Read Southern Rengma Naga TEJVÜZONIKESHÜ 8 Bible Online

TEJVÜZONIKESHÜ 8 - Southern Rengma Naga bible

TEJVÜZONIKESHÜ 8

¹“Ale nthu pe hagun tsüshü kebin tejvü dan aphu thyüzenlo. Hagun le yhunlo lo chwükenyeo Npugü le pe hagun pvübon nyu tsü titse keshü kazü gü nkhenlo nrün genyu.

²Gükela chen henzi Npugü hagun Sunggigü le hagun tsonri zen-o tehen yhun kemvu kazü nyu njwen-o hagun le a-johokeshü zen tile mvuyo shalo titse tha ketsen kerü pe hagun semen kethyü tsü rüchün hülo.

³A-le hagun no nnyo kelo ka, himhundyü hagun lo hagun pvübon nyue tyü hükemvu chwü, manna pe hagun no tyü. A-le hihontseo temi le chwü genyu nti rhünlo hümvu ai Npugü le zo keshü jo lihi genyu rhünlo kehü pe hagun senthyü.

⁴Chen henzi jaka hi hagun phinya le renla nmvue hagun pha nmen lamvu.

⁵Me pvü le a-nyu senthyü kehü hontse Npugü hagun Sunggigü le hagun tsenro lo shaja pe hagun tsü.

⁶Tsügenyu Npugü le hagun ka johokeshü hontse thyülo: a-tejvü then-o yhun lo a-jozen lo.

⁷Npugü hagun Sunggigü le hagun zenryü kazükebwe kegwa-- ketejon lo rincho kie züri lo zükenthün le kebin;

⁸thoshye, barley, vainsha, kherosha, khüratyüsha, olivsha lo khüzü le kebin kazü nyu shüti.

⁹Tsünyu hagun le nnyo nmvue rhodyü sin loho. A-tsonye nyu tegi le bin lo rincho ki lazo le bin nyo.

¹⁰Hagun le hagun tyü kenyü aphu hyu lo-o Npugü hagun Sunggigü le kazü kegwa pe hagun ketsü genyu chenkeno pe a-tsüti.

¹¹“Npugü hagun Sunggigü nmhin lamvu titse rüchün tonlo: ale nthu pe hagun tsüshü kebin a-tejvü dan zenmvu lanya.

¹²Hagun kenyü aphu hyutyü lo ka kegwa thyüo a-nyu yhun

¹³lo hagun methu, tanyü, rakagi, suna lo kenya kecha aphu chon kenye kelo ka,

¹⁴ketekho chwiryüo hagun le Ijipt ki medo thyü kehü nyu hagun kenikeshü Npugü hagun Sunggigü nmhin la nya.

¹⁵A-le hagun tsonri zen peri a-tseyi kerhu lo zukeshonyu le bin kehü tehenyhun kemvu kenrin kethyü kazü pfüthü ryü. A-le zü kendi kazü kesin nyu tsonye ge zü no tsun pe hagun tsü.

¹⁶Tehenyhunkemvu kazü nyu a-le hagun pvübon nyu le tyühükemvu chvü manna pe hagun no tyü. A-le kenkhin ki jochü kegwa pe hagun tsü nrün genyu tha kerü nipe hagun kegwa keshvu shwi.

¹⁷Tsügenyu thame ka hagun kekvu kegwa nyu nnya lole tse rüchün nya.

¹⁸Kekvu pe hagun tsüo nnya kelo gü tsüle Npugü hagun Sunggigü tse rüchün lo. A-le hagun pvübon nyu zen kejozenkelo hontse nthu-e hi thyüshü bin nyo.

¹⁹Npugü hagun Sunggigü nmhinla nya nmvue rani gü tero kecha rüshvuo tsüdan lothyü nya. Tson yatselo hagun le nkela tsentsü, tsügenyu hagun no pütsü lolo tse ale nthu hagun ka zoshü bin nle.

²⁰Hagun le Npugü zozen mvu yatselo, hagun le kethün gü a-le nkela titse kebin senye dan hontse hagun ko nke lati.