Read Southern Rengma Naga JOHAN 17 Bible Online

JOHAN 17 - Southern Rengma Naga bible

JOHAN 17

¹Jisu le jo hi zoshüo nyiso gü tsangge nrio zokeshü le hihontse, “Apvü tegi kevüja tsüle ryü zhü laso, Nyugü no n zan kechwi thyülo nrün genyu nle Nyugü zankechwi thyüshü ta.

²Nle himhundyü ano kethonthen kerhün khipe nle pe aben nyu shü kelanyu aphu tsü nrün genyu temi aphu so kekvu khipe atsü keshü hontse shü nye.

³Lo temi no n nti le ketsin Sunggigü tsekethyü lo nle nikeshügü Jisu Khrista sha kelo hile kethonthen kerhün le.

⁴Nle khipe ano thyü lotse kethyü tho tsü thyü tila njüo kazühinyu nzan kechwi thyü shü laso.

⁵Lo Apvü, kazü hi thyü kelo mhundyü ale nzen-o zankechwi thyü kehü gü pe ntsoka a zankechwi thyü shüta.

⁶“Nle kazü hinyu temi khipe aben nyu shü kela dan ka ale nzan pe tsüdan hishü laso. Anyugun le nhon, lo nle tsü khipe a tsüshü; lo anyugun le n jo zen hü.

⁷Lo nle khipe a tsükeshü aphu nka nyu chwiryü tsekethyü anyugun ko ntsoka we shalo laso.

⁸Lo nle jo pe a npvü keshü tsü ale khipe anyugun ben ka shü laso; lo anyugun le tsü shalo-o ale nka nyu ryü ketsin tsekethyü shalo so, lo anyugun le nle a nishü tsekethyü tenyenlo so.

⁹“Lo ale tsüdan genyu hihü nyo; ale kazü higenyu mvule nle khipe a tsüshü kelanyu dan genyu hi hünyo, lo tsüle nhon genyu.

¹⁰Lo a hon le aphu n ho, lo n hon-e a hon; lo ale tsüdan genyu zen kechwi thyü hünyo.

¹¹Ai ale kazü hinyu bin sin loho so, lo hidan we kazü hinyu bin ti, lo awe nki ryü lati. Kenshün Pvügü, nle khipe a ketsü dan, tsüdan no nnyi hontse nme thyülo titse kethyü genyu nle n zan nyu tsüdan ntsen bin lota.

¹²Ale anyugun zen kehü then we, ale nzan nle khipe a tsü keshü gü zan kekvu nyu anyugun ntsenlo. Lo ale anyugun khwen ryü tilo; lo ketsin lesü jo no penlo nrün genyu nke kela nyugü nti a-me anyugun temi nme-e nkela mvu.

¹³Ai ale ntsoka we nki ryüla titse bin so; lo anyugun no anyugun nyun nyu a kekenyü no penlo nrün genyu ale kazü nyu kebin ka jo tsü pe zo keshü.

¹⁴Ale njo hope anyugun ben nyushü lo ale kazü hinyu chwiryü kemvu hontse anyugun ko kazü hinyu temi kemvu genyu mele anyugun ntsü laso.

¹⁵Ale nno kazü hinyu anyugun khilo lotse mvule nno serikemvu gü ben nyu anyugun ntsenlo lotse hi hü nyo.

¹⁶Ale kazü hinyu temi kemvu hontse anyugun-e kazü hinyu temi kemvu.

¹⁷Nle ketsin nyu anyugun thyü kenshünlo; njo tsüle ketsin.

¹⁸Nle a nipe kazü hinyu keshü hontse ako anyugun nipe kazü hinyu shü laso.

¹⁹Lo anyugun ko no ketsin nyu anyugun thyü nshünlo titse kethyü genyu ale a npvü a thyü kenshün sen hünyo.

²⁰“Ale hidan genyu nti hi mvule anyugun jo nyu a tenyen kelo dan aphu genyu nka hi hünyo.

²¹Kechamvule anyugun aphu no nme thyülo titse kethyü genyu. Apvü, nle a nishü tsekethyü kazü hiko no tenyenlo titse kethyü genyu, nle age bin lo ale nge bin tsekethyü hontse anyugun ko no nnyi ge binlo ta.

²²Lo nnyi le nme thyü kehü hontse anyugun ko no nme thyü titse kethyü genyu ako nle khipe atsü keshü zankechwi tsü khipe anyugun tsüshü laso. Tsüle a-kon le anyugun no nme thyü tilo nrün.

²³Lo kazü hino nle a nishü tse kethyü lo nle aso kehü hontse anyugun-e so ryü tsekethyü shalo nrün genyu, ale anyugun ge bin, lo nle age bin lota.

²⁴“Apvü, nle khipe a tsü keshü dan no ale dika bin yo tsüka azen kebin le a kendo, nle kazü thyü kelo mhundyü a keso genyu khipe a ketsü dan zankechwi kethyü gü tsü anyugun no hyulo nrün genyu.

²⁵Hire, Ketsin Pvügü, kazü gü le nsha mvu laso, ai awe nsha bin; lo hidan hi we nle a nikeshü shabin.

²⁶Ale nzan pe anyugun hishü laso, lo tsühontse pe hinishü ti, kechamvule nle pe aso ryü kethyü keso tsüno anyugun ge binlo, lo ano anyugun nyu binlo nrün genyu.”