Read Southern Rengma Naga TEJVÜZONIKESHÜ 9 Bible Online

TEJVÜZONIKESHÜ 9 - Southern Rengma Naga bible

TEJVÜZONIKESHÜ 9

¹“Nyülo, Israel nyu temi! Nthu hagun le Jordan züri pfüthü gü senye hagun nye gon lo kvu kethyü nyu kazü nkhenlo gü zhü nyo. Anyugun nyida dan le gon lo anyugun chwida le tsangneki kübin.

²Temi dan-e thon lo nko: anyugun le thunginyu, hagun le nyülo kela hontse temi nme anyugun no keloimvu.

³Ai Npugü hagun Sunggigü le hagun mhundyü rio mah kenro hontse kethyü nthu hagun le hyuti. A-le zokeshü hontse hagun le kethün shülo a-le anyugun nyekvu lao hagun le whütse anyugun hüshwi lo nke lati.

⁴“Npugü hagun Sunggigü le tsüdan hüshwi kela siki, hagun nyuki hagun kegwa genyu a-le hagun zenryü kazü higü gwen lo le tse rüchün nya. Tsonmvu, temi hidan serikemvu genyu Npugü le anyugun hü lao hagun no bin titse bin nyo.

⁵Hagun le gwa lo thatho kenjü thyü kehü genyu Npugü le hagun no anyugun kazü khilo bin mvu. Anyugun serikemvu genyu a-le anyugun hü lati lo hagun pvübon nyu Abraham, Isak, Jakob ka zoshwishü kenjü tsü no bin nrün genyu le.

⁶Sha tsentsü lo Npugü le kazü kegwa hi pe hagun tsü kebin le hagun kegwa genyu mvu. Hagun le temi a nyunkerü dan me.

⁷“Hagun le dihontse tehenyhun kemvu kazü ki Npugü hagun Sunggigü nyun thyü nshvu pe a-no a-nyunta yo nmhin nya. Hagun le Ijipt nken keshü nyü ryü hi tikelo nyü keti a-ntsun.

⁸Sinai kazüthun kae hagun le Npugü nyunthyü nshvu pe no hagun nkela titse so.

⁹Ale kazüthun gü ge Npugü le hagun zen kejozen kelo pe thu kenjü tso ponhvu tsü khilo titse kü. Ale thame tyütsü mvutse kebenjon henzi lo kezünjon henzi tsüki hü tinla.

¹⁰Tson-o Npugü le hagun le kazüthun ka kequen kebin nyü mah nyu hagun ka kezo jo dan a-npvü a-ben pe tso ponhvu ge thu pe atsü shü.

¹¹Keben jon henzi lo kezün jon henzi siki Npugü le kejozen kelo pe a-ge thu kenjü tso ponhvu pe atsü shü.

¹²“Tson-o Npugü le aka zoshü, ‘Nle whütse tsenlo, nle Ijipt ki zen chwi keryü temi dan le serimvuo gwakemvu thyü bin kela genyu. Anyugun le ale thyü lotse johokeshü then mvuo rani laso, lo anyugun npvü anyu genyu teromen nme thyülo laso.’

¹³“Tson-o Npugü le aka zosinshü, ‘Temi hidan le dihontse anyugun nyunrü yo ale sha.

¹⁴A khin nya. Ale anyugun nke lao temi nme no anyugun rüchün sinmvu lati tse rüchün bin laso. Tson-o ale nthyü pe anyugun nyeki senye gonkvu lo kvukvu shü ti.’

¹⁵“Tsügenyu ale kejozen kelo pe thu kebin tso ponhvu sen-o kazüthun gü ge tsenryü. Kazüthun gü ge mah kennyü le chwiryü bin.

¹⁶Lo hagun le Npugü hagun Sunggigü johokeshü then mvuo tegi pe methunyu hontse kethyü tero nme thyüo a-mhundyü nyu mukela ale hyulo.

¹⁷Tsügenyu ale hagun mhundyü nyu tso ponhvu tsü shwe pe jonkhara la.

¹⁸Tson-o ale kebenjon henzi lo kezünjon henzi thame tyütsümvu tse Npugü mhundyü nyu kazünyu nkhün nitin la. Hagun le Npugü mhundyü nyu kemu thyüpe a-no a-nyunta kela genyu ale hi thyü.

¹⁹Npugü le a-nyuntao hagun nkela titse so ai a-le akehi nyü nishü.

²⁰Npugü le Aaron ge ko anyuntao adushvu lati tse sola, tsügenyu ale Aaron genyu hishü.

²¹Ale kenu kanyü tegi pe kethyü methunyu gütsü khipe mah nyu shweshüla. Tson-o ale tsü jonshwe pe kemphü thyülao shwe pe kazüthun ki tsun tsükeryü rinyu nyu shüla.

²²“Hagun le Taberah, Massah lo Kibroth Hattaavah ka ko tse Npugü hagun Sunggigü nyunthyü nshvushü.

²³Lo a-le Kadesh Barnea ka hagun no gü a-le khishü kebin ka zü gü lolo lotse hagun nishü ai hagun le a-ntsun la; hagun le a-jozen nmvue a-tenyen mvula.

²⁴Ale hagun shakelo gwenkho kanyu hagun le Npugü ntsun hü nyo.

²⁵“Tsügenyu ale kebenjon henzi lo kezünjon henzi Npugü mhundyü nyu nkhün tinla, a-le hagun nkela titse kebin ale sha kela genyu.

²⁶Ale kehithyüo, ‘Aphuso kekvu Npugü, nle nkekvu keda nyu Ijipt ki kenizenchwi keryü ntemi dan nkela nyalo tsezo.

²⁷Ngo dan, Abraham, Isak lo Jakob rüchün shü lo tson-o nyunkerü, serikemvu temi hidan kemu nri nyalo.

²⁸Kemvu we Ijipt nyu le, nle ntemi zengü nle zoshü kenjü kazü gü tilo hola letse zoti. Anyugun le nle ntemi ntsükethyü ge nyu tehenyhunkemvu kazü ki anyugun dushvu lati tse zenchwi ryü le tse soti.

²⁹Temi hidan hile nle nhonthyü titse kejü lo-o nkekvu kedanyu Ijipt ki zenchwi keryü genyu.’