Read Southern Rengma Naga JOHAN 16 Bible Online

JOHAN 16 - Southern Rengma Naga bible

JOHAN 16

¹“Ale hagun no thyüzüla nyü kemvu genyu jo hi pe hagun ka zoshü.

²Lo mele sinagog ka nyu hagun hüshü ti; tson ketsin thyü ti. Mele hagun dukeshvu tsü lope Sunggigü lothyü bin nle tse kerüchün gwünkho le ryü jü nyo.

³Tsüdan le Pvügü lo ako asha kemvu genyu anyugun no tsütho tsü thyüti.

⁴Ai tsügwünkho le keryü, ale tsü mhundyü hagun ka zokeshü tsü hagun no rüchünlo nrün genyu hagun ka jo hi zoshü lenye. “Lo ale hagun zen bin kethyü genyu sokerika jo hilo pe hagun ka zomvu.

⁵Ai ntsoka we ale a nikeshügü ki gunla ti sele tse bin nyo; ai hagun temi nme-e, ‘Nle dikipon güla ti sela?’ tse a ketso bin mvu.

⁶Tson-e ale hagun ka jo hilope zokeshü genyu hagun nyun kenjünthyü bin laso.

⁷Tson-e ale hagun ka jo ketsin zoti. Ale tin kela we hagun genyu kegwa gwünzin; kechamvule ale tinla mvu yatselo, Nyun Thukeyhun shü nrün gü le hagun ka ryü loho; ai ale tinla yatselo ale a-nipe hagun ki shüti tse kebin genyu.

⁸Lo tsüle ryülo kemu rüla, lo ketsin rüla, lo me kenkhin rüla zope kazünyu hishü ti.

⁹Kemu rüla tsüle anyugun le a tenyen kemvu genyu.

¹⁰Lo ketsin rüla tsüle ale Pvügü ki gunla nrün lo hagun no ahyu sin mvula nrün.

¹¹Lo me nkhin nrün rüla tsüle, kazü hinyu kedagü nkhin laso tsekethyü.

¹²“Ale hagun ka jo kechon zo nrün le bin zun, ai hagun le ntsoka tsü rüchün bu loho.

¹³Ai Ketsin Kapu tsüle keryü siki a-npvü hagun tson tsin pe ketsin nyu shü külo ti. Kechamvule tsügü le a-npvü a-kanyu zo mvule a-le tha lihi-e shakelo tsü a-le pe zoti; lo hisiki thathyü nrün tsü zope hagun hishü titse kethyü genyu.

¹⁴A-le ano zankechwi thyüti; kechamvule a-le a hon dan pe hagun tesha shü nrün genyu.

¹⁵‘Pvügü hon tsü aphu a hon; tsügenyu Pvügü le a hon khipe hagun hishü ti,’ tsekethyü ale zoshü.

¹⁶“Kethonmvu tse hagun le ahyu mvula tiso; lo kethonmvu tse hagun le a hyuni ti.”

¹⁷Tsontsin senthyükelonyu dan le kenthon-o a-le ngun ka, “Kethonmvu tse hagun le a hyumvu lati, lo kethonmvu tse hagun le a hyuni ti, lo ale Pvügü ki gunla titse kebin genyu, tson kehü jo tsüle nyu zohü nla?

¹⁸Tsügenyu anyugun le, ‘Kethonmvu tse,’ tsonzo keshü jo tsüle nyu jo la? Anyugun le a-le kezo kon shalo mvu!”

¹⁹Lo Jisu le anyugun le a-ka ketsonyü kebin shalo njüo anyugun ka, “Hagun npvü hagun dan nyu, ‘kethonmvu tse hagun le a hyumvu la tiso, lo kethomvu tse hagun le a hyuni ti,’ ale tson zokeshü jo tsü kera hü ole?

²⁰Ale hagun ka zo tsentsü shüti le, hagun le chü lo hagun nyungwamvu ti, ai kazügü hile a-kenyü sati. Hagun le hagun nyun kenjün thyüti, ai hagun nyu kenjün kethyü keluni pe hagun shekerhün thyü lati.

²¹Tenunyu le nnyu güzhüo a-gin thyü kelo ka, a-gwünkho le ryüzhüla kethyü genyu kenjünthyü salo la hünyo; ai a-nyu nnyu kelo siki we temi nme nnyu pe kazü hinyu shülo kela kerüchün genyu a-kenjün kethyü tsü rüchün mvu nila hünyo.

²²Tsühontse hagun ko ntsoka we hagun nyun kenjünthyü bin nyo; ai ale hagun nyuni ti, lo tsükatsü hagun nyun bwen nilo ti, lo temi nme-e hagun shekerhün tsü se sentin loho.

²³“Lo tsünyü we hagun le aka tha nme-e ketso loho so. Ale hagun ka zo tsentsü shüti, hagun le Pvügü ka tha lihi-e hilo, a-le a zan nyu tsü khipe hagun tsüshüti.

²⁴Hagun le ryüo ntsoka keti a zan nyu thame hishwi mvu zun. Hagun kenyüno tilo nrün genyu hilo nye, tsonlo hagun le hyulo ti.

²⁵“ Ajo hile hagun ka jo kentsun zoshü lenye, a-gwünkho nme le ryüzhü laso, lo tsükatsü ale jo kentsun zomvu le hagun ka Pvügü rüla zo tsentsü shüti.

²⁶Tsünyü hagun le a zan nyu tha hiti, lo ale hagun sunka Pvügü ka tha hiti tsekethyü zo bin mvu.

²⁷Pvügü le a-npvü hagun sobin kehü genyu, kechamvule hagun le aso ryü lo ale Pvügü kanyu ryü tsekethyü ketenyen genyu.

²⁸Ale Pvügü kanyu chwiryüo kazü hinyu ryü; lo kazü hi khela njüo Pvügü ki nigunla ti sele tse bin nyo.”

²⁹A-sikethen nyu dan le zo, “Hire, nle ntsoka we jo kentsun zomvuo jozo tsentsü shü bin laso.

³⁰Ntsoka we agun le nle tha aphu sha tsekethyü lo temi nme-e nki tha ketso mvue nle shabin tsekethyü shalo bin laso. Tsügenyu agun le nle Sunggigü kanyu chwiryü tsekethyü tenyen bin nyo.”

³¹Jisu le anyugun ka, “Hagun le ntsoka we tenyen bin sele?

³²Hire, gwünkho nme le ryüzhü so, e, ryü laso; tsükatsü hagun le tsenchvü tin bulao akhe pe ano a npvü lati. Ai Pvügü le a zen kehü genyu a npvüla loho.

³³Hagun no age hagun nyun kebwen no binlo nrüngenyu ale hagun ka zoshü bin nyo. Hagun le kazü hinyu kenjünthyü ti; ai hagun dyü benlo, ale kazü higü nyeki kvulo laso.”