Read Southern Rengma Naga JOHAN 13 Bible Online

JOHAN 13 - Southern Rengma Naga bible

JOHAN 13

¹Lo nkenkechwi nga mhundyü Jisu le kazü hinyu a-le A-pvü ki gunla titse kethyü gwünkho le ryü laso; tsekethyü shalo; lo kazü hinyu kebin a-temi dan sogwa ryü, lo kethonthen tsüdan sogwa hü ti.

²Lo kheje ki chvütyü kebin ka Satan le Jisu ten pe me ben nyu shüla lo tse kethyü tedo pe Simon nyugü Iskariot Judas nyun nyu shüla.

³Lo Jisu le A-pvü le tha aphu hoshü pe a-ben ka shükela, tson-o a-le Sunggigü ka nyu ryü lo Sunggigü ki nigun nrün shalo.

⁴Tsügenyu chvütyü kebin ka so gü a-phi yhünla njüo züluphi nme khipe a-senphinlo.

⁵Tson-o a-le zü jape zükelu khun nyu shülo njüo senthyükelonyu dan pha sülao züluphi pe a-senphin pvü kehü tsü pe shonla latse gun.

⁶Lo a-le tson sen tse Simon Pitor ka ryü. Tsüselo Pitor le a-ka, “Npugü, nle apha süti ole?”

⁷Jisu le a-ka, “Ale thyü kebin hile nle ntsoka shamvu; ai nle hisiki sha loti.”

⁸Pitor le a-ka, “Nno thame kae apha sü loho!” Jisu le a-ka, “Ano npha sü mvulo nle a kipon njün ndi.”

⁹Simon Pitor le a-ka, “Npugü, apha hvu ntimvule aben hvu lo ape-e sin ta.”

¹⁰Jisu le a-ka, “Zülu kelanyu le a-pha hvu nyeki kechaki sü mvue gwa, a-le nshün kü kebin genyu. Lo hagun le nshün bin, ai aphu le mvu.”

¹¹Kechamvule segü le a-ten pe me ben nyu shüti yo tsekethyü sha kebin genyu a-le, “Hagun aphu nshün kü mvu,” tsonshü.

¹²A-le tson-o anyugun pha süla ntsin a-le a-phi khibenlo njüo dun tinla. “Hagun ale hagun ge thyü keshü hi shalo semon?” tson-o a-le ketso.

¹³“Hagun le alope Senkethyügü, tse lo alope Npugü, tse hü; lo hagun le tson kehü tsü le a-ketsin, ale tsügü genyu.

¹⁴Lo ale Npugü lo Senkethyügü thyüo hagun pha süla hülo hagun ko khinyunyu pha sülo zü.

¹⁵Kechamvule ale hagun ge thyü keshü hontse hagun ko no tsühontse thyülo titse kethyü genyu.

¹⁶Ale hagun ka zo tsentsü shüti le, gonyu le a-npunyu nyeki gon mvu; nmvue mele nikeshügü tsüle a-nikeshügü nye gon mvu.

¹⁷Hagun le tsü shao zenlo hü yatselo, hagun hen kegwa ketsin!

¹⁸“Lo ale hagun aphu rüla zo mvu; ale senyu kejülo yo, ale tsüdan shabin; ai ketsin lesü no penlo nrün genyu, ‘A tensü ketyü gü le sepe pe atsu.’

¹⁹Tha tsü kethyü mhundyü nthu gerho ale nchwenyu hagun ka zoshütile, kechamvule tsü thyü keshü ka, ‘Ale tsügü,’ tse kethyü hagun no tenyenlo titse kethyü genyu.

²⁰Ale hagun ka zotsentsü shüti le, temi lihigüe ale a-nikeshügü zenkelonyu le azenlo hünyo; lo temi lihigüe a zenkelonyu le a nikeshü güe zenlo hünyo.”

²¹Jisu le tsonzo keshü siki a-nyun keyhunkerun-o, “Ale hagun ka zo tsentsü shüti le, hagun nme le aten pe me ben nyu shüti.”

²²Lo a-le segü rüla zoyo sha ntsen mvuo senthyükelonyu dan le khinyunyu kenri so.

²³Lo Jisu so gunkeryü senthyükelonyu nme le miz ka Jisu nyun ntsen ka bin.

²⁴Tsügenyu Simon Pitor le a-ben lope ndo pe a-hio a-ka, “A-le segü rüla zobin yo?” tse ketso shü.

²⁵A-le Jisu nyun ntsen nyu bin-o ranigü Jisu ka, “Npugü, tsüle segü la?”

²⁶Jisu le a-ka, “Ale tensü hilope honpen nyu ntsen pe a-tsü keshü gü tsüle.” Tson-o a-le tensü lope ntsenlo njüo pe Simon nyugü Iskariot Judas tsüshü.

²⁷Tson-o a-le tensü tsügü khikelo siki Satan le a-nyun nyu yüla, lo Jisu le a-ka, “Nle thyü titse kebin gü thyü kemhelo nye!”

²⁸Ai a-le nyu genyu jo tsü pe zoshü yo tsekethyü nme-e shalo mvula.

²⁹Ai peha le Judas le rakakhin sen kehü genyu mvulo keshvu heilo nye, tsonshü letse, nmvue a-no tha pe kendinyu tsüshülo tse hü ado, tse rüchün la.

³⁰Lo a-le tensü tsügü khipe tyü kelo siki kamhun ki whütse chwila, lo tsüle tsang-e zün laso.

³¹Lo Judas le kamhun ki chwila ntsin, Jisu le, “Ntsoka Temi Nyugü le a-zan kechwi thyü titse bin laso, lo Sunggigü le A-npvü a-ge zankechwi thyüshü titse bin laso.

³²Lo Sunggigü le a-genyu zankechwi thyülo yatselo Sunggigü le a-ko no zankechwi thyü loti.

³³Hire, ntsenyu dan, ale gwüngwa nye sin hagun zen bin loho so. Hagun le afü ti; ai ale himhundyü Judanyu ka, ‘Hagun le a kegun bin ka ryü loho,’ tsokeshü hontse; ale hagun ka zoshü gü zhü nyo.

³⁴Hagun no keso hülo tsekethyü ale jo keshün nme khipe hagun ka shüti tse bin nyo. Ale hagun so keryü hontse hagun ko kesolo nye.

³⁵Hagun le kesolo yatselo tsügenyu hagun lope ale senthyükelonyu letse kethyü mele hagun sha loti.”

³⁶Simon Pitor le a-ka, “Npugü, nle dikipon güti la?” Jisu le a-ka, “Ntsoka ale kegü bin ki nle a sithen loho; ai hisiki a sithen ryü loti.”

³⁷Pitor le a-ka, “Npugü, ale ntsoka nyuthyüo n sithen lomvu tila? Ale n genyu sishü ti!”

³⁸Jisu le a-ka, “Nle a-genyu sishü tila? Ale nka zo tsentsü shüti le, nle azan zomvu gwünshen ge kemvuthen tero le khun loho.