Read Southern Rengma Naga JOHAN 14 Bible Online

JOHAN 14 - Southern Rengma Naga bible

JOHAN 14

¹“Hagun nyun kenjün thyü nya.” Jisu le anyugun ka zo.“Hagun Sunggigü tenyen binlo lo ako atenyen binlo.

²Apvü ka ki temi bin le kechon ki bin nyo; tsonkemvu we ale hagun ka zoshü lati atale. Kechamvule ale gungü hagun bin ndo titse kethyü genyu.

³Lo ale gungü hagun bin ndolo yatselo ale rani ryüo hagun zen-o aki gun loti; tson-o hagun ko no a kebin bin ka binlo ti.

⁴Lo hagun le ale gun nrün tson gü shabin nyo.”

⁵Thoma le a-ka, “Npugü, nle dikipon güti yo agun le shamvu; agun le nyu tsethyü tson tsügü shalo mon?”

⁶Jisu le a-ka, “Ale tson gü, lo ketsin gü, lo kerhünronzin gü. Age kemvu we temi nme-e Pvügü ki gunlo hümvu.

⁷Ntsoka we hagun le a shalo laso,” a-le anyugun ka zo, “Hagun le Apvüe sha loti, lo ntsoka gerhonyu hagun le a-sha bin, lo a-hyue laso.”

⁸Filip le a-ka, “Npugü, Pvügü pe agun hishü ta, tson yatselo agun sherhün tilo ti.”

⁹Jisu le a-ka, “Ale jon hithen laki hagun zen hüe Filip, nle a sha mvu ole? Temi lihigüe a kehyu gü le Pvügü ko hyu laso. Tsonlo nle nyuthyüo, ‘Pvügü pe a hishülo,’ tson hü nla?

¹⁰Ale Pvügü nyu bin, lo Pvügü le age bin tsekethyü nle tsü tenyen hü mvu le? Ale hagun ka jo zo kehü hile a npvü aka nyu zochwiryü mvule Pvügü le age bin-o ale A-tho thyü hünyo.

¹¹Ale Pvügü ge bin nyo, lo Pvügü le age bin tsekethyü hagun tenyenlo nye; nmvue thatho ka gwünzin-e hagun tenyenlo nye.

¹²ale hagun ka zo tsentsü shüti, temi lihigüe a tenyen kehünyu le ale thyülo kehü tsü thyü loti, lo tsünye kegon-e thyü loti. Ale Pvügü ki gunzhü kelasi genyu.

¹³Lo hagun le azan ka tha lihi-e hilo, Pvügü no Nyugü zankechwi thyüshü nrün genyu ale tsü thyü sh'uti.

¹⁴Hagun azan nyu tha lihi-e hilo, ale tsü khipe tsüti.

¹⁵“Hagun le aso hülo hagun le ajo zen hüti.

¹⁶Lo ale Apvü ka hiti, lo A-le kethonthen hagun zen hü nrün hagun nyun thyü kesherhün shü nrün kecha nme khipe hagun tsüti.

¹⁷Lo tsüle Ketsin Kapu gü, kazü gü le a-zen kengü loho kethyü gü; kechamvule a-le tsü hyu hü mvu, nmvue shae hü kemvu genyu. Hagun we a-sha bin, kechamvule a-le hagun zen hü, lo hagun nyun nyu hü nrün genyu.

¹⁸“Ale hagun khe ketegola loho; lo ale hagun ki niryü ti.

¹⁹Jon keshanyu sika kazü hile ahyu mvu lati; ai hagun we ahyu ti; kechamvule ale rhün bin lo hagun ko rhün bin tsekethyü genyu.

²⁰Tsünyü hagun le, ale Apvü ge bin, lo hagun le age bin, lo ale hagun ge bin tsekethyü sha loti.

²¹“Temi lihigüe a johokeshü shalo njüo zen kehünyu tsünyu le a kesonyu. Temi lihigüe aso kehünyu le Apvü ka teshwen pvüti, lo ale a rüla pe tsünyu hishü ti.”

²²Juda (Iskariot kemvu gü) le a-ka, “Npugü, nle n rüla pe kazü gü hishü titse mvule agun hishü titse kethyü hile nyu genyu la?”

²³Jisu le a-ka, “Temi lihigüe aso hülo a-le ajo zen ti; lo Apvü le tsünyu soti; tson-o agun a-ki güo tsügü zen bin ti.

²⁴Temi lihigüe aso hü kemvu nyu le a jo zen hü mvu; lo hagun le nyülo kehü jo tsüle a jo mvule a nikeshü gü Pvügü jo.

²⁵“Ale hagun zen bin ketseka jo hilope hagun ka zoshü laso.

²⁶Ai nyunthukeyhun shü nrün gü, Pvügü le a zan nyu nishü titse kebin Kenshün Kapu gü tsüle, a-npvü tha aphu zo pe hagun hishü ti, lo ale hagun ka tha zo keshü tsü aphu hagun no rüchünlo ti.

²⁷“Ale nyun kebwen khipe hagun ki shüti. Ale a nyun kebwen gü khipe hagun tsüshü ti; kazü gü le khipe me tsü kehü hontse ale khipe hagun tsü titse bin mvu. Hagun nyun keyhunkerun la loshvu, lo nshvue nya nye.

²⁸Hagun le ale hagun ka, ‘Ale tinla ti sele tse bin so,’ lo ‘Ale hagun ki ryü ti,’ tson kezo tsü shalo laso. Hagun le a sohü lo, ale Pvügü ki gunzhü kela genyu hagun kenyü ti atale; kechamvule Pvügü le anyeki gon kethyügenyu.

²⁹Lo tha tsü thyü nrün ka hagun no tenyenlo titse kethyü genyu, tsü thyü nrün mhundyü ale hagun ka zoshü laso.

³⁰Ale hagun zen-o thon sari bin loho so; kechamvule kazü kedagü le ryü zhü laso; lo a-le a kipon thame kekvu ndi.

³¹Kazü hino ale Pvügü so hünyo, lo Pvügü johokeshü dan thyü kehü gwünzin tsekethyü shalo titse kethyü genyu. “So-o ngun hinyu tinla je.