thyüpe Ijipt nyu temi, anyugun raja lo a-hensin kedanyu ge shüle.

²³A-le Ijipt nyu ngun hoshüo npvübon nyu ka zoshü kenjü hontse ngun zenryüo kazü higü pe ngun tsü shüle.

²⁴Tson-o Npugü ngun Sunggigü le ngun no a-tejvü aphu thyüzen lo a-rühvu hülo tse johoshü. Ngun le tsonhü yatselo a-le a-zintse ngun senye khwe ntsen-o tsüno gwakenye loti.

²⁵Ngun le ketsinthyüo Sunggigü le johokeshü lihi-e thyüzen hüya tselo, a-le ngun ge a-kenyü hüti,’ tse anyugun ka zoti.