Read Southern Rengma Naga JOHAN 11 Bible Online

JOHAN 11 - Southern Rengma Naga bible

JOHAN 11

¹Lo Maria lo a-tsagi Martha au rünyi Bethani nyu Lazar tsekethyü temi nme le ho bin.

²Lo Maria tsüle nduka terzü pe Npugü ge shüo a-shün pe Npugü pha shon kethyü gi tsü; lo ho kebin gü Lazar tsü le a-tsü gü.

³Tsügenyu tsü lügi hvutsü le me nipe Jisu ki shüo, “Hire, Npugü, nle so kehü gü tsüle ho bin nyo.”

⁴Ai Jisu le jo tsü shalo ntsin,a-le zo, “Keho hile kesi keho kemvu le, ai Sunggigü Nyugü no zankechwi thyülo nrün lo Sunggigü zan no chwilo nrün genyu.”

⁵Lo Jisu le Martha lo a-sikezengi lo Lazar ko tse so gunryü.

⁶Jisu le temi tsügü le ho kebin sha kelo siki a-le jonhvu a-kebin bin nyu bin sinlo.

⁷Tson-o tsüsi nyü a-le senthyükelonyu dan ka, “N gun rani sen-o Judia nyu gun ti leje.”

⁸Lo senthyükelonyu dan le Jisu ka, “Rabi, Judanyu dan le nje ntsenyüe tso pe n jon ti tse bin-e nle tsüki nigun ti ole?”

⁹Jisu le zoni, “Khenyüme tegi kevü jo tseryü kenyhun mvu ole? Ligühigüe nhennyu tsonchü hü yatselo a-le kazü keben hyu kebin genyu a-pha nsü hü mvu.

¹⁰Ai lihigüe kheje ki nda hü yatselo, keben gü kendi genyu a-pha nsü hünyo.”

¹¹A-le jo hi zoshüo tsüsiki anyugun ka, “Ngun pvügü Lazar tsü le zhü tinla so; ai ale a-kezhü kesunlo nrün genyu gunti.”

¹²Tsügenyu senthyükelonyu dan le Jisu ka, “Npugü, a-le zhü tinla lo a-le nisolo ti.”

¹³Jisu le a-kesi rüla zoshü, ai anyugun le tsü le Jisu le ligü le zhü tinkela rüla zoshü ado tse rüchün la.

¹⁴Tsügenyu Jisu le anyugun ka zo ketse nio, “Lazar tsü le sila so.

¹⁵Lo ale tsünyu bin mvu kethyü hagun genyu akenyü; kechamvule hagun le tenyenlo nrün genyu, tson-e ngun a-ki gun ti je.”

¹⁶Tsügenyu Thoma, mele a-zan lope Diduma tse kehü gü le, senthyükelonyu a-pvünyu dan ka, “Ngun ko a-zen-o sila nrün genyu gunti je.”

¹⁷Tson-o Jisu le Bethani nyu ryülo ntsin mele Lazar lope sika nyu sunkela jonzi thyü kela shalo.

¹⁸Lo Bethani tsüle Jerusalem zen-o mail ja kenyhun nithen.

¹⁹Tson-o Judanyu kechon le Martha lo Maria au tsügü genyu au nyun gwün nbwen shüti tse ryü au zen bin.

²⁰Lo Martha le Jisu le ryü zhü tsekethyü shashü ntsin gü a-zen keteno, ai Maria we kanyu bin.

²¹Tson-o Martha le Jisu ka, “Npugü nle hinyu binlo, atsügü le sila loho nrün.

²²Ai ntsokae nle Sunggigü ka tha lihi-e hishülo Sunggigü le khipe ntsüshü ti tsekethyü ale shabin nyo.”

²³Jisu le a-ka, “Ntsügü le nisoryü loti.”

²⁴Martha le Jisu ka, “A-le jon kenkhin ketsin nyü mele rhünni soryü nrün ka a-le rhünni so loti tsekethyü ale shabin nyo.”

²⁵Jisu le a-ka, “Ale rhünni keso gü, lo kerhün rozin gü; temi lihigüe a tenyen kehü gü le silae rhünni loti.

²⁶Lo temi lihigüe rhün kehü ka tenyen kelonyu le thame kae si loho. Nle jo higü tenyenlo se mon?”

²⁷Tenu tsügi le a-ka, “Npugü, nle kazü nyutsüryü titse kehü gü Khrista gü tsekethyü ale tenyen bin nyo.”

²⁸Lo Martha le jo tsü shalo ntsin a-le gü a-sikezen gi Maria kolo njüo, “Senkethyügü le hika ryüo nko hünyo,” tsonshü.

²⁹Lo Maria le jo hi shashü ntsin whütse Jisu ki gunla.

³⁰Lo tsüle Jisu le rünyi nyu chwiryü mvu zun-o Martha au keteno kethyü bin ki hü zun.

³¹Judanyu dan ryü anyugun ka nyu au zen bin-o au nyun thyü nbwen kebin nyu dan le Maria le chwikela hyushü ntsin, a-le sika ki gü chü ti ado tsekethyü rüchün-o a-sithen gü.

³²Tsügenyu Maria le gü Jisu kebin bin tilo ntsin Jisu hyulo-o a-le khosen tsügü Jisu pha ka zhülo njüo a-ka, “Npugü, nle hinyu binlo atsügü le sila loho ata le.”

³³Tsügenyu Jisu le a-kechü lo a-zen gunkeryü nyu kechü hyushüo a-nyu gwamvu lo a-nyun kenjünthyüo zo,

³⁴“Hagun le a-khipe dikipon shüla la?” Anyugun le a-ka, “Hire, Npugü, shwishü ta,” tson.

³⁵Jisu le chü tinla.

³⁶Tsügenyu Judanyu dan le, “Liki li, a-le ditsüki thyü a-so gunryü yo.”

³⁷Ai anyugun peha le, “Nduka a-yhütyü keponyu yhütyü thyü ngwa kelo gü a-le temi higü hi-e no simvu kelo thyü loho ole?”

³⁸Tsügenyu Jisu le a-nyun gwamvuo sika ki ryü. Lo tsü le tso kepekü nme, lo tso nme pe a-mün ka nke njü.

³⁹Tson-o Jisu le anyugun ka, “Hagun tso tsü khila chi.” Kesigü lügi Martha le Jisu ka, “Npugü, ntsoka we a-min le tenla so; a-le sikela le jonzi thyü kela si genyu.”

⁴⁰Jisu le Martha ka, “Ale ngü ka nka, ‘Nle tenyenlo yatselo, nle Sunggigü kekvu hyulo ti,’ tse nka zoshü mvu ole?”

⁴¹Tsontsin anyugun le tsogü tsü khila. Tsükatsü Jisu le nyi sogü, “Apvü, nle a kehi nyüshü kehü genyu ale nshwen hünyo.

⁴²Tsüntimvule nle a kehi nyü zin hünyo tsekethyü ale shabin nyo; ai temi a hunpvü kebin dan no nle a nishü tsekethyü anyugun no tenyenlo nrün genyu ale jo tsü zoshü hünyo.”

⁴³Lo Jisu le jo tsü zoshü njüo nra sen-o, “Lazar, chwiryülo!” tsonshü,

⁴⁴Tsonshü ntsin kesigü tsüle phi lope a-pha a-ben jepvü, lo phi nme pe a-mhun jepvü tse chwiryüla. Lo Jisu le anyugun ka, “Shwüla njüo a-no tsonchü gunla chi!” tsonshü.

⁴⁵Tsügenyu Judanyu dan le Maria ki ryüo, a-tho kehyu dan temi kechon le tenyenlo.

⁴⁶Ai anyugun peha le Farisinyu ki gü Jisu le thatho thyükeshü pe tsüdan ka zoshü.

⁴⁷Tsügenyu peshünyu dan lo Farisinyu dan le gü kenthon, “Ngun nyu tsethyülo gwa tila? Temi higü hile tha ndunkethyü tho kechon thyü tinla so.

⁴⁸Ngun le a-no hihontse binlo, temi aphu a-tenyen tinla tiso; lo Rom nyu le ryüo ngun Kershvuka lo ngun temi-e lo lati so.”

⁴⁹Ai anyugun dan nyu Kaifa tsekethyü temi nme le tsüchen peshükeda thyükelo gü tsüle anyugun ka hihontse zo so.

⁵⁰“Hagun le thame rüchün shü hü mvu, lo ngun temi aphu no nke la mvu nrün genyu temi nme no si kela we njün gwakvu titse kethyü hagun we tsüe rüchün hü mvu ole?”

⁵¹A-le a-npvü a-mün ka jo hi zochwiryü mvu, ai a-le tsüchen tsü peshükeda thyüo, Jisu le ntemi genyu sishü mvulo shvu tse sidyü jo pe zoshü.

⁵²Lo temi tsüdan ntimvule a-le Sunggigü nyenyu nren nru tinkela dan-e fü kequen ni zen ryüo kengüo nme thyülo nrün genyu.

⁵³Tsüselo anyugun le tsüsiki we Jisu dukeshvu kela nti rhi tinla.

⁵⁴Tsügenyu Jisu le Judanyu dan mhundyü ka ndo-o hü nyü mvula, ai tehen kho kenni Efraim tsekethyü rünyi nme nyu gun-o a-le senthyükelonyu dan zen-o tsünyu bin tinla.

⁵⁵Lo Judanyu le nkenkechwi nga jon tsü tilo; lo tsükatsü rünyi aphu nyu temi kechon le a-npvü a-thyü nshünlo titseo nkenkechwi nga mhundyü Jerusalem nyu gunla.

⁵⁶Tson-o anyugun le gungü Kershvuka nyu kebin ka Jisu füo, “Hagun kerüchün we a-le nga hinyu ryü loho letse bin le nyuthyü la?”

⁵⁷Lo püshükeda dan lo Farisinyu dan le a-tenlo kenyü genyu temi lihigüe a-kebin bin shalo tsinshü mvulo shvu, tse hukum shüla.