Read Southern Rengma Naga JOHAN 10 Bible Online

JOHAN 10 - Southern Rengma Naga bible

JOHAN 10

¹Ale hagun ka zo tsentsü shüti, “Temi lihigüe tanyü chwida khenpvü nyu yü mvuo kechaki pela yü kehünyu le kerühu nyu lo mehon seketyü nyu.

²Ai temi lihigüe chwida khenpvü zen keyünyu, tsünyu le tanyü kekhwen nyu.

³Khenpvü kekhwen gü le khinshye pe tsünyu tsü hünyo; lo tanyü le tsünyu khwenyü hünyo; lo tsügü le a-npvü a-tanyü zan ko-o tsüdan khwen hünyo.

⁴A-le a-npvü a-hon dan zen kü chwilo, lo a-le tsüdan mhundyü ki hü, lo a-tanyü dan le a-sithen hünyo, kechamvule tsüdan le a-khwen sha kethyü genyu.

⁵Lo tsüdan le me kechanyu sithen mvule tin sen-o nrhi lati; kechamvule tsüdan le me kechanyu khwen sha hü kemvu genyu.”

⁶Tson-o Jisu le jokejvü hilope anyugun ka zoshü; ai anyugun le Jisu le anyugun ka zo keshü a-kon shalo mvula.

⁷Tsügenyu Jisu le anyugun ka, “Ale hagun ka zo tsentsü shüti le, ale tanyü dan khenpvü gü.

⁸A mhundyü ki keryü nyu le aphu kerühu nyu lo mehon seketyü nyu nti; ai tanyü dan le tsüdan khwe nyü hü mvu.

⁹Ale chwida khenpvü gü; temi lihigüe agenyu yü kethyü gü le a-kenilo ti. Tsünyu kekhwen gü le zen chwi lo yüo a-chvü hyulo ti.

¹⁰Kerühu nyu le rühu titse lo boshvu titse lo tha nke titse kethyü kerüchün a-me thakecha rüchün-o ryü hü mvu. Ale meno kerhün hyulo titse lo tsü hyu chonlo titse kethyü genyu ryü.

¹¹“Ale tanyü kekhwen kegwa gü. Tanyü kekhwen kegwa gü le a-tanyü genyu a-phou hoshü hünyo.

¹²Tanyü le a-hon kemvu, tanyü kekhwen ketsin gü kemvu, meno a-jonshye zen kehünyu le teken gunkeryü hyushü yatselo, tanyü dan khelao tinla hünyo, tson-o teken no tsüdan tenlo njüo tsüdan no nren nru tinla hünyo.

¹³Kechamvule a-le meno a-jonkeshe kerüchün a-me tanyü dan phin we rüchün hü kemvu genyu.

¹⁴Awe tanyü kekhwen kegwa gü; lo ale a npvü ahon dan shabin nyo, lo ahon dan ko asha bin nyo.

¹⁵Apvü le asha kebin hontse ako Apvü shabin nyo. Ale tanyü dan genyu aphou hoshü titse bin nyo, lo hinyu binkemvu a tanyü kechae bin zun.

¹⁶Ale tsüdan ko zen gunryülo mvulo shvu, lo tsüdan le akhwen nyülo ti; tson-o aphu kesin pe dan me thyü, lo anyugun kekhwen-e nme thyü ti.

¹⁷“Lo Apvü le akeso le, kechamvule ale aphou loni titseo hoshü gü kezhü genyu.

¹⁸Temi nme-e aka tsü selo mvule ale anpvü tsü hoshü gü zhü. Hoshü titse kethyü a kekvu le bin nyo, lo khinilo titse kethyüe a kekvu le bin nyo. Jo hile Apvü kanyu hyulo laso.”

¹⁹Jo tsügü genyu Judanyu dan nyu jo kechacha thyü soryü la.

²⁰Anyugun temi kechon le, “A-le tero gwakemvu zen hünyo! Lo kenunyu! Hagun le nyuthyüo a-jo nyü hü nla?”

²¹Kechanyu le zo-o, “Jo hile tero gwakemvu le zen kehü jo kemvu. Tero gwakemvu nme le a-yhütyü keponyu yhütyü thyü ngwashü logwa ole?”

²²Lo tsügwünkho ka tsüle Jerusalem Kershvuka thyü ketsüni kethyü nga tilo la, lo tsüle tsangse ki laso.

²³Lo Jisu le Kershvuka nyu Solomon kasü hensin nyu nsin nshye tse bin.

²⁴Tsügenyu Judanyu dan le ryüo a-hunpvülo njüo a-ka, “Ditsü laki thyü nle agun no sha ntsenlo mvu bin tila? Nle Khrista gü letselo nle agun ka zo ntsen shüla ta.”

²⁵Tsüselo Jisu le anyugun ka, “Ale hagunka zoshüe hagun le tenyen hümvu; lo ale Apvü zan sen-o tha thyü kehü tsüle a jünzo hünyo.

²⁶Ai hagun le a tanyü dan kemvu genyu tenyen hümvu.

²⁷A tanyü dan le akhwen sha, lo ale tsüdan sha, lo tsüdan le a sithen hünyo.

²⁸Tson-o ale kethonthen kerhün khipe tsüdan tsü hünyo; lo tsüdan le thame kae nkela loho, lo temi nme-e a ben nyu tsüdan se sentinla loho.

²⁹Tsüdan khipe atsü kela Apvü tsü le tha seni nyeki gon; lo temi nme-e Pvügü ben nyu tsüdan se sentin loho.

³⁰A, lo Pvügü ayi le nme.”

³¹Tsontsin Judanyu dan le tso pe a-jon titse sola.

³²Ai Jisu le tsüdan ka, “Pvügü ka a tho kegwa kechon thyü pe hagun hi; thatho tsüdan digü genyu hagun le tso pe a jon titse bin nla?”

³³Judanyu dan le Jisu ka zoni, “Ntho kegwa genyu agun le tso pe njon mvu, ai Sunggigü kenkhin jo kezo genyu; lo nle temi nme, ai nle nnpvü nle Sunggigü letse kehü genyu.”

³⁴Jisu le anyugun ka, “Hagun tejvü nyu, ‘Hagun le teronyu’ tse Sunggigü le zo, tson kethyü thu njü mvu ole?

³⁵Lo ngun le shabin nyo ketsinlesü le kezo dan tsü ketsin kethonthen, lo Sunggigü le temi tsüdan tsü kope teronyu tson, a-le a-jolo pe ketsü temi dan ka.

³⁶Ale Sunggigü Nyu, tson keshü genyu, hagun we tsüle Sunggigü le A-npvü a-le nshün letseo nipe kazü nyu keshü gü ka, Nle Sunggigü nkhin hünyo tson tila?

³⁷Ale Apvü tho thyü hü mvu tselo hagun atenyen nya.

³⁸Ai ale tsü thyü hü tselo, hagun le a tenyen mvue a thogü we tenyenlo ta. Tsonlo yatselo hagun le Pvügü le anyunki bin kethyü lo ale Pvügü nyu ka bin tsekethyü sha lo rüchünlo ti.”

³⁹Tsüselo anyugun le Jisu tenlo titse niso, ai a-le anyugun ben nyu tinla.

⁴⁰Tson-o a-le Jordan ri nken chwio Johan le me baptaiz thyü kehü bin ki gü bin tinla.

⁴¹Lo temi kechon le a-ki ryülo; tson-o anyugun le, “Johan we nduntho nme-e thyüshü mvu, ai Johan le temi ligü rüla zokeshü le a-ketsin nti.”

⁴²Tson-o tsükatsü temi kechon ki-e a-tenyenlo.