Read Southern Rengma Naga TEJVÜZONIKESHÜ 7 Bible Online

TEJVÜZONIKESHÜ 7 - Southern Rengma Naga bible

TEJVÜZONIKESHÜ 7

¹“Npugü hagun Sunggigü le hagun zen gü hagun le nkhenlo ti tse kebin kazü günyu shüti, lo a-le tsünyu senye kechon hü lati. Hagun le kethün gülo a-le hagun nyeki gon lo kvu kethyü senye tsenyü hü lati: Hitnyu, Girgash nyu, Amornyu, Kanan nyu, Periznyu, Hivtnyu lo Jebusnyu.

²Npugü hagun Sunggigü le temi hidan pe hagun hensin shülao hagun le anyugun nyekvu lolo, anyugun aphu dushvula mvulo shvu. Anyugun zen kejozen nmvue shwinjün nya.

³Anyugun lü lo nmvue hagun nyenyu nme no anyugun ka kalvu nya,

⁴anyugun le hagun nyenyu tsontsin pe Npugü nrhio anyu tero rüshvu tin lalo keshvu genyu. Tsonla yatselo Npugü le anyuntao whütse hagun nke lati.

⁵Tsügenyu anyugun kershvubin borhola, tso kesen dan bosere la, Asherah terogi men dan phünla lo teromen dan ro lalo.

⁶Tsonla lo, hagun le Npugü hagun Sunggigü temi genyu. Kazü temi aphu dan nyu a-le hagun kejü pe a-npvü a-temi kechashü thyülo laso.

⁷“Hagun le me kechanyu nyeki chon kethyü genyu Npugü le hagun so lo hagun kejü lomvu; hagun le kazü so senye keshetsin gü.

⁸Ai Npugü le hagun so-o a-le hagun pvübon nyu ka a zoshü kenjü thyü nyü hü. Tsügenyu a-le a-kekvu keda nyu hagun le Ijipt raja gü dothyü kebin nyu hagun shvüshü lo kenishü laso.

⁹Tsügenyu Npugü hagun Sunggigü nti Sunggigü, lo tenyenlo kekügü le tse rüchün lo. A-le a-so lo a-johokeshü thyüzen kehü nyu we phu yie me ketie kejozen kenjü lo a-le sozin kehü pe hishü hü,

¹⁰ai a-ntsü kehü nyu we shaja pe tsü kesedyü la loho.

¹¹Tsügenyu ntsoka nyu pe nsenthyü shüyo tsü thyüzen lo; ale nthu pe ntsü keshü tejvü dan aphu thyüzen lo.

¹²“Hagun le johokeshü hidan nyüo thyüzen hü yatselo Npugü hagun Sunggigü le hagun pvübon nyu ka zoshwishü kebin hontse kejozen kelo lo a-le sozin kehü tsüle hagun zen hüti.

¹³A-le hagun so lo jochü pe hagun tsüo hagun no nyu kechon nkin lo yhun chvü loti; a-le jochü pe hagun low nyu shüo shye, vainzu lo oliv ter hyuloti; A-le jochü pe hagun tsüo hagun no senru lo tanyü kechon no bin loti. A-le jochü hi aphu pe hagun tsü titse hagun pvübon nyu ka zoshü kenjü kazü gü nyu hagun tsüti.

¹⁴Kazü nyu temi nme hagun hontse jochü pvü loho. Hagun nmvue hagun senru nme no a-tsipwen kendi thyü loho.

¹⁵Keho-kenyü aphu nyu Npugü le hagun ntsen loti, lo hagun le Ijipt ki sha kehü kethyü kenyü gwakemvu tsü nme senryü hagun ge shü loho, ai a-le tsü senryü hagun shwikerüchün nyu ge shüti.

¹⁶Npugü hagun Sunggigü le pe hagun ben nyu keshü senye aphu nke lalo, anyugun njün nya. A-nyugun tero dan rüshvu nya, tsüle hagun min lalo keshvu genyu.

¹⁷“Hagun nyun ki temi hidan le hagun nyechon kvu tsügenyu anyugun hü shwilo kemvui tse rüchün nya.

¹⁸Anyugun nshvunya; Npugü hagun Sunggigü le Ijipt nyu raja lo a-temi dan aphu ge nyuthyü shüyo rüchün lo.

¹⁹Kempen ketetsin kethyü, nduntho dan, zansüdan lo Npugü hagun Sunggigü le kekvu keda sen-o hagun hoshükela tsü rüchün lo. A-le Ijipt nyu nkekela hontse ntsoka hagun le nshvu kebin temi hidan aphu nke lati.

²⁰A-le kenshvu pe anyu dan nyu shüo tinchwi gü kebu kebin nyue nke la ti.

²¹Tsügenyu temi hidan nshvu nya. Npugü hagun Sunggigü le hagun zen hü nyo; A-le kekvu keda lo nshvu mvulo keshvu Sunggigü le.

²²Hagun le kethün gü lo, A-le a-shvü thyü senye hidan hüshwi lati. Gwengwa thyü anyugun nkela lo tehenthyü le chonri chwi ryüo hagun kevü loshvu.

²³Npugü le hagun shwikerüchün nyu pe hagun ben nyu shü lati lo anyugun nke bu la kemvuthen anyugun le nshvu bin ti.

²⁴A-le anyu raja dan pe hagun kekvu hensin shü lati. Hagun le anyugun dushvu lao meno anyugun nmhin lati. Temi nme hagun no loho; hagun le a-nyu aphu nke lati.

²⁵Anyugun tero dan rola. Tsüge kebin Suna nmvue rakagi tepen-o khilo nya. Nle khilo yatselo tsüle nmin lo lati, Npugü le tero kerüshvu ntsü kehü genyu.

²⁶Teromen nme-e sen hagun kanyu ryü nya, shochün anyugun ge kebin hontse kethyü le nge ryü loshvu. Nle teromen hidan ntsü lo nkhin la mvuloshvu, tsüle Npugü le shochün pe tsü kela genyu.